மீண்டும் பிம்ப அரசியலின் தொடக்கம்

மீண்டும் பிம்ப அரசியலின் தொடக்கம்


ஆன்மீக அரசியல் என்கிற ரஜினியின் முதல் பன்ச் டயலாக்கே நன்றாகத்தான் இருக்கிறது.தமிழ்நாட்டு மக்களுக்கு இன்னும் இருபது வருடங்களுக்கு பன்ச் டயலாக்கிற்கும் குறைவில்லை.செய்தித்தாள்களில் கேளிக்கைக்கும் குறைவில்லை.தமிழர்கள் பொதுவெளியரசியலிலும் கேளிக்கை குன்றக் கூடாது என்பதில் உறுதியாக இருக்கிறார்கள்.
ரஜினிக்கு என்னுடைய நல்வாழ்த்துகள்
தமிழர்கள் கொள்கை அரசியலை ஏற்று கொள்ளவில்லை என்பது ரஜினியின் அரசியல் பிரவேசம் மூலம் வரலாற்று ரீதியாக மீண்டும் நிரூபணம் ஆகிறது.கொள்கை அரசியல் பேசுவோர் தனிநபர் அரசியலை முன்வைப்பவர்களைக் காட்டிலும் தமிழ்நாட்டில் மக்களின் நம்பகத்தன்மையை பெறுவது கடினமாக இருக்கிறது.கொள்கை அரசியல் தங்களை முற்றிலுமாக ஏமாற்றிவிடுகிற அதிகாரம் என்றே மக்கள் கருதுகிறார்கள் . இதற்கான உளவியல்,சமூகவியல் காரணங்கள் எளிமையாக கடந்துவிடக் கூடியவை அல்ல.அதிலிருக்கும் உண்மையின் மூர்க்கத்தன்மை பல செய்திகளை உள்ளடக்கியிருக்கிறது.ரஜினியின் அரசியல் பிரவேசம் அடுத்த காலகட்டத்திற்குள் எம்.ஜி.ஆர்.நுழைவதனை ஒத்த நிகழ்வு.இது தமிழ்நாட்டில் தற்போதைய சூழலில், அரசியல் குழப்பம் நீடிக்கும் நிலையில் பலத்த அதிர்வை ஏற்படுத்தும் என்பதில் சந்தேகமேயில்லை.
தமிழ்நாட்டில் தேசிய அரசியல் முடிவிற்கு வந்த பின்னர் தி.மு.கவின் கொள்கை அரசியலில் விடுபட்டு எம்.ஜி.ஆரை ஏற்றுக் கொண்டதிலிருந்து பிம்ப ,தனிநபர் அரசியல் உதயமாகிறது.அது தேய்ந்து தேய்ந்து தந்து இருப்பை முற்றிலுமாக இழக்க ஏறத்தாழ நாற்பது வருடங்கள் தேவைப்பட்டிருக்கின்றன.அது தேய்ந்து அழிந்த பின்னர் எவ்வாறு இருக்கும் என்பதனைத் தான் இப்போது நாம் பார்த்துக் கொண்டிருக்கிறோம்.அதன் வெற்றிடத்தில் இப்போது ரஜினி என்கிற புதிய அரசியல் பிம்பம் உருவாகிறது.
இது மீண்டும் எவ்வளவு காலத்தை எடுத்துக் கொள்ளும் ? இவ்வாறான பிம்ப அரசியல் முன்வைக்கப்படுகிற போது சீமான் போன்ற எதிர்நிலை அரசியலாளர்கள் தான் மக்களுக்கு கிடைப்பார்கள் .பிம்ப அரசியலின் பாதகத்தை அதற்கு கிடைக்கிற எதிர்நிலைகளே உணர்த்திவிடக் கூடியவை.இவ்வாறான பிம்ப அரசியலுக்கு மாற்றான அரசியல் போக்குகளை ஏன் தமிழ்நாட்டில் உருவாக்க இயலாமற் போகிறது ? இங்கே மக்களிடம் நம்பகத் தன்மையை உருவாக்கக் கூடிய அரசியல் தரப்புகளே தமிழ்நாட்டில் கடந்த முப்பதாண்டு காலத்தில் உருவாகவில்லை என்பதே உண்மையான காரணம்.மார்க்சியம் ,காந்தியம் எல்லாமே தமிழ்நாட்டில் படுதோல்வியடைந்திருக்கின்றன.அதனை முன்வைத்த அரசியல் தரப்பினர் புரிதல் இல்லாதவர்களாக , கோமாளிகளாக உண்மையில் அதன் பொருளுக்குத் தொடர்பற்றவர்களாக மாறியிருக்கிறார்கள்.
பொதுவாக சிறிய தேசிய இனங்களுக்கும்,நெடிய தேசிய இனங்களுக்கும் இடையில் பண்பாட்டு ரீதியில் பெருத்த வேறுபாடுகள் உண்டு.கேரளாவில் எளிமை செல்லுபடியாகிறது என்றால் இங்கே எளிமை கேலிப்பொருள்.தன்னை ஆளுகிறவன் இங்கே அதிமனிதனாக இருந்தாக வேண்டும்.தன்னை போல அவன் இருப்பது ஒருபோதும் தன்னை ஆளுவதற்கு தகுதி படைத்ததல்ல என்றே மக்கள் கருதுகிறார்கள்.
விரும்பும் நாயகர்களும் கூட தங்களை போன்று சாதாரணமாகத் திகழும் இடங்களில் மெச்சவோ , கவலை கொள்ளவோ செய்கிறார் மக்கள் .மெச்சும் போது அவர் எவ்வளவு சாதாரணமாக இருக்கிறார் பாருங்கள் என்றும் கவலை கொள்ளும் போது அவர் அப்படியிருக்க வாய்ப்பில்லை என்றும் சொல்வார்கள்.இதனையெல்லாம் கருத்திற் கொண்டு தனிநபர் அரசியல் பாதகத்தையே உருவாக்கும் என்றும் எடுத்துக் கொள்ளயியலாது.கேரளாவைக் காட்டிலும் தமிழ்நாட்டின் அரசியல் சிறந்தது என்பதே யதார்த்த உண்மை.அதிகப்படியான சுற்றுப்புற சீர்கேடுகள் ஏற்படாமல் , மக்களுக்கு அதிகமாக வெளியேறிச் சென்று வாழும் நிலையை ஏற்படுத்தாமல் வளர்ச்சி பெற்றிருக்கும் மாநிலங்களில் ஒன்று தமிழ்நாடு.நெடிய தேசிய இனங்களில் ஆந்திராவில் என்.டி.ஆர் என்றால் தமிழ்நாட்டில் எம்.ஜி.ஆர்.இவற்றின் உளவியல் பிரத்யேகமானது .
இத்தகைய தனிநபர் பிம்ப அரசியலுக்கு தமிழ்நாட்டின் சாதி மனோபாவமும் முக்கியமான காரணம் .சாதி மனோபாவம் எல்லா மாநிலங்களிலும் இருப்பதுதான் என்றாலும் கேரளத்தில் ஒரு ஈழவரையோ , நாயரையோ ,நம்பூதிரியையோ தலைவர்களாக இருக்கும் போது சாதியை காரணமாக வைத்து மக்கள் ஏற்க மறுப்பதில்லை.தமிழ்நாட்டில் எந்த தலைவராக இருந்தாலும் அவர் பிற சாதியென்றே பிற சாதி மக்கள் கருதுகிறார்கள் .தமிழன் ஆளவேண்டும் என்று தமிழ்நாட்டில் ஒருவர் குறிப்பிடுகிறபோது , தன் சொந்த சாதிக்காரன் ஆளவேண்டும் என்கிற குறிப்பே மறைமுகமாக அதில் ஒளிந்திருக்கிறது . சாதி அடையாளங்களுக்கு வெளியே இருக்கும் அதிமனித பிம்பங்களே இங்கே ஏற்பதற்கு சாதகமாக உள்ளன.இது எம்.ஜி.ஆர் பெற்றிருந்த சாதகமான விஷயம் எனில் அதே தன்மை ரஜினி காந்திற்கும் பொருந்தும்.
பிம்ப அரசியலில் சாதகமான விஷயம் என்னவெனில் அதிமனித ரூபங்களை உருவாக்க பயன்பாட்டிற்கும் பிம்பத்தின் சாராம்சங்களை ,இந்த தனிநபர்கள் முற்றிலுமாகக் கடக்க இயலாது என்பது ஒன்றுதான்.மக்கள் செல்வாக்கு பெற்றே இந்த பிம்பம் எழும்புகிறது.அதன் ஒவ்வொரு கண்ணியிலும் மக்களின் உளவியல் பயன்பட்டிருக்கிறது.அதனை மீற முயலும் இடங்களில் தனி நபர்களின் பிம்பமும் கீறத் தொடங்கும்.எனவே ஒருபோதும் பிம்பத்திற்கு முரணாக முற்றிலும் முரணாக செயற்பட இயலாது.இதற்கு மேல் நீ செல்ல முடியாது என்பதனை மக்கள் ஏற்கனவே தீர்மானித்து இந்த பிம்பத்தைக் கட்டியெழுப்பியிருக்கிறார்கள்.மக்களை பொறுத்தவரையில் இந்த மீமனித தனிமனித பிம்பங்கள் தாங்கள் பிரார்த்தனை செய்து உருவாக்கிய தெய்வம். தங்களை காவல் செய்வதற்கும் காப்பதற்கும் உரியது என்கிற அர்த்தம் தரக் கூடியது.
அப்படியாயின் ரஜினி என்ற வெகுமக்கள் பிம்பம் சாதகமானது தானா ? என்றால் சாதகமானதுதாம் என்றே சொல்ல வேண்டும்.அது ஒரு போதும் அனாதைகளைக் கைவிடாது.கஷ்டப்படுகிறவர்களைக் காக்கும் .அனாத ரட்சக பிம்பம் ரஜினியிடம் மறைந்திருக்கிறது.அதுவொரு சாதகமான விஷயம்.
மேலும் தமிழ் தேசியம் பேசுகிற பொய்யான தமிழ் உணர்வாளர்களைக் காட்டிலும் நேர்மையான ,ஏற்கத்தக்க தமிழ் உணர்வு இதற்கு உண்டு.இது எம்.ஜி.ஆர்.பின்னர் ஜெயலலிதா போன்றோரிடமும் காணப்பட்ட தமிழ் உணர்வு .காஞ்சி சங்கராச்சாரியாரை கைது செய்யவும் ,தலை நகரை சென்னையிலிருந்து திருச்சிக்கு மாற்றிவிடுவேன் என்று நெருக்கடி ஏற்பட்ட போது பேசிய தைரியமும்.தீவிரவாத தடுப்பு மையத்தை அனுமதிக்க மாட்டேன் என்ற ஞானமும் கைகூடிய தமிழ் சுயாட்சி உணர்வு இது.இது ரஜினியிடமும் குறைவுபடாது.குறைவு பட முடியாது.
இது செந்தாமரை அல்ல.வெண் தாமரை .வேறொன்று

தன் வேலை தள்ளிப் போகும் வேலை

தன் வேலை தள்ளிப் போகும் வேலை

என்னுடைய ஆறாவது கவிதை தொகுப்பு படிகம் வெளியீடாக வர உள்ளது.அதற்காக கவிதைகளை சேகரித்துக் கொண்டிருக்கிறேன்.என்னுடைய கவிதைகளைத் தான் சேகரிக்கிறேன் என்றாலும் இந்த பணி வேறொருவருடைய வேலை போன்று எனக்கு உள்ளது.இதுவரையிலான என்னுடைய கவிதைகள் கை கொண்டு காகிதங்களில் எழுதப்பட்டவை.இந்த தொகுப்பு முழுதுமே இணையத்தில் முகநூலில் என  எழுதியவை.

கவிதைகள், சிறு குறிப்புகள்,சிறிய நூல் மதிப்புரைகள் போன்றவற்றை இணையத்திலேயே எழுதிவிடுவதில் எனக்கு எந்த பிரச்சனைகளுமில்லை.உரைநடையை எழுதுவதற்கே தனியே ஒரு மனம் தேவைப்படுகிறது.அது தனிமையால் ஊறிய மனம். அதனை இணையத்தில் எழுதுவதில் எனக்கு பயிற்சி இன்னும் கூட வில்லை.கூடினால் நல்லதுதான் எளிதாக இருக்கும்.இல்லையெனில் உரைநடைகளுக்காக தனியே நேரத்தை ஒதுக்கி எழுத்தாணியை கையில் எடுக்க வேண்டும்.

என்னுடையவற்றைத் தொகுப்பது உண்மையாகவே சிரமமாக இருக்கிறது."வைத்தியன் பொண்டாட்டி புழுத்துச் செத்தாள்"என்பார்கள்.அது போலவே இதுவும்.நீங்கள் உங்கள் வீட்டு கல்யாணத்திற்கு சந்தைக்கு மரக்கறி வாங்கப் போகவேண்டும் வருகிறீர்களா ? என நள்ளிரவில் கூட அழைத்துப் பாருங்கள் .உடனடியாக உற்சாகத்துடன் ஓடி வந்து விடுவேன் .உண்மையாக நான் மாடுகளை மேய்க்க ,குளிப்பாட்ட ,கொல்லாம்பழம் பறிக்க என காட்டு வேலைகளுக்கே லாயக்கானவன்.விதி கொண்டுவந்திங்கு நிறுத்திற்று.என்னுடைய புத்தகங்கள் ,படைப்புகள் பிரசுரமாகும் இதழ்கள் போன்றவற்றைக் கூட சேகரித்து வைத்திருக்கும் பழக்கம் எனக்கில்லை.எப்போதேனும் தேவைப்படுகிற போது மிகுந்த  அவஸ்தையாக இருக்கும்.என்னுடைய புத்தகம் என்னிடமில்லை என்று சொன்னால் இப்போதெல்லாம் யாரும் நம்ப மாட்டேன் என்கிறார்கள்.ஆனால் எழுதுகிறவன் என்னைப் போன்று தன்னில் அசிரத்தையாக இருக்கக் கூடாது என்றுதான் நினைக்கிறேன்.

பொது வேலைகளில் எனக்குள்ள ஆர்வம் இது போல தொகுக்கும் போது இருப்பதில்லை.கூடுமானவரையில் மனம் அதனைத் தள்ளித் தள்ளி வைத்துக் கொண்டே போகும்.எனது சிறுகதைகளை முழுவதுமாக தொகுப்பதற்கு பதிப்பாளர் ஒத்துக்கொண்டு அவசரப்படுத்திய பின்னரும் கூட மூன்று ஆண்டுகள் கடந்து சென்று கொண்டிருக்கின்றன.முதலில் தட்டச்சு செய்தவை கணினியில் பழுதடைந்தன.பின்னர் இரண்டாவது முறையாக தட்டச்சு நடைபெற்றது.இப்போது நான் அதனை முழுவதுமாக திருத்தம் செய்து முடித்தால் காரியம் வடிவுக்கு வந்து விடும்.ஒருமாத காலத்தை எடுத்துக் கொள்கிற பணி அது.அந்த ஒரு மாத காலத்தை என்னிலிருந்து பிடுங்கியெடுப்பது கடினமாக இருக்கிறது.அப்படி காலமே கிடைக்காத அளவிற்கு நான் பிடுங்குகிற வேலைகள் எதனையும் செய்து கொண்டும் இருக்கவில்லை.

வெகுகாலமாக அதாவது சிறு பிராயத்திலிருந்தே என்னை ஒரு பழக்கம் பற்றியிருந்தது.எங்கு புறப்பட்டாலும் அவசரமாகத் தான் கிளம்புவேன்.எனக்காக யாரும் செல்ல வேண்டிய இடத்தில் ஆராத்தியெடுத்துக் காத்திருக்கவில்லை.சரியான நேரத்திற்கு அங்கு சென்றாக வேண்டும் என எனக்கு எந்த நிர்பந்தங்களும் கிடையாது.ஆனால் கடலைக் குடித்து விட்டு வருகிற அவசரததோடுதான் போக்குவரத்து சிக்னல்களில் நின்று பரபரப்பேன்.இப்படியிருக்கிறேன் என்பதனை நெடுங்காலத்திற்குப் பிறகுதான் எனக்கு உணரமுடிந்தது.நமக்குத்தான் ஒரு வேலையும் கிடையாதே ஏன் இப்படி பறந்து கொண்டிருக்கிறோம் ?.ரயில் வண்டியைப் பிடிக்கப் போகிறவனை போல ? எப்போதோ பள்ளிக்கூடங்களில் உருவாக்கிய பழக்கம் நம்மையும் அறியாமல் நம்மில் புதைந்திருக்கும் .பள்ளிக் கூடங்களில் இருந்து நமது தலையில் ஏறி அமர்ந்திருப்பவை இதுபோல ,   இப்படி எத்தனையோ ! இப்போது புறப்படும் போது ரயில் வண்டியை பிடிப்பதற்கு கூட ரயில் வண்டியை பிடிக்கக் கிளம்புவது போல கிளம்புவதில்லை.

ஒரு மாதத்தை என்னுடைய நூலுக்கே தர இயலாத அளவிற்கு எனக்கு விஷேச பணியொன்றும் கிடையாது.எலிக்கு வேலையும் இல்லை இருந்து பிழைக்க நேரமும் இல்லை என்பதனை போன்றே என்னுடைய தன் காரியங்கள். என்றாலும் என்னை முன்னிட்டு  அந்த ஒரு மாத காலத்தைக் கோரி நிற்பது என்னுடைய தன்  வேலை என்பதுதான் காரணம்.எனது சோம்பலை மெச்ச இதில் ஒன்றுமே கிடையாது.இத்தகைய சோம்பல் மெச்சும் படியானதும் இல்லை.இயலாமை இது.கேட்பவரே கவிதைத் தொகுப்பில் இறுதி பிழை திருத்தத்தில் நான் கொண்டிருந்த சோம்பேறித்தனம் இப்போது தொகுப்பில் பிழைகளைக் காண வெட்கமாக இருக்கிறது

தொகுப்பும் ,பிழை திருத்துதலையும் போன்று சோர்வூட்டும் பணி எனக்கு வேறில்லை.

இந்த தொகுப்பிற்கான கவிதைகள் அனைத்துமே முகநூலிலும் ,என்னுடைய பிளாக்கிலும் உள்ளன .இப்பணியை சோர்வூட்டாததாகக் கருதும் நண்பர்கள் யாரேனும் இருந்தால் அவர்கள் இந்த தொகுக்கும் வேலையில் எனக்கு உதவ முடியும்.கேட்பவரே தொகுப்பில் நான்கோ ஐந்தோ கவிதைகள் இடம்பெற்றிருக்கின்றன .போக மீதி அனைத்துமே இந்த தொகுப்பிற்கானவை தான்.அத்தனையும் சேர்த்தே தொகுப்பவர் எனக்கு  அனுப்பி விடலாம்.முதலில் கவிதை தொகுப்பு வேலையே அவசரம். கவிதைகள்  போக   முகநூலில் நான் எழுதியிருப்பவற்றை தொகுத்துக் கேட்கிறார்கள்.அதனையும் எவரேனும் செய்து தர முடிந்தால் கோடி நமஸ்காரம் 

அனுப்புவோருக்கான முகவரி
slatepublications@gmail .com

ஆர்.கே நகர் தேர்தலை தி.மு.க பின்னடைவாகக் கருத வேண்டியதில்லை

ஆர்.கே நகர் தேர்தலை தி.மு.க பின்னடைவாகக் கருத வேண்டியதில்லை.

ஆனால்  நிலைப்பாடுகளை உறுதியாக எடுக்க முடியாதவர் ஸ்டாலின் என்கிற மக்கள் கருத்தை தி.மு.க மாற்றிக் கொள்ள வேண்டியது அவசியம்.போராட்டங்கள்,கொள்கை நிலைப்பாடுகள் என்று அனைத்தையுமே தி.மு.க சடங்காக மாற்றி வைத்திருக்கிறது என்று மக்கள் கருதுகிறார்கள்.இரட்டை நிலைப்பாடுகள் மூலம் மக்களை ஏமாற்றுவதை தி,மு.க மாற்றியமைத்துக் கொள்ளவில்லையானால் வருகிற சட்ட மன்ற தேர்தலிலும் ,அனைத்தும் சாதகமாக இருந்தாலும் கூட தி.மு.க தோல்வியடையப்போவது உறுதி.கழிந்த  தேர்தலில் ஏற்பட்ட கசப்பான அனுபவம் மீண்டும் அவர்களுக்கு ஏற்படும்.

நீங்கள் என்ன கொள்கையைக் கொண்டிருக்கிறீர்கள் ,நீங்கள் யார் என்பது எதனையும் மக்கள் இப்போது  கணக்கில் கொள்வதில்லை  .நீங்கள் எப்படி செயல்படுவீர்கள் ,என்ன செய்வீர்கள் என்பதை மட்டுமே மக்கள் எதிர்பார்க்கிறார்கள்.தி.மு.க சமீபகாலங்களில் மக்களுக்காக பொய்யான ஒரு நிலைப்பாடும் ,மத்தியில் ஏற்பட வேண்டிய சமரசத்திற்காக மாற்று நிலைப்பாடும் என இரட்டை நிலைப்பாடுகளை எடுத்துக் கொண்டிருக்கிறது.இதனை மக்கள் அறியமாட்டார்கள் என அவர்கள் கருதிக் கொண்டிருக்கிறார்கள்.அவர்கள் ஆழப் புதைந்துள்ள புதைகுழி இதுதான்.மக்கள் எல்லாவற்றையும் வெளிப்படையாக அறியும் திறன் பெற்றவர்கள்.

நீட் எதிர்ப்பிலிருந்து பலவற்றையும் தி,மு.க சடங்காக பாவிக்கிறது என்னும் எண்ணம் மக்களிடம் ஆழமாக வலுப்பட்டிருக்கிறது.ஒரு பிரச்சனையில் ஒரு நிலைப்பாடு எடுத்து போராடும் போது,அதில் சிறந்த முடிவினை எட்டும் வரையில் பிரச்சனையைக் கைவிடக் கூடாது.இதையெல்லாம் விட்டு விட்டாலும் கூட தி,மு.க உண்மையாக இருதய சுத்தியுடன் மக்களின் பக்கம் நிற்க வேண்டும்.இல்லையெனில் நிற்கிறாரோ ,இல்லையோ நிற்பார் என எதிர்பார்ப்பவர்களை மக்கள் தேர்ந்து எடுத்து விடக் கூடும்.வரும் தேர்தலிலும் தி.மு.க வாய்ப்பை இழக்குமெனில் பின்னர் கொடி பிடித்து கோயில் வைத்து மீண்டு வர வெகுகாலம் ஆகும்.

காலம் ,மனம் என எல்லாமே மாறிக் கொண்டிருக்கின்றன.அறிந்து கொண்டால் சரிதான்.

TTV தினகரனின் வெற்றி தமிழ் மனம் ஈட்டித் தந்திருக்கும் மாபெரும் வெற்றி

TTV தினகரனின் வெற்றி தமிழ் மனம் ஈட்டித் தந்திருக்கும்  மாபெரும் வெற்றி


இவ்வெற்றி சாமானியமானதில்லை.தமிழ் மனம் தனது சுயதன்மையை இந்த வெற்றி மூலம் பிரகடனம் செய்திருக்கிறது என்று சொல்லலாம்.அந்த அளவிற்கு இது முக்கியத்துவம் கொண்டதொரு வெற்றி.இந்த தேர்தல் வெற்றி தமிழ் மனோபாவத்திற்கு எதிராக சிந்திக்கும் ,ஏளனம் செய்யும் ஊடகங்கள்,அறிஞர்கள் ,தேசிய அரசியலின் மனோபாவ அடிமைகள் அனைவருக்கும் சிறந்த பாடத்தை ஏற்படுத்தியிருக்கும் வெற்றி.

இரண்டு அரசாங்கங்கள் இந்த வெற்றிக்கு எதிராக முழுமையாக  பாடுபட்டிருக்கின்றன.ஊடகங்கள் துணை புரிந்திருக்கின்றன.அரசின் அமைப்புகள் முழு வீச்சில் பயன்படுத்தப்பட்டிருக்கின்றன .ஏராளமான சதிவேலைகள். இவை அனைத்தையும் தாண்டி , மக்கள் அனைத்து விதமான அதிகாரத்தின் சதிகளையும் தாண்டி , மக்கள் இந்த வெற்றியை ஈட்டியிருக்கிறார்கள்.இது மக்களுக்கான வெற்றி என்பதுதான் இதன் சிறப்பம்சம் .சதி வேலைகள்,அதிகார பலம் அனைத்தையும் மெளனமாக தங்கள் ஜனநாயக பூர்வமான வாய்ப்பின் மூலம் உடைத்து நொறுக்கியிருக்கிறார்கள் மக்கள். இந்த தேர்தல் முடக்கப்பட்டு மீண்டும் கிடைத்த வாய்ப்பின் மூலம்  மக்கள் சாதித்திருக்கிறார்கள் .

இந்த வெற்றியை கொச்சைப்படுத்துபவர்கள் ,சிறுமைப்படுத்துபவர்கள் அனைவரும் ஜனநாயகத்திற்கு எதிராக மாபெரும் தவறினை இழைக்கிறார்கள்.மக்கள் எப்போதுமே சரியாகவே இருக்கிறார்கள்.ஒருவேளை நமக்குத் பிடித்தவர்கள்  தோல்வியுற்றாலும் கூட. அதிகாரமும் ,சதி திட்டங்களும்  விரும்புபவர்களை மக்கள் ஏன் புறக்கணிக்கிறார்கள் என்பதனை அறிந்து கொள்ள இயலாதவர்களுக்கு ஜனநாயகத்தின் சரியான அர்த்தம் விளங்கவில்லை என்பதே பொருள்.

மக்கள் பணத்திற்காக யாரை வேண்டுமாயினும் தேர்வு செய்வார்கள் எனில் பிரபல தொழிலதிபர்களையெல்லாம் தேர்தலில் நின்று ஒரு தொகுதியிலேனும் வெற்றி பெறச் செய்து பாருங்கள் தெரியும்,நீங்கள் கொண்டுள்ள கருத்து உருவாக்கப்பட்டது ,தவறானது என்பது...

இந்த வெற்றி பல எதிர்கால ஆருடங்களுக்கும் வாய்ப்புள்ள வெற்றிதான்.எனினும் இப்போது நான் ஆருடத்திற்குள் செல்ல விரும்பவில்லை.வென்றுகள் இருந்து பார்க்கத் தானே போகிறீர்கள்.

மக்களைப் பற்றிய தவறான பார்வை அகலாத வரையில் மக்களை பற்றி உங்களால் புரிந்து கொள்ளவே முடியாது.மக்கள் சரியான முடிவுகளை எடுக்கிறார்கள் ; நீங்கள் எப்படி தவறாக இருக்கிறீர்கள் அல்லது சிந்திக்கிறீர்கள் என்பதனை புரிந்து  கொள்ள முயலுங்கள் சிறுது வெளிச்சமேனும் அகப்படலாம்..

தினகரனுக்கு என்னுடைய மனமார்ந்த நல்வாழ்த்துகள்

இன்குலாப் மிகச் சிறந்த மனிதர் ஆனால் இலக்கிய மதிப்பற்றவர்

இன்குலாப் மிகச் சிறந்த மனிதர் ஆனால் இலக்கிய மதிப்பற்றவர்

உயர்ந்த வாழ்க்கையை வாழ்ந்தவர்.மிக உயர்ந்த லட்சியங்களைக் கொண்டிருந்தவர் .வாசகர்களிடமும் ,இலக்கியவாதிகளிடம் அவர் பெற்றிருந்த செல்வாக்கைக் காட்டிலும் அரசியல்வாதிகளிடம் அவர் பெற்றிருந்த செல்வாக்கே அதிகம். மற்றபடி இன்குலாப்பின் எழுத்துக்கள் உயர்ந்தவொரு மனிதனின் உயரிய நல்லெண்ணங்களே அன்றி அவற்றிற்கு இலக்கிய மதிப்பு எதுவுமே கிடையாது.இலக்கியத்திற்கான விருதுகள் இலக்கியத்திற்காக ,எழுத்துக்களின் இலக்கிய மதிப்பிற்காக வழங்கப்படுதல் வேண்டுமே அல்லாது பிற காரணங்களுக்காக வழங்கப்படுதல் கூடாது.

நமது சூழலில் அரசியல்வாதிகளே அல்லது அரசியல் தரப்பினரே பெரும்பாலும் இலக்கியத்தின் பெறுமதியைத் தீர்மானிக்கும் நிலையில் இருக்கிறார்கள்.இது நல்லதல்ல.அவர்களிடமிருந்து பறித்து சில நேரங்களின் பெறுமதிகள் இலக்கியத்தின் கரங்களை வந்தடைய போராட வேண்டியிருக்கிறது.இலக்கிய விருதுகளை இலக்கிய வாசகர்களும் , இலக்கியத்தின் தரப்புகளும் முடிவு செய்யவேண்டும்.அது முதற்கொண்டுதான் நாம் ஒரு நாகரீக சமூகத்தைச் சேர்ந்தவர்கள் என்பது உறுதியாகும்.நல்ல மனிதர் தாமே இருக்கட்டுமே என்றால் இலக்கியத்திற்கான விருது அது என்பதனை மாற்றி இவையெல்லாம்  நல்ல மனிதர்களுக்கானவை தலையிடாதீர்கள் என்றேனும் மாற்றிக் கொள்ளவேண்டும்.குழந்தைகளுக்கான புட்டிப் பாலையெடுத்து பெரியவர்கள் அருந்துவதற்கு ஒப்பானவை இத்தகைய செயல்கள் .விக்ரமாதித்யன் போன்ற பெருங்கவிகள் வாழ்ந்து கொண்டிருக்கும் ஒரு மொழியில் இது போன்று நடைபெறுவது சிறுபிள்ளைத்தனமானது.பாரதி இருக்கும் சபையில் சௌந்தர கைலாசத்தை முன்வைப்பதை விடவும் குன்றிய செயல் இது.

சாகித்ய அகாதமியின் தேர்வுக் குழுவினர் யார் என்பதில் வெளிப்படைத்தன்மை அவசியம்.அது இதுவரையில் அணுசக்தித் துறை போல மறைவாக செயல்பாட்டுக்கு கொண்டிருக்கிறது. அவர்கள் பல்கலை தரப்பினரில் இருந்தும் கல்விப்புலத்தில் இருந்தும் விடுபடவேண்டும் .இல்லையெனில்  தொடர்ந்து குறை சொல்லிக் கொண்டே இருக்க வேண்டியதுதான்.நமது பல்கலைக் பின்னணி முழுதுமே அரசியல் காரணிகளால் அமைந்தது.அவர்களின் தலையீடு பண்பாட்டு அமைப்புகளிடம் இருக்கும் வரையில் தமிழ்நாட்டில் அது சரியாக நடைபெறும் என்பதற்கு உத்திரவாதங்களே கிடையாது. மற்றபடி எனக்கு இன்குலாப் மீது மதிப்புக் குறைபாடெல்லாம் ஏதுமில்லை.

புயலுக்கும் மழைக்கும் வேற்றுமையில்லை

புயலுக்கும் மழைக்கும் வேற்றுமையில்லை

மனித துயரங்களிலும் வேற்றுமையில்லை.
துயரங்களை முன்வைத்து பேத அரசியலை முன்னெடுப்பது நல்ல நெறியல்ல.பேதங்களையும் பிளவுகளையும் பொதுமக்கள் ஒருபோதும் முன்னெடுப்பதில்லை.அவர்கள் தங்கள் அன்றாடம் சகஜ நிலைக்குத் திரும்புவதையே காத்திருக்கிறார்கள்.விஷமிகளுக்கு  வேறுவகையான உணவுகள் தேவைப்படுகின்றன.

கன்னியாகுமரி மாவட்டத்தில்  ஏற்பட்ட ஓகி  புயல் பாதிப்புகள் மீனவ சொந்தங்களுக்கு ஏற்படுத்திய துயர் ,உயிரிழப்புகளையும் உள்ளடக்கியது.பொருட்சேதங்களைக் காட்டிலும்  உயிர் சேதமும்,இழப்பும் கொடியது. அத்துடன் அவர்கள் கோடிக்கணக்கான மதிப்புகள் கொண்ட படகுகள் ,வலைகள் ,பிற உபகரணங்கள் என சகலத்தையும் இழந்திருக்கிறார்கள்.பல்முனைப் போராட்டங்களுக்குப்  பிறகு அரசு எந்திரம் அவர்களை முன்னிட்டு லேசாக அசையத் தொடங்கி இருக்கிறது.சற்றே ஆறுதல் தருகிற காரியம் இது.

இதுபோலவே நிலப்பகுதியில் ஏற்பட்ட உயிர் சேதமும் ,பொருட்சேதமும் கேலி செய்வதற்கு உரியன அல்ல.நிலமுள்ள விவசாயிகளுக்கு ஏதேனும் ஆறுதலுக்கான நிவாரணங்களேனும் கிடைக்க வாய்ப்புண்டு.இவர்கள் பொருளாதார நிலையில் படகில் மீன்பிடிக்கும் கோடீஸ்வரர்களுடன் ஒப்பு நோக்கத் தகுந்தவர்கள்.ஆனால் நிலமற்ற விவசாயிகள் ,அன்றாடம் மீன் விற்கச் செல்லுகிற ஏழை மீனவ தாய்மார்களை போன்ற ஏழைகள்.இவர்கள் இழந்தது இழந்ததுதான்.அதற்கு புள்ளிவிபரங்களோ ,கணக்குகளோ கிடையாது.அரசாங்க அறிவிப்புகள் இரண்டு தரப்பிலும் பணக்காரர்களின் பக்கமாகவே நிற்கிறதே அன்றி ஏழைகள் இரண்டு  தரப்பிலும் புறக்கணிக்கப்படுகிறார்கள்.மரச்சீனி பயிரிட்டவன் ,அடுத்தவனின் நிலத்தில் பாட்டத்திற்கு வாழை பயிரிட்டவர்கள் எல்லோரும் வட்டிக்கு கடன் வாங்கியிருப்பார்கள் ,நகைகளை அடமானம் செய்திருப்பார்கள்.இவர்களுக்கு ஒரு பதிலும் கிடையாது.விவசாய நகைக் கடன்களை  தள்ளுபடி செய்தால் மட்டுமே இவர்களுக்கு சிறிய ஆறுதல் உண்டாகும்.இவற்றை இன்னும் யவரும் பேசவே தொடங்கவில்லை.மொத்தத்தில் இவையெல்லாமே தானாகவே ஒரு நாகரீக சமூகத்தில் நடக்க வேண்டியவை.ஆனால் ஒவ்வொன்றிற்கும் போராட வேண்டியிருப்பது துயரத்திலும் பெருந்துயரம்.

புறக்கணிப்பிற்குள்ளாபவர்களுக்கு தங்கள் புறக்கணிப்பின் நிமித்தம் போராடுவதற்கான உரிமை உண்டு. கரையிலுள்ளவர்கள் தங்கள் குடிநீர் , மின்சாரம் போன்ற அடிப்படை தேவைகளுக்காக ஆங்காங்கே குட்டிக் குட்டியாக ஏராளமான சாலை மறியல்கள் செய்ய வேண்டியிருந்தது. இடரின் போது சாய்ந்த  மரங்களை வெட்டியகற்றவும், தெருக்களை சுத்தம் செய்யவும் வந்த  வழிப்பறி கும்பல்களிடம் சரணடைய வேண்டியிருந்தது.ஒவ்வொரு பொது இடரின் போதும் இவ்வண்ணமான வழிபறியாளர்களும்  உதிக்கிறார்கள்.மரங்களை வெட்டியக்கற்ற கணக்கற்ற கூலியை அவர்கள் பொது மக்களிடமிருந்து பறித்து எடுத்தார்கள்.இழப்பு ஒரு பக்கமெனில் இதுபோன்ற அத்யாவசியமான செலவீனங்கள் மறுபக்கம்.ஊடகங்களின் கண்கள் இவற்றின் பேரில் திரளவில்லை.இவற்றில் செய்திக்குண்டான கவர்ச்சி ஏதும் கிடையாது என்பதும் காரணம்.

இன்று இந்த மக்கள் சார்பான போராட்டங்கள் பந்த் ஆக உருவெடுத்திருக்கிறது.இது அனைத்து கட்சி பந்த் கூட .பா.ஜ .கவின் தமிழக கிளை ஆட்சியினர் தவிர்த்து பிற கட்சிகள் அனைவருமே இந்த போராட்டத்தில் பங்கு பெறுகிறார்கள்.  ஒருவேளை மீனவ நண்பர்களில் ஒருசிலர் ஆதங்கப்படுவதை போல பா.ஜ.கவே கூட இந்த பந்தின் பின்னணியில் இருப்பதாகவே கருதுவோம்.பாதிக்கப்பட்ட மக்களுக்காக யார் பின்னணியின் இருந்தால் என்ன ? மீனவ போராட்டங்கள் நடைபெற்ற போது ஏளனம் செய்த பா.ஜ.கவினரின் சில அருவருக்கத் தக்க செயல்களை எல்லோரும்தான் பார்த்துக் கொண்டிருந்தோம்.நிலப்பகுதியில் போராடுபவர்களை பற்றிய உங்களுடைய தற்போதைய ஏளனமும் அதனைப் போன்றே உள்ளன.போராட்டங்கள் எவ்வாறு நடைபெற வேண்டும் ? என்ற பேராலோசனைகளை தற்சமயம் யாரும் புகட்டாமலிருப்பதே சிறந்தது.மீனவ எதிர்ப்பு மனோபாவம் சரியானதில்லை .அது போலவே நாடார் எதிர்ப்பு மனோபாவமும் நேர்மையானதில்லை.இருவருமே சேர்ந்திருக்க வேண்டியவர்கள்.சார்ந்திருக்கவும் வேண்டியவர்கள்.

இறப்பிலும் ,நிவாரணத்திலும் ஒரே ஊரில் இருவேறு வகை என்பதனை மக்கள் கேட்க மாட்டார்களா  என்ன ? நான் என்னுடைய உரிமையை கேட்ட வரையில் சரி.பிறர் கேட்கக் கூடாது என்பது என்ன நியாயம் ?

நீதிக் கதை ஒன்றுண்டு.அய்யா தன் கண்களில் ஒன்றை எதிரி குத்திக் கெடுத்து விட்டான்.எதிரிக்குத் தண்டனை வழங்குங்கள் என கேட்டு நீதிபதியிடம் ஒருவன் வந்தான்.எல்லோரும் அவசரமாக அனுதாபத்தில் தண்டனையை அறிவியுங்கள் என்றார்கள்.சற்றே பொறுத்திருங்கள் என்ற நீதிபதி "  இவனால் இரண்டு கண்களையும் இழந்தவனாக எதிரி இருக்கவும் வாய்ப்புண்டு என்றார்.இது கதையென்றாலும் தன் தரப்பு மட்டுமே சிறப்பானது ,பிற எல்லாமே குறைபாடுடையது எனும் நோக்கு மிகவும் ஆபத்தானது.

நோக்கம் கொண்டு இயங்குபவர்கள் துயரங்களையும் மக்களை  பிளவு படுத்துவதற்கான வாய்ப்பாக பயன்படுத்துவது மிகவும் சங்கடம் .அனைத்து தரப்பிலும்  இருதய சுத்தியே அடிப்படை  தேவை.

foto - Remesh Kumar 

அது என்ன செத்துத் தொலைத்தால் வீர வணக்கம் ?

அது என்ன செத்துத் தொலைத்தால் வீர வணக்கம் ?

1

நானொரு பொறிக்குள் வசிக்கிறேன்
அதன் கண்ணிகளை வாயிற் கதவுகளாக ஆக்கிக் கொண்டேன்
சரளமாக அதனுள் செல்வதும் வருவதும் என
எனக்கது இப்போது பொறியெனப் படவில்லை
அதற்கும் எனக்கான பொறியது என்பது
மறந்து போயிற்று

இன்று பொறிக்குள்ளிருந்து வெளியே வந்து
பொறிக்கான பொறியொன்றை வாங்கி
பொறிக்குள் திரும்பினேன்
அதனை மேஜையாக்கி அதன் மீது சில வார்த்தைகளை வைத்தேன்

வெளியில் நின்றொருவன் மதுக்குவளையுடன்
பொறிக்குள்ளிருக்கிறாய் தெரியவில்லையா உனக்கு என
கத்திக் கொண்டிருந்தான்

மேஜையிலிருந்த வார்த்தைகள் இதுவொரு கனவென்பது உனக்கு விளங்கவில்லையா?
என்று கேள்வி கேட்கின்றன
அவனை நோக்கி

2

அந்தக் குழந்தை
நான்கு வழிச் சாலையில்
ரத்தத் தடயங்களுடன்
முகத்தை வானுக்கு உயர்த்திய வண்ணம்
நிலைகுத்திக் கிடக்கிறது

சுற்றி இருபக்கமும் வாகனங்கள்
சிதறிய வாகனத்தில் பேச்சுமூச்சில்லை

தன்மடியில் குழந்தையை
கை கொண்டு
அரவணைத்து உடல் திருப்பிய
பெருஞ்சாலை கேட்கிறது
இதற்கு யார் பொறுப்பேற்கப் போகிறீர்கள் ?

குழந்தையின் கண்கள்
கடைசியாகக் கண்ட காட்சி
அப்படியே
அந்த இடத்தில்
படிந்து நிற்பதை
உற்று நோக்கிக் கொண்டிருக்கிறார்கள்
அனைவரும்

அந்த குழந்தையின் கண்களிலிருந்து
சற்றைக்கு முன்
வெளிவந்த காட்சிதான் அது
சந்தேகமேயில்லை

3

நானொரு முட்டாள்
அதற்கு குறைவில்லாத முட்டாளாக நீ இருக்கவேண்டும்
என்பதென் எதிர்பார்ப்பு

நானொரு அடிமுட்டாள்
அதற்கிணையான அடிமுட்டாளாக நீ இருந்தால்
உன்மீது ஆசை கொள்வேன்

நீ ஞானத்தை எடுத்துக் கொண்டு என்னிடம் வந்தால்
அந்த ஞானத்தைக் கொண்டேயுன்
கபாலம் உடைப்பேன்

எனது பிச்சைப்பாத்திரத்தை நான்
வேதாளத்தின் கைகளில் கொடுத்து வைத்திருப்பதும்
குற்றங்களில் தெய்வங்களுக்கு அணிகலன்கள் செய்து வைத்திருப்பதும் நீ
அறியாதவை

நீ சபிக்க உச்சரிக்கிற வார்த்தைகளையெடுத்து
அருள்மழை பொழிபவள்
எப்போதுமென்
காவல் தேவதை

4

எதிரியைப் பற்றி கேட்டதும்
வாந்திவருகிற மாதிரியான சித்திரத்தை
முதலில் ஏற்படுத்த வேண்டும்
நமது சித்திரமும் அவ்வாறானதுதான் என்பதை
முற்றிலுமாக
மறந்து விடவேண்டும்

சித்திரத்தை ஏற்படுத்தும் போது
நினைக்கும் போதே அது ஏற்படுவது வரையில்
நமக்கு பணி அதிகம் உண்டு
யாருமே கேட்க வரக்கூடாது
தப்பி
வருபவர்களுக்கு
வாந்தி வருவது போல
தோன்ற வேண்டும்

அப்படி தோன்றவில்லையெனில்
நீங்கள் செய்த சித்திரம்
சரியில்லை
என்றாகும்

நான் சொல்லிக் கொண்டிருப்பது
ஒரு போர் யுக்தி
விளையாடத் தொடங்கி விட்டால்
இது நல்ல விளையாட்டும் கூட

சுழற்சி மறுபக்கம் திரும்பி
சித்திரம் நமக்குண்டாகும் போதும்
அலுப்பு ஏற்படுவதே இல்லை

இப்போதே போரை அல்லது விளையாட்டை
எப்படி பாவித்தாலும் சரிதான்
தொடங்கிப் பாருங்கள்
உங்களுக்கே விளங்கும்
பின்
தித்திக்கும்
தித்திக்கும்

5

அது என்ன செத்துத் தொலைத்தால் வீர வணக்கம் ?

அது என்ன சாராயம் விற்ற காசில்
பள்ளிக்கூடம் திறந்தால்
கல்வித் தந்தை ?
பாடல் எழுதினால் எப்படி
கவியரசு
கவிதை கை வரவில்லையெனில்
எப்படி
கவிக்கோ

ஒன்றுக்கும் உதவாதவன்
தமிழ்நாட்டிற்கு முதல்வர்
ஊர் சண்டி
வார்டு கவுன்சிலர்
மணல்வியாபாரி நடத்துகிறான்
மக்கள் டீவி
விவாதம் நடத்துகிறார்கள்
கத்திக் கொண்டேயிருக்கிறார்கள்
அறம் போதிக்கிறார்கள்
சல்லிப்பயல்கள்
மதபோதகர்கள்

சாமி சரணம்
சாமி சரணம்
சாமியே சரணம்
கைவிடப்பட்டவன்
வீட்டிலமர்ந்து
பழங்கஞ்சி குடிக்கிறாள்
அம்மை உமை

கேட்பவரே" கவிதைத் தொகுப்பு பற்றி கவிஞர் ராஜன் ஆத்தியப்பன்

"கேட்பவரே" கவிதைத் தொகுப்பு பற்றி கவிஞர் ராஜன் ஆத்தியப்பன்

[ கேட்பவரே என்னுடைய நான்கு கவிதை நூல்களின் தொகுப்பு  .படிகம் வெளியீடு.பக்கம் 320  விலை - 320 .இந்த கவிதை நூல் தேவைப்படுபவர்கள் கீழ்கண்ட முகவரியில் தொடர்பு கொள்ளுங்கள் .மதிப்புரைக்காக கவிஞர் ராஜன் ஆத்தியப்பனுக்கு நன்றி

கேட்பவரே
ஆசிரியர் - லக்ஷ்மி மணிவண்ணன்
படிகம் வெளியீடு 4 -184  தெற்கு தெரு ,மாடத்தட்டு விளை,வில்லுக்குறி அஞ்சல் ,கன்னியாகுமரி மாவட்டம் ,தமிழ்நாடு - 629  180   தொலைபேசி எண் - 98408  48681 ] 

அங்கீகரிக்கப்படாத கனவின் வலி நிறைந்த இடமாக படைப்பாளி இருக்கிறான்.
- சி.மோகன்

இசைப் பாடல்களுக்கு ஒரு மாய வல்லமையுண்டு. சொற்களை அதன் அர்த்தத்திலிருந்து வெளியேற்றுகிறது அது என்பதே . எனது பால்யம் இசையை பிரதான சுகஉணர்ச்சியாய் ஏற்றிருந்தது. அதிகாலையில் எங்கள் வீட்டில் ஒலிக்கும் கொழும்பு சர்வதேச வானொலியின் பாடல்களில் அய்யா பல் துலக்கும்போது அல்லது சுய சவரம் செய்யும்போது ஏதேனுமொரு பாடலின் வரியில் எனது விழிப்பு நிகழும்.விழிப்பின் சற்று முன்பிருந்தே பாடல் எனக்குள் துலங்கத் துவங்கியிருக்கும்.

நான் மனதிலெண்ணிய பாடல்தான் வெளியிலும் ஒலிக்கிறது என்று பிள்ளை மனதில் கொண்டாடியிருக்கிறேன். பாடல்களின் பொருள் தேவைப்படுவதில்லை. காலையில் கேட்கும் கானம் அன்றைய நாளில் : நாளகற்றும் சக்கரமாய் மாறும். அனிச்சையில் முட்டித்ததும்பும் அப்பாடல் என்னை வித்தைக்காரனைப்போல் வளைத்துப்பிடிக்க ஓயாமல் பாடிக்கொண்டேயிருப்பேன். பல பாடல்கள் ஒன்றிரண்டு நாட்களும் நீள்வதுண்டு.
என் அய்யா(தந்தை) இறப்பதற்கு இரண்டொரு நாளைக்குமுன் மருத்துவமனையின் அருகிலிருந்த தேநீர் கடையில் மண்வாசனைப் படத்தில் வரும்
'பொத்தி வச்ச மல்லிகை மொட்டு' என்ற பாடலைக்கேட்டேன். இசைச்சுழிக்குள் மனமிழந்து ஓய்ந்த பாடலை இனி எங்கேயாவது கேட்கமுடியுமா எனத் தவிப்பாகிவிட்டது.

அந்த சபிக்கப்பட்ட நாளில் பூவும் பத்தியும் ஒப்பாரிகளினூடே கசங்கிய வாசனையில் பரவ : அழத்தெரியாது நின்ற எனது பத்து வயதிற்குள் மரக்கிளையிலிருந்து அவிழ்ந்து வரும் நாகமென அந்தப்பாடல் தீண்டத் தொடங்கியது.இரண்டொருமுறை லேசாக முனகவும் செய்தேன். இப்போது அப்பாடலைக் கேட்கும்போதும் எனது தந்தையின் சலனமற்ற உடல்தான் தோன்றுகிறது. சட்டென எனது இளமையைச் சுருக்கிய பாண்ட்ஸ் பௌடர் நாற்றம் சூழலில் வியாபிக்கிறது.

பாருங்கள் ! அர்த்தம் தலைகீழாகிவிட்டது. இரண்டும் வேறுவேறு பக்கங்கள்.எனக்கென்றில்லை சிலருக்கு அது குழந்தைப்பேறொன்றை நினைவூட்டலாம்.சிலருக்கு ஒரு நம்பிக்கைத் துரோகமாயிருக்கலாம். பெருந்தோல்வியில் அப்பாடல் இசையுறலாம். நேரடித் தன்மையிலும் கேட்கப்பெறலாம்.இசையின் தன்மை வேறோர் சுவையில்  வாழ்வியலாவதுபோல் கவிதையின் கலைஉச்சமும் வேறுவேறு ஞாபகங்களில் மேலெழக்கூடியதுதான்.அத்தகைய கவிதைகளில் இசையாலான வனநதியொன்று ஓடுகிறது. நாம் கரையிலிருந்து பார்க்கும் நதி உள்ளே
குதித்து குடைந்தாடுகையில் இன்னொன்றாய் பரிணமிக்கிறது. அது வேகம் உந்தி நம்மை அடித்துச் செல்லலாம்.இரக்கப்பட்டு விட்டுவிடலாம்
அல்லது அழகிய மீன்களைக் காட்டித் தரலாம்.பெரிய மீன்கள் விழுங்கும் சிறிய மீன்களை அனுதாபமுறலாம்.அடியாழத்தின் கூழாங்கற்களில் தனது புராதனத்தை விளக்கலாம்.மூழ்கி எழுகையில் பிரேதமொன்றை முட்டச் செய்யலாம்.கரையேறுவதற்குமுன் ஒருவேளை நதியே இல்லாமலாகலாம்.

விளிச் சொல்லான 'கேட்பவரே' என்ற
லக்ஷ்மி  மணிவண்ணனின் இதுவரையிலான கவிதைகளின் மொத்தத் தொகுப்பு மேற்சொன்ன பல்வேறு மனத்தீண்டலைச் சாத்தியமாக்கும் தன்மையிலானது.

லக்ஷ்மி  மணிவண்ணனின் பல கவிதைகளின் தொடக்க வாசிப்பின் போது எனக்குள் கவர்ச்சிகரமான தோல்வி ஆச்சரியத்தோடும் அவஸ்த்தையோடும் தன்னைப் பதிவு செய்து திசைகளின் எல்லாப் பக்கங்களிலும் முட்டித் தவிப்பதுவாய் உணர்ந்தேன். கவிதைகளில் ஆசிரியன் நிகழ்த்தும் பல்வேறு சாத்தியங்களை அறியமுடியாத ரூபவடிவிலான அவ்வாசிப்பில் மழைமூண்ட வெளியின் அப்பால் அசையும் பூடக வடிவங்களைக் காண்பது போலிருந்தது. எனினும் ஒரு வினோத ஜந்துவையோ தழும்பேறி அருவருப்பூட்டும் முகத்தையோ நேரிடும் கணம் முகஞ்சுழித்தாலும் ஆர்வம் உந்த மீண்டும் மீண்டும் திரும்பிப் பார்ப்பதுபோல் குறிப்பிட்ட கவிதைகளை நோக்கி ஒருக்களித்துக்கிடக்கும் மனம்.
அருவருப்பு என்பது பழக்கத்திற்கு முந்தய நிலை. உபயோகத்திற்கான தோற்ற ஒழுங்கை தனது தேவைசார்ந்து மனம் படைத்துப் பழகுகிறது. ஒரு தோற்ற ஒழுங்கு இன்னொரு தோற்ற ஒழுங்கின்  கலைக்கப்பட்ட வடிவமாக இருக்கிறது. லக்ஷ்மி  மணிவண்ணனின் கவிதைகளில்
இவை ஆதாரப் பிரச்சினைகளாகின்றன.

நிறுவப்பட்ட முடிவுகளைக் கீறித் துளைப்பதுவாகவும் , முடிவுகளிலிருந்து குருக்கும் இழைகள் முடிவுகளைப் பராமரிக்க முடியாதிருப்பதாகவும் முடிவற்ற தன்மையிலிருந்து கிளைக்கும் ராட்சத விருட்சங்களாகவும் பல கவிதைகள்.

நெஞ்சை உலைக்கும் விபத்தோ இயற்கைப் பேரிடரோ நிகழ்ந்துவிட்டால் சட்டென அம்பது அறுபது கவிஞர்கள் உபரியாகத் தோன்றிவிடுகிறார்கள். ஆளுக்கொரு ஸ்பிரே பெயின்ட் டப்பாவைக் கையிலெடுத்துக் கொண்டு ஒரே மாதிரி நிறங்களைப் பீய்ச்சியடித்துவிட்டு வேறு வேலையைப் பார்க்கப் போய்விடுகிறார்கள்.மணிவண்ணனும் கும்பகோணத் தீ விபத்தில் பலியான குழந்தைகளுக்காக
'காட்சிக்கான தலை' என்றொரு கவிதை எழுதியிருக்கிறார்.முன்னவை ஒப்பாரிகள். ஒப்பாரிகள் துக்கம் குறைப்பதற்கானவை. ஆறுதல் படுபவை.
ஆனால் இவர் பெருந்துக்கத்தை ஞாபகமூட்டிய படியேயிருக்கிறார். குற்றத்தில் அரசியலை , சமூகத்தை , தனி மனிதனை என எல்லாரையும் பிரதிகளாக்குகிறார். ஒரு கலைஞனோ கவிஞனோ செய்யவேண்டியது இதுதான்.

அதனால்தான் சுனாமியின் போது ஆளாளுக்கு காளான் நடவு செய்து கொண்டிருந்தபோது இவர் கவிதை முயலாமலிருந்திருக்கலாம்.
நண்பனொருவன் கேட்டான் "எதற்காக கவிதை எழுதப்பட வேண்டும். கவிதைக்கான சமூக தேவை என்ன? கவிதை எழுதப்படவில்லையென்றால்
பூமியின் சுற்றுவட்ட பாதையில் ஏதேனும் பிரச்சினை வருமா?" என்று. என்ன பதில் சொல்வது? 'இசை நடனம் ஓவியம் சிற்பம் போல் கவிதையும் ஒரு கலை.மேலும் கவிதை என்பது மொழியின் கூருணர்வு.

வேறு இலக்கிய வடிவங்களெல்லாம் கவிதையின் கைக்குழந்தைகள்தான். கவிதை இல்லையென்றால் மொழி மூளியாகிவிடும்.சமூக வாழ்வியலின் அகத்தை அழகுபடுத்துவது கவிதை.அழகு ஓர் முடிவிலி.அழகுபடுத்தும் செயல் தனது இறுதிக்கட்டத்தை எட்டுவதேயில்லை. அதிலிருந்துதான் கவிதைக்கான தேவையும் கவிதையின் நகர்வும் உறுதிபடுகிறது.'என்றெல்லாம் யோசித்து முடிப்பதற்குள் "என்னவோ கவிதை இல்லையென்றால் பூமியில்   காதலே இல்லையெனச் சொல்வாய் என்று நினைத்தேன்"என்று திகைக்கவைத்து அகன்றான்.லக்ஷ்மி  மணிவண்ணனின் கவிதைச் செயல்பாடு தீராத காதல்.காதலின் அர்த்தம் உலகளாவியது.

சுதந்திரம் என்ற எண்ணம் தடித்த பிம்பத்தைக் காட்டும் நோய் பீடித்த மெலிந்த குழந்தை. உருவாக்கப்படும் எல்லாவித
சுதந்திரமும் இறுகிய சிறைக் கம்பிகளினூடேதான் தலையெடுத்து தழைக்கிறது. நான் சுதந்திரமாக இருக்கிறேனெனச் சொல்வதுகூட உள்ளார்ந்த அச்சத்தோடு கூடிய வார்த்தைதான்.சுதந்திரம் சமூக இந்திரியங்களை நசுக்கிக் கொண்டு நிற்கும் ராட்சத மிருகம். ஒரே  சமயத்தில் சில இந்திரியத்தின்மீது அதிக பாரத்தையும் சிலவற்றின்மேல் மலர்போன்ற மென்மையோடும் நிற்கும் லாவகம் நிறைந்த மிருகம்.உருப்படுத்தும் போதே சுதந்திரம் தனது சரிவைத் தொடங்கிவிடுகிறது.ஒட்டு மொத்தமாய் பெறப்படுவதன் பெயர் சுதந்திரமன்று.அது அடையாளத்திற்கான உரிமை மட்டுமே. அடையாளத்திற்கான உரிமையைப் பெறுவதற்கும் சுதந்திரத்திற்குமான இடைவெளி பெரிது

லக்ஷ்மி  மணிவண்ணனின் பல கவிதைகள் சிருஷ்டிக்கப்பட்ட பூதாகரமான சுதந்திரம் தனிமனித வாழ்வில் சிறு குழுக்களில் நிகழ்த்தும்
பலவந்தங்கள் பற்றியது.விதவிதமான ஆயிரந் தலைகளுக்கப்பாலும் பல்கிப் பெருகும் தன்மையுடையவை காளியின் தலைகள்.ஒவ்வொன்றும் ஒவ்வொரு விதமான புனைவும் குணமுங் கொண்டவை.ஒன்று மற்றொன்றிலிருந்து முரணானது.இசக்கி என்பதும் குறியீடேதவிர ஒவ்வொரு இடத்திலும் தனித்துவமும் தன்னைச் சூழ்ந்துள்ள பிரத்யேக கதைகளிலுமானது. பெண்மையையும் ஆண்மையையும் இதுபோலத்தான் புரிந்துகொள்ள வேண்டியிருக்கிறது. புலன்வழி பெறப்பட்ட தகவல் முடிவாக பெண்ணை ஆண் வரைவதும் சட்டகமிடுவதும் ஆணைப் பெண் வரைந்து நிறமூட்டுவதும் தோல்வியில் தான் முடிகின்றன.

ஒப்பீடுகளின் வழியே சபிக்கப்பட்டிருக்கும் நம் சமூகம் வானத்தைப் பிடிப்பதென்றாலும் நீலமெனும் வர்ணத்தை வீசி அதில் குறுகுறுக்கிறது. வானமோ வர்ணங்களுக்கப்பால் நகர்வதாயிருக்கிறது.ஒப்பீடு என்பதே மிதக்கும் கற்களின் கட்டிடம்தான். 'இசக்கி'எனும் கவிதையின் இறுதி வரிகள் இவை

'புலியூர் குறிச்சிக் கிழவன்
இசக்கியின் உருவமும் வர்ணமும் கொணர/படாதபாடு படுகிறான் ஒரு
கவியைப் போல.'
'தமிழ் பெண்கவிஞர்கள் கணவன்மார்களை
பராதி சொல்லி கவிதை எழுதுகிறார்கள்'

லக்ஷ்மி  மணிவண்ணன் கவிதைகளில்  யோனி ஆண்குறி மலம் மாதவிடாய் நாப்கின் கழிவறை போன்ற சொற்கள் மீண்டும் மீண்டும் சொல்லப்படுவதை புதிய வாசகன் முகச்சுழிப்போடும் , மூச்சுத் திணறலோடும்தான் கடக்கவேண்டியிருக்கும்.சுத்தபத்தமான சில கலைஞர்களுக்கூட அதுநிமித்தம் ஒவ்வாமை தோன்றலாம்.குறிப்பிட்ட அதுபோன்ற சொற்களின் சமூக ஏற்பு நிலை என்பது அந்த சொற்களுக்கானவை மட்டுமன்று.அவை ஒடுங்கிய கனவுகளுக்குள் திணிக்கப்பட்டவைகள்.வரலாற்றின் சமகால நிகழ்வின் துயரார்ந்த கதைகள்
அந்த சொற்களின் மீது நெளிகின்றன.குற்ற உணர்வால் அவற்றை மூடி வைத்துவிட்டு நாகரீகமாய்(?) உரையாடத்
தொடங்குகிறோம்.சாதரணமாய் உச்சரிக்கும் நமது மொழிகூட மெல்லியத் திரையோடுதான் நாவில் புரள்கிறது. 'பின்புறம்' என்கிறோம் உட்காருமிடமென்று சொல்லிப் பார்க்கிறோம். குண்டி என்றால் முடிந்தது.ஆனால் குண்டி என்றால் அருகிலிருப்பவரின் கண்கள் ஆடைக்குள்
நுழைந்து நமது குண்டியைப் பார்த்துவிட்டதுபோல் பதற்றமுண்டாகிறது. காரணம் அச்சொல்லை குற்ற உணர்வில் சமாதி வைத்து பலகாலமாகிறது.

ஒருசில உறுப்புகளை ஔிவுகளிலும் நிலையங்களி்ன் கழிப்பிட மறைவுகளிலும் எழுதிப் புல்லரிப்பதற்கு காரணம் அந்த சொற்கள் நம்மில் குற்ற உணர்வைத் தூண்டிவிடுவதால்தான்.இன்னும் எத்தனையோ போலியான அபாயகரமான மௌனங்கள் நம்மிடையே உடல்களை ரகசியத்தில் பூட்டுகின்றன.பூட்டுகள் எப்போதும் குற்றத்தையேத் திறக்கின்றன.பெண்ணின் உடலையோ ஆணின் உடலையோ கடந்து செல்ல முடியாமல் சமூகத்தின் ஒருபகுதி தேங்கிக் கிடக்கிறது. உடல்குறித்த புதிர்மண்டிய கற்பனைகள் வேறு வேறு வன்தொடுகைகளை நிகழ்த்துகின்றன.

'நீயோ எனக்குத் தொட்டுப் புணரும் எண்ணமற்று உனது கோட்டைக்குள் நுழையும் மனம் தரவேண்டும்' கன்னி யுவதியின் கண்கள் என்ற கவிதையில் வரும் இப்பகுதி பால்பேதமற்ற புழங்கு தன்மை நோக்கி நகரும் ஆவலைக் கொண்டிருக்கிறது.

படித்த மாத்திரத்தில் விளங்க முடிகிற (அறிதலின் சாகசமற்ற) பல கவிதைகள்
கவிஞர் எழுதியிருக்கிறார். வீடு, தெரு ,சாலைகள், பயணங்கள், நண்பர்கள் ,சக கவிகள், எதிரிகள், நொய்மை என எத்தனையோ வகையாலானவை. அவை எளிமையாக வெளியேக் காட்டிக் கொண்டாலும் முன்பின்னாக ஏராளம் சம்பவங்களில் ததும்பி நிறைந்திருப்பதை உணர முடியும்.கனவிற்கான முன்நிகழ்வைப் போல.அந்த கவிதைகளை உதாசீனப்படுத்திக் கடந்து போனால் அவரது சிறந்த கவிதைகளிலொன்றை அடையாளங் காண முடியாமல் போகலாம் என்றே தோன்றுகிறது.

லக்ஷ்மி  மணிவண்ணனின் குறைந்த எண்ணிக்கையிலான கவிதைகளில் மட்டுமே காலம் நிகழ்கிறது.(சதாம்,கவிகள்,மூக்குப்பீறிப் பாட்டா,அப்பாவி முதியவருக்கு என்ன நடந்தது இன்னும் சில) அநேக கவிதைகளின் காலத்தை அகாலத்தில் விசிறி விடுகிறார். மீண்டும் அவை வாசிக்கப்படும் வேறுவேறு காலங்களின் மீது துகள்துகளாய் உதிர்ந்து வாழ்வின் மீதெழும் நனவிலியில் மெல்ல நினைவடைகின்றன.காலத்தை சிறுசிறு இருட்கிரகங்களாக்கி ஒரு சுற்றுவட்டப் பாதையில் சுழற்றி வீசும் கலை நிகழ்விது.ஔிரும் விழிகளில் கிரகங்களும் ஔியூறிப் பிரகாசிக்கத் தொடங்குகிறது.அது அதனுள்ளே அமிழ்ந்து பூடகமாயிருந்த வெளிச்சம்தான்.வாசிப்பவர் அதனை தனது மேஜை இழுப்பறைக்குள் வைப்பதோ அறை மூலைகளின் நிழல் இருட்டில் வைப்பதோ,கிரகத்தை சாபகிரகமாக ஒதுக்கவோ ,பரிபூரண உரிமையை அவரது கவிதை மொழியே வழங்கிவிடுகிறது.

தொகுப்பிலிருக்கும் பல கவிதைகளில் கடவுள் வருகிறார்.ஒற்றைச் சொல்லல்லாத கடவுள் என்ற புனைவு பல்வேறு பரிணாமங்கள் கொண்டது.அது அதிகாரத்தோடும் அரசுத்தனத்தோடும் நிறுவப்பட்ட ஒழுங்குகளை செங்கோலாய் பிடித்திருப்பதாகவும் எதிர்தளம் குறித்த ஞாபகமின்மையோடு இயங்குவதாகவும் உள்ளது.

'கடவுளின் தண்டனையாகக் கிடக்கிறது
நொய்மையோடும் பிசாசுகளோடும் கதவற்ற எனது திறந்த வீடு'என்கிறது

'கடவுளுடன் சில பொழுதுகள்'என்ற கவிதை.

ஊருடன் ஒத்துவாழ் என்ற பழஞ்சொல் இன்றைக்கு அவசியமில்லாதது.அதிகார பலாத்காரத்தின் அடர்த்தியை அதிகரிப்பதற்கான வார்த்தை அது.விலகுதலுக்கும் நிராகரிப்பதற்குமான ஊக்கம் சாதாரணமானதன்று.அதிகாரம் உருவத்தோடுதான் இருக்க வேண்டுமென்பதில்லை மாயக் கருவிகளாகவும் நம்மை நெருக்குகிறது.

மணிவண்ணனின் கவிதைகள் தொடர்ந்து கடவுளின் நிறத்தைச் சுரண்டி உதிர்க்கின்றன.நிறமிழந்த கடவுளோ தனது நிறம் பற்றிய கனவுகளோடு சாபங்களை வீசியெறிந்தவாறு சுரண்டப்பட்ட நிறமற்றப் பகுதியைப் பொத்திக் கொண்டே நிறமூட்டுபவர்களிடம் ஓடுகிறார்.
கவிதைகளின் இடையிடையே சில தலைகீழ் நிகழ்வுகள் நடக்கின்றன.

'தூங்கிக் கொண்டிருக்கும் கன்னிப் பெண்ணின் கருப்பையில் கடவுள்
அமர்ந்த நிலையில் தலைகீழாய்
கனவு காண்கிறார்.'

'ஐஸ் பெட்டியில் தலைகீழாய் அமர்ந்து
பார்த்துக் கொண்டிருந்தேன்.'

'பிசாசு ஒன்று கடிகார பெண்டுலமாய்
ஆடிக்கொண்டிருக்கிறது தலைகீழாக'

ஒரு கவிதையில் சிகரெட் தலைகீழாகத்
தொங்குகிறது.

இந்த தலைகீழ் என்பதை மணிவண்ணனின் அக்கவிதைகளைத் திறக்கும் சாவி என்றுதான் கொள்ளவேண்டும்.ஒரு பெரிய மரத்தைப் பார்ப்பது எப்படி? இலை கிளை பூ பழம் காய் பிஞ்சு .இப்படி மரத்தைப் பார்ப்பதுதான் சுலபமானது.ஆனால் கவிஞனின் முன்பு மரம் தலைகீழான தனது பிம்பத்தின் கரிந்த நிழலில் நிற்கிறது. வேர்களெல்லாம் வெட்டவெளியில் வியாபிக்கிறது. பொசுங்கிய பூக்களையும் நஞ்சில் முட்டி நிற்கும் வேர்தும்பினையும் சுருள் கோடுகளால் அவன் இணைக்கிறான். துளிர்ச்சருகுகளை ரசாயனம் வழித்த  மொட்டைத் தரையில் பிச்சைக் காசுகளாய் குலுக்கியெறிகிறான்.கவிதைகளில் இதன் வெளிப்பாட்டு மொழியை சாதாரணத்தன்மையால் எதிர்கொள்வதென்பது முழுக் கவனத்தை வேண்டிநிற்பது.

லக்ஷ்மி  மணிவண்ணனின் சில கவிதைகள் அறிவிக்கப்படுகின்றனவாகவும் அபூர்வ உரையாடலின் ஒரு பகுதியாகவும் உருப்பெறுகின்றன.செப்பலோசையிலே பல கவிதைகள் பிறக்கின்றன.இன்னும் சில பண்டைய கனவில் சிந்திய ரத்தத் துளியை பிரதேசங்களின் மௌன வெளியிலும் பெருங்கட்டிடங்களின் அருகிலியங்கும் சிறு முடுக்குகளில் தேடுவதாகவும், இன்னொரு கனவில் பதட்டமுற்று உற்றுநோக்கித் திரிவதாகவும் அமைகி்ன்றன.கவிதைகளின் சமகாலப் பிரக்ஞை முன்னுடலிகளின் நினைவு வழியே மீண்டெழுவதாய் அமைந்துள்ளது.ஒருசில கவிதைகள் மறுவாசிப்பில் சோர்வைத் தருபவையாக உள்ளன.நிகழ்ந்துவிட்ட அக்கவிதைகள் மீண்டும் மீண்டும் தங்களைத் தாங்களே  விளக்க முயற்சித்த படியிருக்கின்றன.விளையாட்டில் உடைந்த பலூனின் சிறு துண்டுகளில் விரல்பிதுக்கியுறிஞ்சி குமிழெடுத்து உடலில் உரசி விளையாடும் ஒரே பலூனின் ஏக்கம் நிறைந்த எல்லைஅது.அதுவும் விளையாட்டின் ஒரு பகுதியென்றாலும் சற்று அலுப்பூட்டக்கூடியது.தொகுப்பில்
சங்கருக்குக் கதவற்ற வீடு என்ற பகுதியில் (அவரது முதல் தொகுப்பு) வரும்'இருப்பின் காலம்'என்ற கவிதையின் சாறு இந்த மொத்தத் தொகுப்பில் பல்வேறு தலைப்புகளின் கீழ் ஓடிக்கொண்டேயிருக்கிறது.அம்மாதிரி கவிதைகளின் முன் நிற்கையில் வாசிப்பவன் லேசாக நெளியத்தான் வேண்டியிருக்கிறது.

உறக்கத்திற்குப்பின் உறக்கத்தை ஞாபகப்படுத்த முடியாதது போன்ற வெற்றுணர்வைத் தருகின்றன சில கவிதைகள்.
லக்ஷ்மி  மணிவண்ணன் கவிதைகள் உரைநடையின் சூட்சும விளிம்பின் வழியேக் கடந்துசெல்பவை.அவரது பாணியை நகலெடுப்பது என்பது உரைநடையில் கரையொதுங்கும் கவிதைத் தற்கொலை.கவிஞனுக்கான  தனித்தன்மை இதுவாகத்தான் இருக்க முடியும். அநேகமாய் கவிதைகளை எழுதுவது என்பதைவிட நிகழ்த்துவதுதான் மணிவண்ணனின் நோக்கமாக இருக்கவேண்டும்.ஒரு காட்சியின்மீது வேறுவேறு காட்சிகளைச் சொருகிச்சொருகி வேஷந்தரிக்கும் சொற்களை நடிக்கவிடுகிறார்.நடித்து நடித்து மயங்கிய சொற்கள் சொல்லற்ற வெளியில் அரூபக் காட்சியொன்றில் குவிகிறது.மொத்தக் குவியலையும் சேர்த்தும் கலைத்தும் நடன நிலைக்கு மாற்றுகிறார் நடனத்தைப் பித்துநிலைக்கு கடத்துகிறார். வாசகன் அடையவேண்டிய பித்துநிலை அது.பித்து என்பது  போதமற்ற நிலையல்ல. பூர்வ ஞாபகம் நிறைந்து மூளும் அறிவு நிரம்பியது.

மணிவண்ணன் கவிதைகள் ஓரிடத்தில் உட்காருவதில்லை.சுட்டிக் குழந்தைபோல் அது அங்குமிங்கும் ஓடிக்கொண்டேயிருக்கிறது.சொற்களை அணிவிக்க அணிவிக்க உரித்தெறிந்துவிட்டு நிர்வாணமாகத் திரியும் சுட்டிக்குழந்தை. இவர் கவிதைகள் சட்டென்று யாரையும் வசீகரித்து கிளர்ச்சியூட்ட வல்லவையல்ல.இவரது உலர்ந்த மொழியில் யாரும் மெய்சிலிர்ப்பதற்கு தயாராவதில்லை.மேல் தோலுரிந்த அருவருப்பான கவிதைகள் இவருடையவை.

கடலிலிருக்கும் நீலம் கையிலள்ள வெளுத்திருக்கிறது


[2016 ஜூலை 18 அன்று மதுரையில் தென்திசை இலக்கிய வட்டம் நடத்திய நிகழ்வில் லக்ஷ்மி  மணிவண்ணனின் 'கேட்பவரே' கவிதைத் தொகுப்பு குறித்து  எழுதி வாசித்தது.]

மத மாற்றங்களும் இந்தியாவில் பெருமரபுதான்

மத மாற்றங்களும் இந்தியாவில் பெருமரபுதான்

மத மாற்றங்கள் குறித்து இந்தியாவில் இந்து  அடிப்படைவாதிகளிடம் சகிப்பற்ற கண்ணோட்டம் நிலவுகிறது.மத மாற்றங்களையும் அவர்கள் ஏற்கவில்லை.அதேசமயத்தில் ஏற்றத்தாழ்வுகளையும் அவர்கள் பழைய முறைப்படி பராமரிக்க வேண்டும் என்று நினைக்கிறார்கள்.அதிசயமான முரண் இது.இந்த குரலை முன்னெடுப்பு செய்கிறவர்கள் இன்னும் பெருவாரியான மக்களை ஏற்கவும் முன்வரவில்லை.மத மாற்றங்களை பொறுத்தவரையில் இரண்டு மூன்று தலைமுறைகள் வரையில் மதம் மாறுகிறவர்கள்தான் நெருக்கடிக்குள்ளாகிறார்கள்.எனவே இது மாறுகிறவர்களின் பிரச்சனையே அன்றி பிறருடைய ஆதங்கங்கள் பொறுத்தமற்றவை.ஆதாயத்திற்காக மாறுகிறார்கள் ,திருமணத்திற்காக மாறுகிறார்கள்,ஏற்ற தாழ்வுகளை சகிக்க இயலாமல் மாறுகிறார்கள் எப்படியிருந்தாலும் அதில் எந்தவிதமான பிரச்சனைகளும் கிடையாது.ஆதாயத்திற்காகத் தான் மாறுவார்கள் .ஒரு விஷயத்தில் ஒரு ஆதாயமும் கிடையாது ; அவமானம் மட்டுமே மிஞ்சுகிறது என்றால் மாறுவதுதானே சிறந்த விஷயம் ?.மாறாமல் இருந்து இருந்த இடத்திலேயே புழுத்து சாவதற்கா மனித வாழ்க்கை ? ஒரு கலாச்சாரம் ஒத்துவரவில்லை என நினைத்தால் பிறிதொன்றைத் தேர்வு செய்வதுதான் சிறந்த செயல்.

இந்துக்கள் இஸ்லாமியராக,கிறிஸ்தவர்களாக  மாறுவதும்,சைவர்கள் வைணவர்களாக ,வைணவர்கள் சைவர்களாக ,சமணர்கள் சைவர்களாக மாறியதும் இந்தியாவில் நெடிய மரபு.எல்லோரும் சேர்ந்து இந்துக்களாக மாறியதும் உண்டு.தமிழ் சமணர்களில்  பெரும்பாலோர் இன்று இந்துக்களாக இருக்கிறார்கள்.அவர்களின் வழிபாட்டுப் பள்ளிகள் இந்து மத கோயில்களாக உள்ளன.  கிறிஸ்தவர்கள் இந்துக்களாக மாறியதும் உண்டு.நான் ஒரு மதத்தைப் பின்பற்றுவதால் எல்லோருமே அதன்படிதான் ஒழுக வேண்டும் என நிர்பந்திப்பதற்கு எந்த தரப்பிற்கும் உரிமையில்லை.மூளைச்சலவை செய்கிறார்கள் பிறர் என்பதனை ஒரு வாதத்திற்காக ஒத்துக் கொள்வதாகவே கருதுவோம்.ஏன் உங்களுக்கு அதனைச் செய்ய இயலாமற் போயிற்று ? மகான்கள் பற்றாக்குறையா ? உங்களால் பிறருக்கு பலன் கிடையாது என்று ஆகிவிட்டீர்களா ? பலன் இல்லை ,பற்றாக்குறையென்றால் பின்னர் கிடந்தது புலம்பி என்ன பலன் ?

ரஜனீஷ் ஒருமுறை லண்டனில் தரையிறங்க பிரிட்டீஷ் அரசு அனுமதி மறுத்த போது , சாமானியன் ஒருவன் உங்கள் விமான நிலையத்தில் தரையிறங்க அனுமதிக்கப்படுவதால் நீங்கள் பல நூற்றாண்டுகளாக போற்றி பாதுகாத்த கலாச்சாரம் அழிந்து விடுமாயின் ; உண்மையாகவே அது அழிய வேண்டியதுதானே ? எனக் கேட்பார்.மதம் போன்ற பெருமக்கள் நிறுவனங்கள் மக்களின் ஆதரவை இழக்காமலிருக்க தங்கள் சமகாலத்து தன்மையை புதுப்பித்துக் கொண்டே இருக்க வேண்டும்.பறிபோயிற்று என்று அரசியல்வாதிகளை போன்று கதறியழக் கூடாது.

இந்துமதத்தில்  ஏற்ற தாழ்வுகள் இருக்கிறவரையில் அதற்கு தார்மீகம்  பேசும் சக்தி கிடையாது.பேசினால் பொருந்தாது. பிற மதங்களிடம் உள்ள ஏற்றத்தாழ்வும் இந்துமதம் கடைபிடிக்கிற ஏற்றத்தாழ்வும் ஒன்றல்ல. விவேகானந்தர் அதனால்தான் சாதிய ஏற்ற தாழ்வுகளை இந்துமதத்தின் தற்கொலை என்று குறிப்பிட்டிருக்கிறார்.

நான் இந்துமதத்தின் பால் ஆழ்ந்த நம்பிக்கையுள்ளவன்.ஏராளமான கோயில் குளங்களுக்கு செல்லக் கூடியவன்.ஏற்றத்தாழ்வுகள் மட்டுமே இந்து மதமல்ல என்பதனை நன்கு அறிந்தவன்.என்றாலும் இன்றும் ஏதேனும் கோயிலில் நின்று கொண்டிருக்கும் போது கையைப் பிடித்து பலவந்தமாக இழுக்கும் ஒருவனை எதிர்கொள்கிறேன்.சிலசமயங்களில் அவன் பிறழ்வில் சில சொற்களை பயன்படுத்திக் கத்துவதும் கூட உண்டு.இப்போதெல்லாம் என்னை அவனால் இனம் காண இயலாமற்போனாலும் கூட ,இனம் காண்பவனை கண்டு அவன் கத்தவோ ,பலாத்காரம் பண்ணவோ ஆயத்தமாகத்தான் இருந்து கொண்டிருக்கிறான்.சில நேரங்களில் இவர்களெல்லாம் ஏன் வருகிறார்கள் ?என வெளிப்படையாகப் பேசுவதும் கூட உண்டு.இவன் அப்புறுத்தப்பட இந்துமதம் இன்னும் நிறைய சிந்தனை செலவழிக்க வேண்டியுள்ளது.இல்லையெனில் இந்துமதம் இவனைக் காப்பாற்ற விளைகிறதா? என்கிற கேள்வி எழும் .ஹெச் .ராஜா ,நிர்மலா சீத்தாராமன் போன்றோரின் உடல்மொழியைக் கொண்டவன் இவன்.

எந்த சித்தாந்தமும் ,எந்த மதமும் சிறுபான்மையாக இருக்கும் போது தனது கூட்டத்தை அதிகப்படுத்தவோ ,பரப்பவோ தான் விரும்புகிறது.அமெரிக்காவில் போய் நீங்கள் ஒரு கிருஷ்ணன் கோயிலை கட்டி வைத்துக் கொண்டு பாரம்பரிய பெருமைகளை பேசிக் கொள்வதில்லையா என்ன ?

ஆதாயத்திற்காக மாறுகிறார்கள் என்றெல்லாம் கூவாதீர்கள்.ஆதாயத்திற்காகத் தான் மாறவேண்டும்.இல்லையெனில் வெற்றுத்  திமிர் என்றல்லவா ஆகும் ? அதுமட்டுமல்ல.எல்லாம் ஒன்றுபோலிருக்கக் கூடாது.பல கலாச்சாரம் என்பதுதான் தேசத்திற்கு பேரழகு.பிராந்தியத்திற்குப் பெருமை.

மார்க்சியம் ஒரு அடிப்படை பாடம்

மார்க்சியம் ஒரு அடிப்படை பாடம்

அறிவு தளங்களில் பங்காற்ற விரும்புவோருக்கு மார்க்சியம் ஒரு அடிப்படை பாடமாக இருப்பதே நல்லது.தத்துவங்களைப் பயில விரும்புவோருக்கு  அதுவே சிறந்த தொடக்க கல்வியாக இருக்க முடியும்.அதிலிருந்து பிற தத்துவங்களுடன் உறவு பெற்றவர்களே சிறந்த நடத்தை கொண்டவர்களாக இருக்கிறார்கள் .  பின்னர் மார்க்சியத்தைக் கைவிட நேரலாம் ,நேர வேண்டும் எனினும் அது மூலபாடமாக உள்நின்று இயங்கும் தன்மையும் சாராம்சமும் கொண்டிருக்கும்.

விவாதங்களில் ஈடுபடுபவர்கள் அவர்கள் எத்தகைய தத்துவ முறைகளை பின்பற்றினாலும் சரி,மார்க்சியத்தை தொடக்க கல்வியாகப் பெற்றிருந்தவர் எனில் அவருடன் உரையாடுவது எளிமையானதாக இருக்கிறது.இல்லையெனில்  சிறிது நேரத்திலேயே அவர் தனது குடும்ப நம்பிக்கைகளை பற்றி இறுகப் பேசுபவராக மாற்றமடைந்து விடுகிறார்.அந்த விதத்தில் மார்க்சியம் அதில் விலகுபவர்களுக்கும் கூட பங்களிப்பு செய்யும் தத்துவம்.

பிற தத்துவங்களுக்கு அத்தகைய வலிமை இல்லையா என்றால் உண்டு.ஆனால் தத்துவங்கள் குடும்ப நம்பிக்கைகளாக வந்து சேருகிற போது மிகுந்த இறுக்கத்தை அடைந்து விடுகிறது.மார்க்சியத்தையும் குடும்ப நம்பிக்கையாக பாவிப்பவர்களிடமும் இந்த சிக்கல் உண்டு.பல தத்துவங்கள் மார்க்சியத்திற்கு பிறகு புதிய அர்த்தங்களைப் பெறுகின்றன.ஒரு சைவ சித்தாந்தியை எடுத்துக் கொள்ளுங்கள்,அல்லது ஒரு அத்வைதியை எடுத்துக் கொள்ளுங்கள் ,அவர்கள் மார்க்சியத்தை அடிப்படையாக கற்றவர்கள் எனில் அவர்கள் பேசுகிற அத்வைதமும் சரி ,சைவ சித்தாந்தமும் சரி அல்லது வேறு எந்த விதமான தத்துவங்களாக இருப்பினும் சரி அவற்றில் புதிய பொருள் விளங்கத் தருகிறார்கள்.இல்லையெனும் போது அவர்கள் பேசுவது வெறும் குடும்ப நம்பிக்கைகளின் மொழியில் சிதைவுற்று விடுகிறது.பின்நவீன சிந்தனைகளில் பலவற்றிற்கு மார்க்சியம் பொருட்படுத்தத் தகுந்ததாகத் திகழ்வதற்கு மார்க்சியத்தின் இந்த பண்பை குறிப்பிட்டுச் சொல்லலாம் . மார்க்சியம் உலகலாவிய நவீன சிந்தனை உருவாக்கிய தத்துவம் என்பதே இதற்குக் காரணம் .

பொது மேடைகளிலேயே பேசுபவர்களை கவனித்துப் பாருங்கள்.ஒருவர் உளறுகிறார் என்று படுகிறது.ஒருவர் முழு நேர்மையுடன் தனது அனுபவத்தை பகிரும் போது கூட அது முழு  அழகு பெற தவறி விடுகிறது.நாம் அதனைப் பொருட்படுத்தாது கடந்து விடுகிறோம்.அனுபவமோ ,தத்துவமோ ,வரலாறோ ,சமூகவிலோ ,இனவரவியலோ எதுவாக இருப்பினும் அது மற்றொன்றுடன் கலந்து புதிய பொருளை ஏற்படுத்தினால் மட்டுமே அதற்கு அழகு பிறக்கும்.கோசாம்பி வரலாற்றில் செய்திருக்கும் மாயம் இதனால் நிகழ்ந்தது

வைணவத்தை எனது பக்கத்து வீட்டுக் காரார் பேசி கொன்றுவிடுகிறார் .அதே சமயத்தில் வேளுக்குடி கிருஷ்ணன் பேச புதுமையாக உள்ளது ஏன் ? மார்க்சியம் ஒரு இடையீட்டுக் கருவி.பிறருடன் தொடர்பு கொள்ளாதவரையில் ,பிறவற்றுடன் தொடர்பு ஏற்படாதவரையில் நம் அந்தரங்க மொழிக்கும் , குடும்பக்  கண்ணோட்டத்திற்கும் பொருளில்லை என்பதை அது சாரமேற்றும் தத்துவம்.வேளுக்குடி கிருஷ்ணன் மார்க்சிய   அறிஞரெல்லாம் இல்லை.அவரிடம் அது தொனிக்க பொலிவு பெறுகிறார்.மார்க்சியத்தின் சாரத்தை ஏதோஒரு விதத்தில் அவர் வைணவத்துடன் கலந்து விடுகிறார்.அதனாலும் அவர் அழகு பெறுகிறார்.பிறரில் இருந்து தனித்து அறியப்படுகிறார்.பிறர் பேசுவதற்கும் அவர் பேசுவதற்கும் இடையில் வேறுபாடு வெளிப்டையாகத் தெரிகிறது.மனிதனின் நவீன மனம் உருவானவிதத்தில் மார்க்சியத்தின் பங்களிப்பை ஒரு போதும் மறுக்கவே இயலாது.

நான் பொதுவாக அடிப்படைவாதிகள் மட்டுமே பேசக் கூடிய விஷயங்களை படைப்பாளிகளோ ,பின்நவீன சிந்தனையாளர்களோ பேசும் போது அது என்னவாக மாறுகிறது என்று பார்ப்பேன்.அடிப்படைவாதிகள் பேசுகிற விதத்தில் அது பெரும்பாலும் இருப்பதில்லை.வேறொன்றாகிவிடுகிறது.மற்றொன்றுடன் கலந்து வெளிப்படும் அனுபவம் உண்மையாகிவிடும் தன்மை கொண்டது.கலக்காமல் வெளிப்படுவது வெறும்  குடும்ப அறிவு .மோதி  பெறுவதே அறிவு.பிறவற்றுடன் சிந்தனையில் ,வாழ்வில் ,அகத்தில் மோதி அவற்றைப் பெற வேண்டும்.

இவையெல்லாம் ஏன் தொழில் சார்ந்த மார்க்சியர்களுக்கு நடப்பதில்லை என்றால் பிற ஒன்றையும் கலப்பதற்கு அவர்கள் சம்மதிப்பதில்லை என்பதே காரணம்.மார்க்சியத்தை அவர்கள் குடும்ப நம்பிக்கையாக மாற்றி வைத்திருக்கிறார்கள்.எனவே தான் அவர்கள் கண்களில் எதுமே உதயமாவதில்லை.

அளத்தங்கரை "கோயில் வீடு" இந்து நாடார் குடும்பம்

அளத்தங்கரை "கோயில் வீடு" இந்து நாடார் குடும்பம்
எட்டு தலைமுறைக் குடும்பம். எட்டாவது தலைமுறையில் பேரன் பேத்திகளுடன் மரகதம்மாள்.நிறைந்த தேஜஸ் .எட்டு தலைமுறை கடந்து செல்வதென்பது சாதாரணமான காரியமில்லை.மூன்றாவது தலைமுறையே பெரும்பாலும் கசந்து விடும்.நாலில் ஷீணம் உண்டாகும் .முரண்படும்.மன சஞ்சலங்கள் தோன்றும். அதனையெல்லாம் ஒரு குடும்பம் கடந்து செல்வதென்பது தெய்வ காரியமின்றி வேறில்லை.ஐந்து தலைமுறை கடந்தாலே அரசியல் அதிகாரம் ஏற்பட்டு விடும்.முதல் தலைமுறையிலேயே ஏற்படுகிற அரசியல் அதிகாரத்திற்கும் இதற்கும் அநேக வித்தியாசங்கள் உண்டும்.மத்திய அமைச்சர் பொன்.ராதாகிருஷ்ணன் இந்த குடும்பத்தைச் சார்ந்தவர்.
எட்டு தலைமுறை என்பது கிளைகிளையாக மொத்த சமூகத்திலும் ஊடுருவி இருக்கக் கூடியது . அளத்தங்கரை குடும்பம் இதற்கு உதாரணம்.இந்த குடும்பத்திற்கு கிழக்கு வடக்காக ஏராளமான கிளைகள்.முகிலன் குடியிருப்பு,ஈச்சன் விளை,மணிகெட்டிப்பொட்டல் என்றும் அதிகமாகவும்.இன்று இந்தியா முழுவதிலும் இருக்கிறார்கள்.உள்ளூரிலும் மருத்துவர்கள் , வழக்கறிஞர்கள் ,பொறியாளர்கள் என்று பலவாறாக.அளத்தங்கரை குடும்பம் என்றால் இன்றும் பெரியவர்களுக்கு அதன் பெருமிதம் தெரியும். மிகப்பெரிய நிலச்சுவான்தார்கள்.ராஜாங்கமங்கலம் உப்பளம் ஒரு காலத்தில் இவர்களுடையதாக இருந்தது.
நானறிய இது போன்ற இந்து நாடார் குடும்பங்கள் எங்கள் பகுதியைச் சுற்றியே பத்துக்கும் மேற்பட்டவை உண்டு.மகாராஜாக்களைப் போன்று வாழ்ந்தவர்கள்.ஆன்மீக நெறியும் வழுவாமல்.பொத்தையடி மாறச்சன் தாணுமாலயன் நாடார் குடும்பம் இது போன்ற ஒரு குடும்பம்தான்.மகாராஜா மார்த்தாண்ட வர்மா ஒன்றரையாண்டு காலம் மாறச்சன் தாணுமாலயன் குடும்பத்தில்தான் பப்புத் தம்பி ,ராமன் தம்பி பிரச்சனையின் போது அடைக்கலம் ஆகியிருந்தார்.மார்த்தாண்ட வர்மாவைப் பாதுகாத்தவர்களில் அவர்களும் உண்டு.மாறச்சன் என்கிற பெயரே மகாராஜாவின் வளர்ப்புத் தந்தை என்னும் பொருளில் வந்தது.எங்கள் குடும்பத்தை துரைபாண்டி நாடார் வம்சம் என்பார்கள்.இதில் பெருமை கொள்ளவெல்லாம் ஏதுமில்லை இப்போது.துரைபாண்டியின் கதை என்பது பெருங்கதை .அழிந்த கதை அது. அழிந்தடங்கிய குடும்பங்களில் துரைபாண்டியின் குடும்பமும் ஒன்று.கிளைகள் எங்கெங்கோ இருக்கிறார்கள்.அசல் கெடாமல் இருக்கும் குடும்பங்களில் ஒன்று இந்த கோயில் வீடு அளத்தங்கரை இந்து நாடார் குடும்பம்.
நான் இவற்றை நினைவுபடுத்துவதற்கு ஒரு காரியமுண்டு.இந்த வகையான இந்து நாடார் குடும்பங்கள் பதினைந்தாம் நூற்றாண்டிலிருந்து நிலை கொண்டிருக்கின்றன.நிலை கொண்டது பதினைந்தாம் நூற்றாண்டெனில் இதன் இயங்குதல் அதற்கும் ஒன்றிரெண்டு நூற்றாண்டுகளுக்கும் முன்னரே குறைந்த பட்சம் துவங்கியிருக்க வேண்டும்.குமரி மாவட்டம் முழுவதிலுமிருந்து இத்தகைய இந்து நாடார் குடும்பங்களில் குடும்ப வரலாற்றை சேகரிக்க முடியும் எனில் அது பின்னர் உருவாக்கப்பட்ட வரலாறு என்னும் கதையாடலை பகுதி உண்மைகளாக ஆக்கிவிடக் கூடும்.எனக்கு இவற்றில் ராஜாக்கமங்கலம் தொட்டு ஈத்தாமொழி முகிலன் குடியிருப்பு வரையில் கிழக்கு வடக்காக அரைகுறையாக தெரிவது போல ; இதன் தென்மேற்கு தொடங்கி அதன் வடபுலம் வரையில் ஜெயமோகன் நன்றாக அறிவார் என்றே நினைக்கிறேன்.
இன்று அதீதன் வீட்டிற்கு வந்திருந்தார்.ஆர்வத்துடன் கவிதையில் ஈடுபட்டு வருகிற இளைஞர்.பா.வெங்கடேசனின் அக்கா மகன் என்பது கூடுதல் தகவல்.இதனை சொல்லலாமா என்று தெரியவில்லை.நான் ஒரு முட்டாள்தானே அதனால் தைரியமாகச் சொல்லலாம்.அவர் மண்டைக்காடு பகவதியைப் பாத்ததில்லை என்றார்.அப்படியானால் பார்த்து வரலாம் என்று சென்றோம்.பார்த்துவிட்டு திரும்பும் வழியில் அளத்தங்கரை மரகத்தம்மாளிடமும் ஆசிபெற தூண்டியது அம்மை பகவதியின் அருளாகத்தானிருக்க வேண்டும்.
மரகதம்மாள் என்னுடைய நெருங்கிய நண்பன் சிவராமின் பெரியம்மாவும் கூட.சிவராம் அளத்தங்கரை குடும்பத்தைச் சார்ந்தவர்..இந்த குடும்பத்தின் இரண்டு கிளைகளில் ஒன்று ஞானியார் குடும்பம் .அதன் வழியில் வருபவர் மரகதம்மாள்.நாடாச்சி குடும்பத்தைச் சேர்ந்தவர் மத்திய அமைச்சர் பொன்.ராதாகிருஷ்ணன்.மரகதம்ம்மாளின் காலில் விழுந்து வணங்கி விடைபெற்றுத் திருப்பினேன்.எட்டு தலைமுறையின் எட்டாது சுடர்.ஞானியார் தவ யோகியும் கூட.அதன் நிமித்தம் ஞானியார் பஜனை மடமும் சிவன் வழிபாடு சார்ந்தது.அம்மன் வழிபாடும் இவர்கள் குடும்ப முறைமை.ரகசிய தெய்வம் மனோன்மணியம்மன்.இன்றைய நாள் மறைமுகமாக எங்களுக்கு மனோன்மணியம்மனின் ஆசியுடைத்த நாளாகவும் ஆனாது.
எட்டு தலைமுறை கடக்கும்போது இடிபாடுகள் இல்லாமல் கடக்க முடியுமா என்ன ? அந்த இடிபாடுகளுக்குள் நின்றவண்ணம் சுடராகி மனோன்மணி காத்துக் கொண்டிருக்கிறாள் .கலைச் செல்வங்களும் பெருகி இக்குடும்பம் பல்லாண்டுகள் தழைக்க இக்கவிஞனின் ஆசிகளும் மனோன்மணியின் பக்கத்தில் துணையாக ஆகட்டும்.
புகைப்படங்கள் - அதீதன்

பக்தியில் பழைய நியதிகளை மட்டுமே வற்புறுத்தக் கூடாது

பக்தியில் பழைய நியதிகளை மட்டுமே  வற்புறுத்தக் கூடாது

சமத்துவம்,சம உரிமை போன்ற பொது நியதிகளும் மனிதனின் நீண்ட தீவிரமான பயணங்களின் மூலம் கண்டடைந்தவைதாம்.பொது நியதிகளைக் கடைப்பிடிப்பதில் உள்ள நெருக்கடிகளை பிரச்சனைகளை  திறந்த மனதோடும்,நேர்மையுடனும்  விவாதிக்கவேண்டும் .விவாதிப்பது கண்டடைந்த பொது நியதிகளை நோக்கி சில அடிகளை எடுத்து வைக்க உதவ வேண்டுமே அல்லாது பொது நியதிகளை பின்னோக்கி இழுக்கும் நோக்கத்தை அடைப்படையாகக் கொண்டிருத்தல் கூடாது .ஏற்பில் முன்னகர வேண்டும் .அய்யன் அய்யப்பனின் சன்னிதானம் பெண்களும் கலந்து கொள்ளும் வண்ணம் மாற்றம் கொள்ள வேண்டியது காலத்தின் முன் அவசியம்.தவிர்க்கவே இயலாதது.

அய்யப்பன் கோவிலுக்கு பெண்கள் செல்வதில் உள்ள நடைமுறை சிரமங்கள் சிலவற்றை தொடர்ந்து அய்யனின் சன்னிதானத்திற்கு சென்று வருகிறவன் என்கிற வகையில் நெருக்கமாக அறிவேன்.பல்லாண்டுகளாக ஆண்கள் மட்டுமே சென்று கொண்டிப்பதன் காரணமாக ,ஆண்கள் செல்ல மட்டுமே உகந்ததாக அதன் வசதிகள் பழக்கமாகியிருக்கின்றன.சன்னிதானத்தைச் சுற்றியுள்ள வரிசைகள் தற்போது ஆண்கள் செல்வதற்கு மட்டுமே உகந்தவையாக உள்ளன.இதுபோலவே பெண்கள் மட்டுமே செல்லத் தகுந்த கோவில்களும் கேரளாவில் உள்ளன.எப்போது பொது நியதியை முன்னிட்டு நான் ஏன்  செல்லக் கூடாது ? என்று ஒரு கேள்வி உருவாகி  எழும்பி விடுகிறதோ அப்போதே பழைய நியதிகள் நொறுங்கிவிடுகின்றன.புதிய நியதி என்பது புதிய தர்மம்.அதனைக் காப்பாற்றுவதன் பொருட்டு புதிய ஏற்பாடுகள் செய்யப்பட்டே ஆகவேண்டும்.பழைய முறையைப் பின்பற்றி வருகிறோம் ,பழைய நியதிகளைப் பின்பற்றி வருகிறோம் ,பெண்ணை ஏற்றுக் கொள்ள இயலாது என்று பதில் சொல்லவே இயலாது.அப்படி பதில் சொல்லுவது அதர்மம்.

சாதி இங்குள்ள எல்லாசாதிகளுக்குமே ,தலித்துகள் உட்பட மிகப்பெரிய வசதியாக இருந்து வருகிறது.அதற்குப் பல்வேறு நுண்ணிய காரணங்கள் உள்ளன.இங்குள்ள யாருக்குமே சாதி அகலுவதில் விருப்பமும் இல்லை.ஏன் என்பதை நாம் ஒருபோதும் வெளிப்படையாக விவாதிக்கவும் இல்லை.அதன் ஒருபகுதியை வசதிக்கு  ஏற்ப எல்லோரும் பேசிக் கொண்டிருக்கிறோமே அன்றி ஏன் சாதி இங்கு அத்தியாவசியமானதாக இருக்கிறது என்று விவாதித்துப் பார்க்கவே இல்லை.வெளிப்படையாக விவாதித்துப் பார்த்தால் மட்டுமே அதனைக் கடக்கும் வழிகளும் தோன்றும்.சாதி என்பது அதனாலேயே தொடர்ந்து இருப்பு பூண்டிருக்கிறது.அதில் சிக்கல்கள் இருக்கின்றன என்பதனை முன்வைத்து சாதியை நியாயம் செய்ய முடியாது.ஏராளமான மக்கள் அதன் பொருட்டு நீக்கம் செய்யப்பட்டதை அல்லது வசதியானவகையில்  ஏற்பு செய்யப்பட்டதை ஏற்றுக் கொள்ள முடியாது .அதனைப் போலத்தான் வழிபாடுகளில் ஆன்மீகத்தில்,பக்தியில் ,யோகத்தில் பெண்கள் ஈடுபடுவதை   தடைசெய்ய முடியாது.கூடாது.யோகத்தில் நிறைய பெண்கள் ஈடுபடுகிறார்கள்.சமூக  நீக்கம் செய்யப்பட்டிருந்த பெருவாரியான மக்கள் ஈடுபடுகிறார்கள்.யோகத்தில் ஈடுபடலாம் பக்தியில் ஈடுபட மறுப்போம் என்பது நீதியில்லை.தர்மமும் இல்லை.

ஈடுபடுபவர்கள் கேட்கவில்லை என்றோர் பராது சொல்லித் திரிகிறார்கள்.பொது நியதிகளை ஈடுபடுபவர்கள் மட்டும்தான் கேட்க வேண்டும் என எதிர்பார்ப்பது சுத்த மடத்தனம்.பொது நியதிகளை , பொது தர்மங்களை தர்மத்திற்கு எதிரானவர்கள் கூட கேட்கலாம் என்பதுதான் பொது நியதிகளின் சாராம்சம்.இது விளங்கவில்லையெனில் நீ யாராக இருந்தாலும் பேசுவது பழமைவாதம் தான்.

எங்கள் பகுதிகளில் உள்ள சிலர் அய்யப்பன் சந்நிதானத்திற்கு பெண்கள் வரக் கூடாது என்றோர் கையெழுத்தியக்கம் நடத்தினார்கள் .அதில் தி.மு.க காரர்கள் வரையில் இருந்தார்கள்.நமது அகமுரண் இது.என்னிடம் கையெழுத்து கேட்டவர் ஒரு தி.மு.க காரர்.இந்த அக முரண்கள் எனக்கு புதிதொன்றும் கிடையாது.ஏன் போகக் கூடாது ? என்று கேட்டேன்.வந்தவை வழக்கமான பதில்கள் .உங்கள் அன்னையும் ,உங்கள் மகளும் தீட்டென்று கருதியிருக்கிறீர்களா ? என்று கேட்டேன்.அப்படி ஒருவேளை கருதுவாயாயின் நீ வாழ்வதற்கே லாயக்கற்றவன்.நீ தான்  அந்த சந்நிதானத்திற்குப் போகத் தகுதியற்றவன்  .அங்கே அய்யப்பனுக்குத் துணையாக மஞ்சமாதா இருக்கிறாள் .பெண்குழந்தைகளை அவள் ஏற்றுக் கொள்ளாமலா போய்விடுவாள் ? எல்லா பெண்களும் யாரோ ஒருவனுக்கு மகள்.யாரோ ஒருவனுக்கு அன்னை.பகவதி.பகவதியை தீட்டென்று கருதும் தகுதி பெற்ற மகான் இங்கே யாரேனும் இருக்கிறார்களா ?

ஒரு குரல் எதிர்த்துக் கேட்பது வரையில்தான் பழக்கத்தின் வலிமை பேசலாம்.பழக்கத்தின் முன்பாக உரிமையின் குரல் எழுத்துவிடுமாயின் பழக்கத்தைப் புறந்தள்ளி விட வேண்டும்.அதுவே தர்மத்திற்குத் துணையிருத்தல்.

வழிமறிக்காதீர்கள் போலீஸ்கார்

வழிமறிக்காதீர்கள் போலீஸ்கார்

எங்கள்  ஊர் பகுதிகளை  ஒட்டித்தான் வெகுகாலமாக வசித்து வருகிறேன்.அங்கே இங்கே போய் வந்ததெல்லாம் மிகவும் சொற்ப காலங்கள்தாம்.எவ்வளவோ மகாராஜாக்கள் ஆண்டிருக்கிறார்கள் .எம்.ஜி.ஆர்.,கருணாநிதி ,ஜெயலலிதா இப்படி.தமிழ்நாட்டில் ஆளுவோரை மகாராஜாக்கள் என்றுதான் சொல்லவேண்டும்.மக்கள் வாக்கிலிருந்து வருகிற மகாராஜாக்கள் .இந்த பகுதிகளை சுற்றி லட்சம் மைல்களுக்கும் அதிகமாக பயணித்திருப்பேன்.வாகனங்களில் வண்டிகளில் என்று பல விதங்களில் .ஏன் கூடங்குளம் எதிர்ப்புப் போராட்டத்திற்காக கேரளா எல்லையில் கடற்கரையில் தொடங்கி திருநெல்வேலி எல்லை வரையில் நடந்தும் வந்திருக்கிறோம்.ஆனால் திருடர்களை போன்று போலீஸ்கார்  பொறி வைத்துப் பிடிப்பதை இப்போதுதான் காண்கிறேன்.எல்லோருமே எடப்பாடியை ஒத்த ,பன்னீரை ஒத்த சம வயது தோற்றங்காட்டும் போலீஸ்கார்.முதல் முறையாக மகாராஜா தோரணை அற்ற நடுவயது போலீஸ்கார் தோரணை கொண்ட ஆட்சியாளர்கள் இவர்கள்தாம்.பணிவின் பயங்கரவாதிகள்.

கேரளத்தின் நிலை வேறு .அதனால் தமிழ்நாட்டின் அரசியல் குறைபாடுடையது என்னும் எண்ணம் எனக்கில்லை.இங்குள்ள சுபாவம் இப்படி.மக்கள் மகாராஜா தோரணை இருந்தால் மட்டுமே ஏற்கிறார்கள்.ஆந்திரத்திலும் இவ்வாறே .இங்கெல்லாம் அரசாள ஒரு மீமனித பாவனை அவசியம்.கேரளத்தில் உண்மையில் பழைய மகாராஜாக்களே கூட மக்களை போன்றுதான் இருந்திருக்கிறார்கள்.திருவிதாங்கூரின் புகழ் பெற்ற ஆட்சியாளர் மார்த்தாண்ட வர்மா.அவருடைய புகைப்படங்களை நம் மக்களிடம் காண்பித்தால் பஞ்சாயத்துத் தலைவர் என்று கூட ஏற்க மாட்டார்கள் .இவை எள்ளி நகையாடுதற்கு உரியவை அல்ல .அருகில் அருகில் இருந்தாலும் அவர்கள் உருவாகி வந்த கூறுகளும் நம்முடைய கூறுகளும் வேறுபட்டவை.

கழிந்த வாரத்தில் மண்டைக்காடு   அம்மையைப் பார்ப்பதற்காக சென்று வந்தேன்.மூன்று இடங்களில் நிறுத்தி போலீஸ்கார் சோதனை நடத்தினார்கள்.சுசீந்திரம் எல்லையைத் தாண்டி ஈத்தாமொழி ,போலீஸ்கார் சரகம் தாண்டி ராஜாக்கமங்கலம்.ராஜாக்கமங்கலம் போலீஸ்கார் இருட்டுக்குள்  நரிகளைப்  போன்று நின்று கொண்டிருந்தார்கள்.அவர்கள் நின்ற இடம் அவர்களுக்கே பாதுகாப்பற்ற இடம்.ஏராளம் சுடலைகளும் பழைய அறுபத்தியேழு தலைப்பாகை கட்டிகளும் ஒடுக்கம் கொண்டிருக்கும் களம்.

ஆவணங்கள் அத்தனையும் சரியாக இருக்குமேயாயின் போலீஸ்கார் மன அழுத்தத்திற்கு உள்ளாகிறார்கள்.இரண்டு மூன்று தினங்களுக்கு முன்னர் நேசமணி நகர் போலீஸ்காரிடம் மாட்டிக் கொண்டேன்.ஹெல்மட் அணிந்திருந்தேன்.அனைத்து ஆவணங்களும் வாகனத்தில் உண்டு.கால்களை  அகட்டி ஒரு போலீஸ்கார் நடுரோட்டில் வண்டியை நிறுத்தினார் .என்ன விஷயம் என்று கேட்டேன்.சில கணங்கள் என்ன விஷயம் என்று அவருக்கும் சொல்லத் தெரியவில்லை.எனக்கும் நிலை விளங்கவில்லை.தலைவிளக்கில் ஒரு கறுப்புப் புள்ளி வைக்க வேண்டும் என்றார்.அப்படியா ? என்று கேட்டேன்.அப்படித்தான் என்று சாலையில் ஒதுங்கி கொண்டார்.பின்னால் அமர்ந்திருந்த என்னுடைய மகளுக்கு எதுமே விளங்கவில்லை.

நேற்று எங்கள் வீதியில் வாகன சோதனை .வீட்டிலிருந்து இரண்டு கிலோ மீட்டர் தொலைவுக்குள் வரும் வாகனங்களை ஹெல்மட்  சோதனை  இடக்கூடாது, செய்யக் கூடாது என்றுதான் சட்ட புத்தகத்தில் இருப்பதாக இருப்பதாகச் சொல்கிறார்கள்.சட்ட புத்தகத்தில் இருக்கட்டும்.இவர்களுக்கு ஏன் இவ்வளவு நெருக்கடி ஏற்பட்டிருக்கிறது ? அரசாங்கம் டார்கெட் கொடுத்து வேலைவாங்குகிறது என்கிறார்கள் சிலர் .அரசாங்கத்திற்கு டாஸ்மாக்கையும் ,இப்படியான வழிப்பறி வசூலையும் விட்டால் வேறு வழியில்லை என்பது புரிகிறது.என்றாலும் எல்லாவிதமான வழிப்பறி யுக்திகளையும் சாதாரண ஜனங்களிடம்தான் காட்ட வேண்டுமா என்ன ? உண்மையில் வருமானப் பிரச்சனை அரசாங்கத்திற்கு என்றால் முறைப்படி மக்களிடம் தானம் கோரலாமே ? மக்கள் தரமாட்டேன் என்றா சொல்லப்போகிறார்கள் ? தானம் கேட்பது குற்றமொன்றுமில்லை தமிழ்மரபில். நான் அந்த ஆய்வாளரிடம்   அய்யா நீங்கள் நின்று கொண்டிருப்பது ஒரு வீட்டின் முற்றம்.இந்த வீதியின் பெயர் சித்திரை வீதி என்று சொன்னேன்.வீதியா வீதியா என்று ஈகோ முறிந்து புலம்பிக் கொண்டு நின்றவரிடம் "மாக்கோலம் போட்டிருக்கிறார்கள் பாருங்கள்" என்று காட்டிக் கொடுத்துவிட்டுத் திரும்பினேன்.

ராகு கேது பெயர்ச்சி வரையில் இப்படித்தான் இருக்கும் என்று அண்ணாச்சி விக்ரமாதித்யன் சொன்னார்.எனக்கு சரி .ஊருக்கெல்லாமே ராகு கேது சிக்கலா என்ன ? ராகுவும் கேதுவும் எப்போது பெயரும் ?

"சிலேட் " விக்ரமாதித்யன்-70 சிறப்பிதழ்

சிலேட்
சிலேட் இந்த இதழ் "விக்ரமாதித்யன் - 70 " சிறப்பிதழாக தயாராகிக் கொண்டிருக்கிறது.விக்ரமாதித்யன் பற்றிய கட்டுரைகள் மற்றும் வழக்கம் போல கதைகள்,கவிதைகள்,மொழிபெயர்ப்புகள் என இதழ் அமையும் .படைப்புகளை அனுப்பலாம்.slatepublications @gmail .com .மின்னஞ்சல் முகவரிக்கு படைப்புகளை அனுப்புங்கள்.
ஒவ்வொரு முறையும் இதழுக்கு செலவாகும் முதலீடுகளை திரும்பப் பெற இயலுவதில்லை.வழக்கமாக சிற்றிதழ்கள் ஏற்றுக் கொண்டிருக்கிற பிரச்சனைதான் இது.மீண்டும் மீண்டும் இதனை மிகைப்படுத்த விரும்பவில்லை. இதனையும் கடந்தே ஒவ்வொரு இதழையும் கொண்டுவர வேண்டியிருக்கிறது .சிற்றிதழ் இயக்கம் என்பது இதனையும் உள்ளடக்கியதுதான் .கால தாமதங்களுக்கு வேறு எதுவும் காரணங்கள் இல்லை. சிலேட் இந்த இதழ் உருவாக்கத்திற்கு உதவி செய்ய விரும்புவோர்
உங்கள் பங்களிப்பினை செலுத்த விரும்புவோர் கீழ்கண்ட கணக்கில் செலுத்தி விட்டு ,எங்களுக்கு தகவல் தெரியப்படுத்துங்கள்.நன்றி.
LAKSHMI MANIVANNAN.A
SB AC NO - 183100050300648
TAMILNAD MERCANTILE BANK LTD
IFSC CODE -TMBL0000183
தொடர்பு எண் - 8220386795

கவிதைகள் - 16

கவிதைகள் - 16

ஏரியைக் கடந்து செல்லும் போது
ஏரியை எடுத்துச் செல்கிறேன் என்று சொல்லமாட்டேன்
சிறுவயதில் மாடுகளுடன் சேர்ந்து குளித்த
ஊருணியை
அதில்
விட்டுச் செல்கிறேன்
என்பது
ஏரிக்குத் தெரியும்

ஏரி தன்னில் நீந்தத்
தொடங்குவதை அப்போது
அறியும் அந்த
பால்ய வயதின்
ஊருணி

பிறகு
இரண்டுபேரும் முங்கிக் குளிக்கத் தொடங்குகிறார்கள்
என்னுடைய
நீலத்தில்
சின்னஞ்சிறிய குளம்
சமுத்திரமாக

2

வழக்கமாக போகும் தெருவில்
நான் எதையும் காண்பதில்லை
வழக்கமாகப் போகும் தெருவிலிருந்து
படியிறங்கி
அல்லது
படியேறி
வழக்கமற்ற தெருவுக்குள்
காலடி எடுத்து வைக்க
வழக்கமாக போகும் தெருவின்
அத்தனை காட்சிகளையும் பார்த்து விடுகிறேன்

அப்போதும் வழக்கமற்ற தெருவின் காட்சிகளைப்
பார்க்கிறேனா ?

வழக்கமற்ற பெண்
சுட்டிக் காட்டிச் செல்கிறாள்
எனக்குள் எப்போதும்
கனன்று கொண்டிருக்கும்
காதலை

அக்கரையில் இருந்து
ஊர் பார்க்கப் பிடிக்கிறது

எப்போதும் விளிம்பிலிருந்து
பார்த்து கொண்டிருக்கிறேன்
மையத்தை

வழக்கமான பேருந்தில்
நான் தூங்கிய வண்ணம் பயணிப்பது
ஏன் என்பது
இப்போது
உங்களுக்கு
விளங்கியிருக்கக் கூடும்

குழந்தை வைத்து உடைத்த
பொம்மையில்
இருக்கிறதென்
பொருள்

3

இரும்பு மனுஷியைக் காண
கூட்டிச் சென்றான் நண்பன்

இரும்பு மனிதனைப் போல
அவள் இரும்பு மனுஷி
என்ற அறிமுகத்தோடு

இரும்பு மனுஷி இரும்புக்
கோட்டைக்குள் இருந்தாள்
இரும்பு நகைகள் அணிந்திருந்தாள்
இரும்பு
மட்டுமே அவளின் உபயோகம்
இரும்பு மனிதர்களின்
ராணுவத்தில்
ஐந்தாறு இரும்புக் கோழைகள்

டாய்லெட் எப்படி போவீர்கள்
என்று இரும்பு மனுஷியைப்
பார்த்துக் கேட்டேன்
வெஸ்ட்ரன் டைப் இரும்பு டாய்லெட்
உபயோகிக்கும்
இரும்பு மனுஷி
மலம்
துரு துருவாய் போகிறதென
சொல்கிறாள்

இரும்பைச் சாப்பிட்டால்
வேறு எப்படித்தான்
அது போகும் ?

சரியாகத்தான் நடக்கிறது எல்லாம்
இரும்பு மனுஷியின்
இரும்பு வீட்டில்

பாவம் இரும்பு மனுஷி வீட்டில்
வளரும் இரும்பு நாய்க்குட்டி
இருமுவது போலும்
குரைக்கிறது

4

உத்திரம் இடிந்து நொறுங்கிய கொட்டாரம்
நா நூறு வருட புளியமரம் பேய்க் கோலம் பூண்டு 
தின்று ஜீரணிக்கும் கோட்டை மதிற் சுவர்
நீ பெரிதா நான் பெரிதா என வானெழும்பி
கேட்கிறது

பூசையற்றுப் போன பின்வாசல் பகவதி
பிறழ்வுற்றுக் கிடக்கிறாள்

மாதவிடாய் கழுவி நாறிய
ராஜகுமாரிகளின் பின் கொல்லையில்
செழித்து நிற்கும் புற்களில்
அறுத்த கடாவின் ரத்த மணம்
கொழுப்புக் கவிச்சி

காலம் பகிரங்கமாக கீறப்பட்ட
உடலாய் வெயிலடிக்கும்
கொட்டாரத்தின்
முற்றத்தில்
கோலமிட்டு
மலரிட்டுச் சென்றிருப்பவள்
கொட்டாரத்திற்கு
வெளியில் வசிப்பவளாக
இருக்கலாம்
நான் அவளை கொட்டாரத்தினுள்
இருப்பவளாக
விரும்புகிறேன்
வயததிக
பால்ச் சிறுமியாக

அவள் வாள் வைத்து வரைந்த
கோலம்போலும் இருக்கிறது
அது

[ வேலுத்தம்பி தளவாய்க்கு ]

5

நான் அந்த ஊருக்குப் போய் வந்தான்
நான்
இந்த ஊருக்குப் போய் வந்தான்
எந்த ஊருக்குப் போய் வந்தாலும்
தன் சொந்த ஊரில்தான்
இருந்து கொண்டிருக்கிறான்
இந்த
நான்

அவருடன் செல்கையில்
அவர் காட்டித் தந்தார்
இவருடன் செல்கையில்
இவர் காட்டித் தந்தார்
எல்லோருடன் செல்கையில்
புயல்வேகத்தில் படிவிட்டிறங்கி
எல்லோருடனும் சேர்த்தேறி
அமர்ந்து கொண்டது
அவருக்கும் தெரியவில்லை
இவருக்கும் புரியவில்லை

இந்த நானை எடுத்துக் கொண்டுதான்
பெருமழையில்
ரயில் பயணத்திலும் போய்க் கொண்டிருந்தான்
தன் மாயவுலகை
தானே தாண்டித் தாண்டி செல்கிறது
இந்த நான் பயணிக்கும்
சொந்த ரயில்

6

ஒரு கவிஞன் பலசமயங்களில் கவிஞன் அல்லாதவனாகவும் இருக்கிறான்
ஒருகவிஞன் பலசமயங்களில் கவிஞனாகவும் இருக்கிறான்
ஒருகவிஞன் பலசமயங்களில் காட்டுப்பூச்சியாகவும் இருக்கிறான்
எப்போதோ
சிலசமயங்களில்
எப்போதோ
தவறவிட்ட
இலந்தைப் பழமாகவும் இருக்கிறான்
ஒருபெரும்
விபத்துக்கு நிகராக
ஒரு முதுபெரும் பேருந்து
ஏறி மிதித்துச் சென்ற
ஒரு நாய் போல

அது குரைக்கும் சப்தம்
எழும்பும் காட்சியை
புதுவேலை செய்பவனாகவும் இருக்கிறான்
ஒரு பிரம்ம முகூர்த்தத்தில்

7

எனக்கு ஸ்தல புராணம் கிடையாது
வரலாறும் இல்லை
உளவியலுக்கு வேலை இல்லை
பாரம்பரியம் கிடையாது

நியாபகத்தை
வெட்டி விட்டு விட்டேன்

நித்தத்தில் வலித்து
விரிந்த மலர்
எனதுடல்
சரித்திரம் தேடாதே
வந்து பார்
ஆனால்
தொடாதே

நீ தொட்டு எடுத்துக் கொள்ள
என்னிடம்
ஏதும் கிடையாது



உள்ளும் புறமுமாக
வந்து செல்கிறது அலை
உள்ளும் புறமுமாக
அசைகிறது கடல்

உள்ளத்தில் கடல் வந்து நிரம்ப
புறத்தில்
கிடந்தது புரள்கிறது
இந்த மாலை

நினைவுகளில்
மணல் ஊரல்

கடலுக்கும் எனக்கும் இடையில்
எழும்பி நிற்கும் பாலத்தில்
அமர்ந்து
இருவருமே பேசிக் கொள்ளவில்லை

கடல் வெளியிலிருக்கிறதென்று
தோன்றும் 
மாயை



பச்சை பக்கட்
சிவப்புக் குடம்
நீல தூக்குவாளி
ஆரஞ்சு நிறத்தில்
பிளாஸ்டிக் வாரியல்
நடுவில் உயர்ந்து நிற்கிறது

சைக்கிளின் பின்புறத்தில்
வண்ணமயமாக கட்டியிழுத்து
வந்து கொண்டிருக்கிறான்
இன்றைய நாளின்
வீதி வியாபாரி
மனமெல்லாம் நிறைந்து நிற்கிறாள்
இளைய மகள்
கனவில் வலித்து
மிதிபட்டு வந்து கொண்டிருக்கிறது
சைக்கிள்

அம்மன் வாகனத்தில் வருகிறாளென்று
எழுந்து நின்று
கும்பிட்டு விட்டேன்

10 

ஆட்டம் தொடங்க
இன்னும் அரைநாள்
அவகாசம்

இப்படி பல்வேறு தாடிக்காரர்கள்
வந்த வண்ணமும் சென்ற வண்ணமும்
இருக்கிறார்கள்

செவலை தாடிக்காரர் இருவர்
அரைகுறையாகப் புரிந்தும் புரியாமலும்
லோடு ஆட்டோவில் பயணப்பட்டுக் கொண்டிருக்கிறார்கள்

சாலைப்பழுதில் ஏறி இறங்குகையில்
சரிந்து மோதிக் கொள்கின்றன
கொம்புகள்

ஊருக்குப் புறத்தே
தற்காலிக பிளக்ஸ் பேனருக்கு
இந்த பக்கம் சவுக்கில்
வெள்ளை தாடிக்காரர்
உரசிக் கொண்டு நிற்கிறார்
கருப்பு தாடிக்காரர்
குறி விறைக்க எழுச்சியடைகிறார்
செவலை தாடிக்காரர்
சிறுநீர் ஒழுகல்

நாளை விடியுமென்று
பல கணக்குகள் வைத்திருக்கும்
கருப்ப சாமி
சுற்றிச் சுற்றி வருகிறான்

நான்குபேருக்கும்
பதற்றம் ஒன்றே

மூன்றுபேர் தப்பப் போவதில்லை
என்பது எல்லோரும் அறிந்ததுதான்
கருப்பசாமி
தப்பித்து விடுவாரா ?
இந்த கருணை
விளையாட்டில்

11

எல்லோரும் அறிவாளிகளாக இருக்கும்
இந்த ஊரில் என்னதான் செய்யமுடியும் சொல்லுங்கள்

பயிர் விளைவதில்லை
தொழில் நடப்பதில்லை
தோட்டம் செழிப்பதில்லை
அலுப்பின் ஆபாச
மேகமூட்டம்

வினோதம் இல்லை
விளையாட்டும் இல்லை
எல்லோரும் அறிவாளிகளாக இருக்கும்
இந்த ஊர் எப்படி விளங்கும் சொல்லுங்கள் ?

முதலில் எல்லோரும் அறிவாளிகளாக இருக்கும்
ஊரை விட்டு
எல்லோரும் கிரிமினல்களாக இருக்கும்
ஊருக்கு சென்று விட வேண்டும்
அது குழந்தையின் ஊராக
இருக்கக்
கடவது

சந்தோசம் ,நிம்மதி இரண்டையும்
கற்றுத் தேர்ந்தால்
மடையனின் ஊர் வாசல் கதவு
திறக்கும்

அங்கு சென்றால்
அறிவாளிகளின் ஊரைத்
தலை முழுகிவிடலாம்

பின்னர் இந்த அறிவாளிகளின்
ஊருக்குத் திரும்பும் போது
நம்மை யாருக்கும் அடையாளம் தெரியாது
புல்லாங்குழலால்
கண்ணன் வீட்டில் தேநீர்
அருந்தலாம்
இயேசுவின் காட்டில்
செவலை ஆட்டுடன்
தீயை மேயலாம்

தர்க்கத்தை வெட்டி விறகெரிக்க
சூபி
வந்துதிப்பான்
நமக்குள்ளிருக்கும் நண்பன்
நமக்காக

எல்லோரும் அறிவாளிகளாக இருக்கும் ஊரில்
டெங்கி
வேகமாகப் பரவிக் கொண்டிருக்கிறது
எச்சரிக்கை

12 

முதலில் இரண்டு டீ போடுங்கள்
இல்லை மூன்றாகப் போடுங்கள்
மற்றொருவர் வருகிறார்

ஐந்து டீ பின் ஆறானது
ஏழானது எட்டாவது
எட்டு பத்தானது
அந்தோன் சேகவ் தொடங்கி
கோணங்கி
ஜெயமோகன்
ஷோபா சக்தி
பினராய் விஜயன்
எடப்பாடி
தெருவெல்லாம் துள்ளிக் குத்தித்த டீ
மோடி

யாரும் டீ க்கு பணம் தர வேண்டாம்
என்று கூறி
கடைக்காரருக்கு குறிப்பால் உணர்த்தும்
நண்பன்
ஓங்கிய குரலில்

அனைவர் வாயிலும் தேநீர் சுவையை
எடுத்தகன்று பைக்கில் கடந்து
செல்கிறான்

வென்னீராயிற்றுச்
சுவை
தெருவில் மரித்த டீயின்
அமைதி

13

அன்னபூர்ணா கபே
கோமதியம்மாள் நடத்தியது
நெய் தோசை
பால் ஆப்பம்
என இருந்த போது
அவளை இளவரசியென்றுதான் சொல்வார்கள்
அவள் கை காப்பி சாமி பிரசாதம்

அன்னபூர்ணாவில்
புரோட்டா கறி கிடைத்தபோது
கோமதியம்மாள் கண்களை சுற்றி
கருவளையம் வந்தது

எதிர்த்த பால்பாண்டி கடையில்
புரோட்டாவை நிறுத்திவிட்டு
நெய் தோசைக்கும்
பால் ஆப்பத்திற்கும்
மாற்றினாள்
பால்பாண்டி மனைவி
வரலெட்சுமி

வரலெட்சுமி போட்டுத் தருகிற காப்பியில்
கோமதியம்மாளின் முகம் தெரிகிறது என்கிறார்கள்
கஸ்டமர்கள்

நேருக்கு நேராக
வரலட்சுமியை பார்த்த கோமதியம்மாள்
பார்த்தாயா...
உன்னை போல நானிருக்கிறேன்
என்னைப் போல நீயிருக்கிறாய்
தோற்றம்தான் வேறே என்று
செல்லம் கிள்ளிச் சென்றாள்

கிள்ளிய இடத்தில்
பூத்துக் குலுங்கிற்று
மல்லிச்சரம்

14 

குற்றத்தின் பெயர் காரணம்

நீங்கள் அவர் மீதுதான்
குற்றம் சொல்கிறீர்கள்
நீங்கள் தண்டிக்க நினைப்பதும்
அவரைத்தான்
குற்றத்தில் என் பங்கு ஏதுமில்லை
இனிமேலும் கூட எனக்கு அதனைச் செய்யும்
உத்தேசமுமில்லை

அவர் இல்லாமற் போனால்
நீங்கள் நிம்மதியடைவீர்கள் என்பதும்
விளங்குகிறது

உங்கள் பராது முழுதும்
அவர் மீதுதான்
என்மீதில்லை

நீங்கள் அவர் மீதுதான்
குற்றம் சொல்கிறீர்கள்
ஆனால் பாருங்கள்
எனது உடல் முழுவதும்
பதற்றத்தில்
நடுங்குகிறது

என் மீது சொல்லப்படாத புகாரை
என் மீது வைக்கப்பட்ட புகார் போல
நீங்கள்
சொல்லிக் கொண்டே
இருக்கிறீர்கள்
எதிரே நின்று

உங்கள் உடல் நடுங்கும்
நீங்கள் செய்யாத குற்றத்திற்கு
என்ன பெயர்
சுட்டுவீர்களோ
அதுதானே
நீங்கள் சுட்டும் குற்றத்திற்கும்
பெயராக இருக்க முடியும் !

எனக்கு உங்கள் குற்றச்சாட்டு
நட்சத்திரத்தை பற்றியதென
ஒருநாள்
வரக்கூடும்

அப்போதும் நீங்கள்
குற்றம் சொல்வீர்கள்
எனதுடல் நடுங்காத
குற்றத்தை

15

விதைக்குள்ளிருந்து வெளியேறிய விருட்சமாக
நீங்கள் வெளியேறியதையும்
பின்னே
விதைக்குள் நுழைந்தடங்கிய
விருட்சமாக
நீங்கள்
உருமாறியதையும்
சாட்சியாக உடனிருந்து
சந்தர்ப்பத்தில்
பார்த்துவிட்டேன்
காட்சிகளே

உடலை உதறினால்
எத்தனையெத்தனை காட்சிகள்
உதிர்கின்றன
இந்த மரத்தில் ?

16

நினைவும் உடலும்
தனித்தனியே பிளவுண்ட போது
நினைவு என்ன நினைத்திருக்கும் ?
நான் கண்ட காட்சிகள் என்று பேணப்பட்ட
காட்சிகள் உடலின்றி
தனித்திருந்திருக்கும்

உடலை உதறிய காட்சிகள் அவை
காட்சிகளை உதறிய உடல் இது

நினைவை நோக்கி உடலும்
உடலை நோக்கி நினைவும்
காட்சிகளில் பற்றியெரிய
நானெழும்பி
சுடரானேன்
உதறிய உடலை எட்டிப்பிடித்த
நான் என்பது நான்தானா
இல்லை வலியில் இணைந்து
முகம் காட்டும்
திருநீற்றுக் காட்சிகளா ?

இரணியல் அரண்மனையை எழுத்தாளர்கள்,கலைஞர்களுக்கான இல்லமாக மாற்றுங்கள்

இரணியல் அரண்மனையை எழுத்தாளர்கள்,கலைஞர்களுக்கான இல்லமாக மாற்றுங்கள்.

சில தினங்களுக்கு முன்பு நானும் சூர்யாவும் மண்டைக்காடு பகவதியைப் பார்த்து விட்டு இரணியல் அரண்மனைக்குச் சென்றோம்.மழைச் சாரல். அரண்மனையின் சிதிலம் பேயாக முகத்தில் அறைந்தது.எவ்வளவோ பேர் இது குறித்து பேசியிருக்கிறார்கள்.இவ்வளவு சிதைவடைவதற்கு முன்னரே இதழ்கள் இது பற்றி எழுதியிருக்கின்றன.

சுமார் நான்கு கோடி ரூபாய் புனரமைப்பதற்காக ஜெயலலிதா 2014  ல்  நிதி ஒதுக்கீடு செய்திருக்கிறார்.இதுவரையில் எந்த பணியும் தொடங்கப்படவில்லை.மட்டுமல்ல இப்போதைய நிலையில் அதனைப் புனரமைப்பது இயலாது .எல்லாமே முடிந்து கிடக்கிறது இரணியல் அரண்மனை.சிதிலத்தை அகற்றி எழுத்தாளர்கள்,கலைஞர்களுக்கான ஒரு இல்லமாக அதனை மாற்றலாம்.இந்த அரண்மனைக்கு இதுவரையில் எல்லோரும் கூட்டு சேர்ந்து செய்துள்ள  அநீதிக்கு அது பரிகாரமாக அமையும்.ஆனால் யார் செய்வார்கள் இதனை ?

கேரளா அரசுக்கு இந்த அரண்மனையின் பேரிலும் ஆரம்பத்தில் ஆர்வம் இருந்தது.இப்போதைய நிலையை காணும்போது தமிழ்நாடு அவர்களுக்கு இதனை விட்டுத் தந்திருக்கலாம் என்றே தோன்றுகிறது.அவர்கள் நிச்சயமாக பொலிவு படுத்தியிருப்பார்கள்.அந்த அரண்மனையின் சிதைவு நம் மனம் அடைந்துள்ள சிதைவோடு ஒப்பிடும் படியானதுதான்.நான் பார்த்துக் கொள்கிறேன் என்று சொல்லி பட்டினி போட்டு கொல்வதற்கு   நிகரானது ,இந்த அரண்மனைக்கு தமிழ்நாடு செய்திருக்கும் துரோகம்.

கோடிக்கணக்கில் மதிப்புள்ள தேக்கு உத்திரங்கள் விறகுக் கட்டைகளை போன்று எலும்பு தள்ளி நிற்கின்றன.

எனக்கு உள்ளே செல்லவே பயமாக இருந்தது.காலத்தின் பேரில் நமக்குள்ள இளக்காரம் ஒரு மமதை என்பதனின்றி வேறில்லை.கால பைரவன் மீதான  அலட்சியம் அது .துயரம்.

தற்போது   இந்த பழுது தமிழ்நாடு இந்து சமய அறநிலையத் துறையின் பொறுப்பில் உள்ளது.என்னைக் குற்றுயிருடன் வதைத்துக் கொல்வதற்காகத் தான் ,என்னை பொறுப்பில் வைத்துக் கொண்டிருந்தீர்களா ? என்று இந்த அரண்மனை கேட்பது போலிருக்கிறது இப்போது.கேள்வி யாருடைய செவியேனும் சென்றடையுமா ?

ஊழ்  .மீண்டு வரும் ஊழ்

கந்துவட்டி பலரோடும் தொடர்புடையது

கந்துவட்டி பலரோடும் தொடர்புடையது

கந்து வட்டி என்பது பணத்தைக் கொடுத்து வசூலிப்பவரோடு  மட்டும் தொடர்புடைய ஒன்று அல்ல. பணத்தைக் கொடுத்து வாங்குகிறவர்கள் ஆயிரம் ரூபாய்க்கு ஐம்பது ரூபாய் என்கிற வட்டியில் கல்லூரிப் பேராசிரியர்கள்,வங்கி மேலாளர்கள் ஆகியோரிடமிருந்து பணத்தைப் பெறுகிறார்கள்.இவர்கள் மட்டும் என்றில்லை இவர்கள் எங்கள் ஊரில் அதிகம்.மேலும் பல தரப்பினரும் உண்டு. வசூலித்தாலும் இல்லையென்றாலும் ,வசூலிக்க இயலவில்லை என்றாலும் ஐம்பது ரூபாய் வட்டியை இவர்கள் கொடுத்தே ஆகவேண்டும்.இல்லையெனில் இவர்கள் தொழிலே செய்ய முடியாது.இரண்டாவது காரியம் சமூகத்தின் உள்ள பண தேவையின் இடத்தை கந்து வட்டி பிடித்து வைத்திருக்கிறது.நமது அனைத்து வங்கிகளும் ஏழைகள் விஷயத்தில் அடைந்துள்ள படுதோல்வியின் இடத்திலேயே இது வாழ்ந்து கொண்டிருக்கிறது.

ஒரு கல்லூரிப் பேராசிரியர் கந்து வட்டியில் பத்து லட்சம் ரூபாய் முதலீடு செய்கிறார் என வைத்துக் கொள்ளுங்கள்.மாதம் அவர் அதன் மூலம் ஐம்பதினாயிரத்திற்கும் அதிகமாக வருமானம் பெறுகிறார் என்று பொருள்.யோசித்துப் பார்த்தால் வசூலிப்பவன் இவ்விஷயத்தில் வெறும் கூலியாள் மட்டுமே என்பது புலப்படும்

இன்று கந்து வட்டிக்கு நிகரான தனியார் பைனான்ஸ் நிறுவனங்கள் வந்து விட்டன.உதாரணமாக பஜாஜ் பைனான்ஸ் போல .இருப்பினும் அன்றாடம் பணம் தேவைப்படுகிற ,அன்றாடம் இந்த கடனை அடைக்கிற ஏழைகளுக்கும் சற்று மேல்மட்டத்திலேயே இந்த நிறுவனங்கள் பணிபுரிகின்றன.கந்து வட்டி ஒருவரை கிளர்ச்சியடையச் செய்து நுகர்வோர் ஆக்குவதில்லை.நெருக்கடியான விதியை மீறிய துன்பங்களில் இருந்து விடுபடும் மார்க்கமாக ஏழைகள் இதனைத் தேர்வு செய்கிறார்கள்.நிறுவனங்கள் முப்பதினாயிரத்திற்கும் மேல் நீ துணி மேலும் பல தரப்பினரும் உண்டு.  இன்ன கடையில் உனக்கு கடன் தருகிறோம் என்பது வரையில் கிளர்த்துகின்றன.இந்த நிறுவனங்களின் முன்பாக தீக்குளிக்கும் வைபவங்கள் நடப்பதற்கும் அதிக கால அவகாசங்கள் ஏதும் இருக்கப்போவதில்லை.கந்து வட்டி நேரடியாக கண்களில் தெரிகிறது . நிறுவனங்கள் மறைந்திருக்கிறார்கள்.இவை அனைத்து காரியங்களும் நமது வங்கிகள் ஏழைகளிடமிருந்து அந்நியமாகியிருப்பதன் அடையாளங்கள்தான்.

காலையில் சந்தைக்கு ஐந்து மணிக்கு கிளம்பி  காய்கனிகள் வாங்கி தெருவில் விற்று அன்றாடத்தில் போரிடும் ஒரு பாட்டிக்கு தினமும் காலையில் கொஞ்சம் பொருள் தேவைப்படுகிறது.ஆயிரம் ரூபாய் கந்து வட்டிக்காரர்களிடம் பெறுகிறாள் .900  ரூபாய் கையில் கொடுப்பார்கள் .மாலையில் ஆயிரமாக தரவேண்டும்.மதியத்திற்குள் அவளுக்கு இதனையும் கொடுத்து போக அவளிடம் 200  ரூபாய் மிஞ்சும்.கடன் இருக்கும் ஏழைகள் எப்போதும் கலங்கி கொண்டே இருப்பார்கள்.பணம் இருப்பவர்கள்தான் கடனுக்குக்  கலங்குவதில்லை.அதனை அடைத்தால்தான் நிம்மதி பெறுவார்கள். 

இதனை ஏன் சொல்கிறேன் எனில் ,இவர்களை வங்கிகள் இதுகாறும் திருப்பி செலுத்தமாட்டார்கள் என்கிற நோக்கிலேயே அணுகுகின்றன.இது உண்மையில்லை.இந்த அவசர கடன் தேவையை தினமும் அவர்கள் பைசல் செய்யவில்லை எனில் அவர்களுக்கு வாழ்வும்  இல்லை .தொழிலும் இல்லை என்பதே உண்மை .ஏழைகள் கடனைத் திருப்பித் தரமாட்டார்கள் என்பது ஒரு மேல்தட்டுப் பார்வை.கண்ணோட்டம்.இதில் துளியும் உண்மை கிடையாது.  இப்படி பெறுகிற பெற்று தினம் தோறும் பைசல் செய்கிற ஆயிரக்கணக்கான தொழிலாளிகள் இங்கே வாழ்ந்து கொண்டிருக்கிறார்கள்.ஆனால் இதனை ஈடுகட்டுவதற்கென்று நமது வங்கிகளிடம் இதுகாறும் ஒரு அமைப்பு கூட கிடையாது.இது முதல் வகை .

லாரி தொழிலாளிகள் வெளியூருக்குக்  கிளம்பும் போது பணம் தேவைப்படும் .டீசல் ,சுங்க வரி, போலீஸ் மாமூல் இத்யாதி விஷயங்கள். ஊருக்குத் திரும்ப ஒருவார காலம் ஆகும் .வந்ததும் முதல் வேலையாக பணத்தைக் கொடுத்து விட்டுத்தான் கீழே இறங்குவார்கள்.வீட்டில் நடையெடுத்து வைப்பது பிற்பாடுதான்.இது ட்ரிப் வட்டி.இப்படி வாங்க வேண்டுமா ? என்று மத்தியதர வர்க்கத்து சிலிபிரட்டிகளுக்கு தோன்றலாம்.இந்த தொழில் செய்பவனுக்குத் தெரியும் .இப்படியில்லாமல் தொழிலே செய்ய முடியாது என்பது.பத்தாயிரம் வாங்கிச் சென்றால் இரண்டாயிரம் சேர்த்து தரவேண்டியிருக்கும்.இந்த வட்டித் தொழில் செய்து பெரியாளாகி அமைச்சர் ஆனவர்கள் வரையில் உண்டு.சகல காட்சிகளிலும் ஜெயிக்கும் தரப்பில் இருப்பவரும் இவர்தான்.ம .தி.மு.க ; தி.மு.க ; அ .தி.மு.க என்று ஒரு வேறுபாடும் இங்கே வேலை செய்வதில்லை.எனவே இந்த கட்சிக்காரர்கள் கந்து வட்டிக்கு எதிராகக் குதிப்பது இருதயத்திற்கு நல்லதல்ல.பிற கட்சி காரர்கள் சொக்கத் தங்கம் என்பதல்ல இதற்கு அர்த்தம் .அவர்களுக்கு வேறுவிதமான நாலாந்தர வேலைகள் பணிகள் நிறைய இருக்கின்றன.இந்த வகை  கந்து வட்டியில் இரண்டாவது வகை .இதனை ஈடு செய்வதற்கும் நம்மிடம் கூட்டுறவு அமைப்புகள் உட்பட எதுவுமே கிடையாது.

தின வட்டி சிறு வியாபாரிகளிடம் மொத்தமாகக் கொடுத்து விட்டு தினமும் வசூலிக்கும் வகை.சிறு வியாபாரிகள் சேமிப்பிற்காக இதனை வாங்குபவர்களும் இருக்கிறார்கள்.வியாபார முதலீடுகளுக்கு பயன்படுத்த வாங்குகிறவர்களும் இருக்கிறார்கள்.இதனைத் தவிர்த்து சந்தையில் கோடிக்கணக்கில் சிலநாள் தேவைகளுக்கு கைமாற்றம் செய்யப்படுகிற பணத் தேவைகளுக்கு என வட்டிக்கு விடுகிறவர்கள் உண்டு.இவர்களில் பலரும் அரசியல் பிரமுகர்களே

தவிர சொத்து வாங்குதல் விற்றல் தொடர்பாக ,வாகனங்கள் வாங்க விற்க , திருமண அவசர தேவைகள் இவை எல்லாவற்றையுமே ஏழைகள் மட்டத்தில் ஈடுசெய்யும் அமைப்பாக வங்கிகள் எதுமே நமக்கு கிடையாது.

ஏழைகளிடம் வங்கி அமைப்புகள்   இது போன்ற விஷயங்களில் உதவிகரமாக இருக்க வேண்டுமெனில் முதலில் அவை எளிமையாக இருத்தல் வேண்டும்.ஆனால் நமது வங்கி அமைப்புகள் அனைத்துமே சிக்கலானவை.வாரா கடன்களிடம் பக்குவமாகவும் ,ஒழுங்காக திரும்பிச் செலுத்தும் தரப்புகளிடம் சிக்கலாகவும் முகத்தை திருக்கிக் காண்பிப்பவை.ஏழைகள் தேவையில் முன் நின்று கொண்டிருக்கும் போது காத்திருக்கவே இயலாது.நமது வங்கி அமைப்பிடம் உதவி பெற்று பாட்டி சந்தைக்குச் செல்ல வேண்டுமெனில் நடக்குமா ?

எந்த தீமை நிறைந்த அமைப்பாக இருந்தாலும் சரி ,அது தேவையை முன்னிட்டு மட்டுமே மக்களிடம் செல்வாக்கு பெறுகிறது.அந்த தேவையை வேறொன்று ஈடுகட்டாதவரையில் அந்த தீமை ஒழியப்போவதில்லை என்பதே நிஜம்.இன்று கந்து வட்டியால் வாங்கியவர்கள் பாதிக்கப்பட்டிருக்கிறார்.கந்து வட்டி கொடுத்ததாலேயே தூக்கில் தொங்கிய பலரும் உண்டு.அழிந்தோர் அநேகம் பேர்.

இங்கே வாங்குகிறவன் ,வசூலிப்பவன் இருவருமே தற்கொலைப் பாவைகள்தாம்.மறைந்திருப்போர் அல்ல.

அபத்தம் என்பது ...

அபத்தம் என்பது ...

அகம் எவ்வாறு கம்போஸ் பண்ணப்பட்டு மெருகு பெறுகிறதோ ,அது உருகுலையும் போது ஏற்படுவது அபத்தம்.அது ஒரு நிலை. ஒன்றில் ஒன்று முற்றுப்பெறுகிற, முடிவடைந்த ஒரு நிலை. .

படைப்பாளிகளைப் பொறுத்தவரையில் இத்தகைய நிலை பல முறை தங்களில் ஏற்படுவதை உணர்ந்திருப்பார்கள்.உடல் கட்டுமானம் உருவாவதைப் போன்றுதான் இதுவும் அகக்கட்டுமானம்.உடல் கட்டுமானம் ஒவ்வொருவருக்கும் ஒருமுறை மட்டுமே நிகழ்கிறது .ஆனால் இந்த அகக் கட்டுமானம் அவ்வாறானதல்ல.ஒன்று உருக்குலைந்து சரிந்து வீழ ,அபத்தம் தொற்றி மற்றொன்று எழுகிறது.அகக்  கட்டுமானத்தில் சரிவே நிகழாதவனை அல்லது சரிவு ஏற்படும் வாய்ப்பே இல்லாதவனை அல்லது அதற்கான வாய்ப்பே ஏற்படாதவனை சராசரி மனிதன் எனலாம்.அவனிடத்தில் படைப்பு செயல்பாடுகள் ஏதுமில்லை.இவன் தனக்கு வெளியில் எதுவுமே கிடையாது என்னும் நம்பிக்கை தரப்பைச் சார்ந்தவன்.தனது நம்பிக்கையை இரும்பு உலக்கையாக பற்றிக் கொள்ள நினைப்பவன் .

இருப்பதிலேயே சுலபமான அகக் கட்டுமானம் என்பது அரசியல் கருத்துக்களால் அதனைக் கட்டி நிரப்புவதுதான்.விடலைகள் ,பெரும்பாலான அவசர பெண்கள் ,இரும்பு ஆண்கள் அதிகம் செலாவணி ஆவது இதன் பால்தான்.காரணம் அரசியல் பொருட்களால் அகக் கட்டுமானம் பெறும் போது ஒரு கூட்டு பலம் கிடைக்கிறது.கூட்டு அதிகாரம் கிடைக்கிறது.இது  போலவே தகவல்களால் உண்டாகிற அகம் ,அறிவுப் பொருட்களால் நிரப்பப்பட்ட அகம் என பலதும் உண்டு.இவற்றை அகச் செயல்பாட்டின்  ஆரம்ப நிலை என எடுத்துக் கொண்டால் ஒவ்வொன்றிலும் தொடர்ந்து பின் வருகிற அபத்தத்தை கண்டுணர்ந்து அடுத்த அடுத்த நிலைகளுக்குள் நகர்ப்பவனே சுய ஓர்மை அடைகிறான்.

எவ்வண்ணம் கட்டப்பட்டுள்ள அகமாக இருப்பினும் சரி அது அபத்தத்தை  எட்டும் போது படைப்பு ரீதியில் எதிர்கொள்ளும் போது கலையாகிறது.அழகு பெறுகிறது.அகம் கட்டப்பட்டுள்ள விதம் இரும்பு நம்பிக்கையாக மாறிவிடும் எனில் அது அபத்தத்தை எதிர்கொள்ள நேர்கையில் கடுமையான மனச் சோர்வையும் எடுத்துக் கொண்டு உடன் வரும்.ஆன்மிகம் நல்ல வாய்ப்புதான்.ஆனால் படைப்பின் அளவிற்கு சிறப்பான வாய்ப்பு அது என்று சொல்வதற்கில்லை.ஏனெனில் ஆன்மீக ரீதியில் கட்டப்படுகிற அகம் உடனடியாக இரும்பு நம்பிக்கைகளுக்குள் புகுந்து விடுவதற்கான வாய்ப்புகளை அதிகம் கொண்டது.அரசியலைப் போன்றே இங்கும் கூட்டம் அதிகம்.அதிகார பலம் அதிகம்.எங்கு கூட்டத்தின் அதிகார பலம் எதுவுமின்றி தனித்து வாழும் விதத்தில் உனக்கொரு அகம் வாய்கிறதோ ,அதுவரையில் உனக்கு பயணப்படுத்தலுக்கான தூரம் அதிகமாக இருப்பதாகவே பொருள்.

சரி.படைப்பு ரீதியில் எதிர்கொண்டால் அபத்தம் நீங்குமா ? என்றால் உறுதியில்லை.சகலத்தையும் பரிசீலிக்கும்  போது இதில்  கொஞ்சம் கூடுதல் சிறப்பிருக்கிறது  அவ்வளவுதான்.

வரலாற்றால் ,வன்முறைகளால் ,அரசியல் அறிவால்,மதங்களால் நிகழ்ந்தவற்றை ஒப்பிடும் போது படைப்பு மேலானது.அவ்வளவுதான் 

அப்பச்சி காமராஜர் ...

அப்பச்சி காமராஜர் ... காமராஜ் பற்றி "நீயா நானா " விஜய் டிவி ஷோவில் பேசுவதற்காக ஆன்டனி ஒரு வாரம் முன்னதாக அழைத்தார்.நான் வர...