"பொன்பரப்பி"எழுத்தாளர்கள்,கலைஞர்கள் கண்டனக்கூட்டம்

பொன்பரப்பி தலித்துகள் மீதான தாக்குதலை கண்டித்து
எழுத்தாளர்கள் ,கவிஞர்கள் ,ஓவியர்கள் கண்டனக்கூட்டம்

வருகிற சனிக்கிழமை 27  - 04  -2019  சென்னை தமிழர் திடலில் தலித்துகள் மீதான தாக்குதல்களைக் கண்டித்து எழுத்தாளர்கள்,ஓவியர்கள் ,கவிஞர்கள் பங்கேற்கிற கண்டனக் கூட்டம் நடைபெற உள்ளது.அனைத்து தரப்பு எழுத்தாளர்களும்,கலைஞர்களும் இந்த நிகழ்வில் பங்கேற்று இது போன்ற நாகரீகமற்ற தாக்குதல்கள் ,மேலும் நடைபெறா வண்ணம் இருக்க தங்களுடைய கருத்துக்களை பதிவு செய்ய வேண்டுமென கேட்டுக் கொள்கிறோம்.இதுபோன்ற மனித விரோத தாக்குதல்களுக்கு துணை நிற்கும் அரசு அமைப்புகள்,காவல் துறை ஆகியவற்றின் காதுகளில் நமது ஒருமித்த குரல் சென்று சேர இந்நிகழ்வு உதவும்.இந்த நிகழ்வு நம்முடைய மனச்சாட்சியின் குரலே அன்றி யாதொரு நிறுவன பின்புலமும் இல்லாதது.தன்னிச்சையானது.தன்னிச்சையான எழுத்தாளர்களுடைய குரல்கள் ,கலைஞர்களின் வெளிப்பாடுகள் இது போன்ற இக்கட்டான தருணங்களில் முக்கியமானது.நமக்குள் உள்ள வேறுபாடுகளை கைவிட்டு இது போன்ற சந்தர்ப்பங்களில் உடன் நிற்கும் தேவை தற்போது அதிகரித்து வருகிறது.தன்னிச்சையான சார்பு நிலையற்ற குரல்களை இதனை முன்னிட்டு ஒருங்கிணைகிறோம்.

பொன்பரப்பியிலும் அதனை ஒட்டி பிற இடங்களிலும் நடைபெற்றிருக்கும் தலித்துகள் மீதான திட்டமிட்ட சாதீய தாக்குதல்கள் நாம் வாழ்வது ஒரு நாகரீக சமூகத்தில் தானா என்கிற ஐயத்தை ஏற்படுத்துகின்றன .வீடுகளை கூட்டமாகச் சென்று சாதீய வெறியர்கள் தாக்கும் காணொளிகள் தலை குனிவை ஏற்படுத்துகின்றன.போலீசும் ,அரசும் சாதீய வெறியர்களுக்கு சாதமாக நிற்கிற துர்பாக்கியமான நிலை நாம் இன்று பொதுவில் அடைந்திருக்கும் வீழ்ச்சியினைக் குறிப்பதே.எத்தகைய சந்தர்ப்பங்களிலும் நாம் நாகரீகமான சமூகமாக முன்னேறுதலையே குறிக்கோளாகக் கொண்டிருத்தல் வேண்டும்.ஒருமித்த குரல் மூலம் நாம் இந்த சமூகத்திற்கும் ,அரசிற்கும் அதற்காக அழுத்தம் ஏற்படுத்த வேண்டிய தேவை ஏற்பட்டுள்ளது.இது நமது கடமை .நம்முடைய எதிர்கால சந்ததிகளை மீண்டும் காட்டுமிராண்டிகள் கரங்களில் ஒருபோதும் விட்டுத் தந்து விடக் கூடாது.

இந்த நிகழ்விற்கு

ஜெயமோகன்
கோணங்கி
எஸ்.ராமகிருஷ்ணன்
சோ.தர்மன்
ராமானுஜம்

ஆகியோர்  கலந்து கொண்டு தங்களுடைய கண்டனத்தை தெரிவிக்க ஒத்துக் கொண்டிருக்கிறார்கள்.கவிஞர்கள் ஷங்கர் ராம்சுப்ரமணியன் ,கண்டராதித்தன் இந்நிகழ்வில் பங்கேற்கிறார்கள்.பிறரையும் முயற்சித்துக் கொண்டிருக்கிறோம்

இந்த நிகழ்வினை குறைந்த கால அவகாசத்தில் நடத்த வேண்டிய தேவை இருப்பதால் அனைத்து விதமான தரப்பு எழுத்தாளர்களையும் ,கலைஞர்களையும் தொடர்பு கொண்டு வருகிறோம்.தனிப்பட்ட முறையில் ஒவ்வொருவரையும் இந்த நிகழ்வில் பங்கேற்க அழைக்க வேண்டும் என்பதே எங்களுடைய அவா .எனினும் காலமின்மையை மனமேற்கொண்டு இதனையே அழைப்பாக ஏற்று அனைத்து தரப்பினரும் பெருந்திரளாகக் கலந்து  நம்முடைய குரலை ஓங்கி முன்வைக்க வேண்டும்.நம்மாலும் பெருந்திரலாகத் திரண்டு மனச்சாட்சியின் குறையை முன்வைக்க முடியும் என்பதனை தீய சக்திகள் உணரவேண்டும் .

இந்த நிகழ்வு ஓவியர் சந்ரு அவர்களின் தலைமையில் நடைபெற உள்ளது.அசதா ,லிபி ஆரண்யாயுடன் நானும் இணைந்து மூவரும் ஒருங்கிணைகிறோம்

அனைவரும் ஒத்துழைப்பு தாருங்கள் .தங்கள் வருகையை இந்த பக்கத்திலேயே பதிவு செய்யலாம்.நண்பர்களுக்கு இந்த நிகழ்வு செய்தியினை பகிரலாம்