வண்ணதாசன் என்ற கல்யாண்ஜி

வண்ணதாசன் என்ற கல்யாண்ஜி ; மனதால் எழுந்து வந்த பாதை



பெரும்பாலானவர்களை பாதித்தவர் கல்யாண்ஜி . கவிதை எழுத விரும்பும் ஒருவர் அவரால் பாதிப்படையவில்லையெனின் இனி பாதிப்படைவார் .இரண்டு வகையினர் இங்கே இருக்க முடியும் .ஒன்று அவரால் ஏற்கனவே பாதிப்படைந்தவர் இல்லையெனில் இனி பாதிப்படையவிருக்கிறவர்.அன்றாடத்தின் பல நுட்பங்களை அவர் வாசகனுக்கும் கடத்திவிடக் கூடியவர்.சீண்டும் பண்பும் கொண்டவர்தான் என்றாலும் அது அவரில் மிகவும் சிறிய பகுதி.அன்பால் மூடியிருக்கும் பகுதி அது.தமிழில் வாசகர்கள் அதிகம் உள்ள கவிஞரும் அவரே.

கவிஞர்களில் அவர் ஏற்படுத்திய தாக்கத்தை வெளிப்படையாகப் பேசியவர்கள் மிகவும் குறைவு.நவீனத்துவ விமர்சகர்கள் அவரை பொருட்படுத்தி பலமாக நிராகரித்தார்கள்.அதற்கு அது ஒரு காரணமாக இருக்கலாம்.இந்த நிராகரிப்பையும் மீறி அவர் ,தான் என்ன செய்ய வேண்டுமோ அதனை தொடர்ந்து செய்து கொண்டேயிருந்தார்.

தமிழ் சூழலில் இதழியல்,விமர்சனம் கலையிலக்கியம் எல்லாவற்றிலுமே ஏராளமான பாரபட்சங்கள் உண்டு.அவற்றில் பல கண்களுக்கு புலப்படாதவை.சாதி,மதம் ,கருத்தியல்,கொள்கை ,கட்சி என நிறைய . இவற்றையெல்லாம் ஒருவர் எதனால் எதனால் ? என்று தேடித் கொண்டேயிருக்க முடியாது.அடைப்படையில் தமிழர்கள் நாகரிகமான வேடம் தரிப்பவர்களே அன்றி நாகரீகமானவர்கள் கிடையாது.நாகரிகம் என நான் சுட்டுவது ஒருவர் எழுதுவதால் நமது உள் உலகை புரட்டிப் போடுகிறார் அல்லது மாற்றியமைக்கிறார் ,அல்லது உள் உலகுடன் தொடர்பு கொள்கிறார் எனில் அதனை மறைக்கக் கூடாது.அவர் அழுக்குச் சட்டையணிக்கிறார் என்பதற்காகவும் மறைக்கத் தேவையில்லை, புதுத் துணி உடுத்துகிறார் என்பதற்காகவும் மறைக்கத் தேவையில்லை.இங்கே மறைப்பவர்களில் பலர் வெளிப்படுத்தினால் இன்னாருக்கு எதிராகப் போய்விடுமோ என கருதுபவர்கள். இத்தகைய தந்திரங்கள் எதற்குமே இலக்கியத்தில் வேலையில்லை.

கடும் நிராகரிப்பிற்கு பதிலாகச் செய்வதற்கு ஒரேயொரு காரியமே உண்டு.நிராகரிக்க இயலாத இடத்திற்கு நகர்ந்து கொண்டேயிருப்பது.கடும் நிராகரிப்பைப் போல ,புறக்கணிப்பைப் போல அதிகபட்ச வாய்ப்பை நல்கும் ஆற்றல் வேறு எதற்கும் இல்லை.அங்கீகாரம் பல சமயங்களில் ஆற்றல் முழுதையுமே முடக்கிவிடும்.புறக்கணிப்பின் வழியாக எழுந்து இன்று அதிகபட்ச தமிழ் வாசகர்களின் கரங்களை சென்று சேர்ந்திருப்பவர் கல்யாண்ஜி.இது அவ்வளவு எளிதல்ல.

அவரிடம் உள்ள நல்லபண்புகளில் ஒன்று ஏற்பது.பின்னாட்களில் ஏதேனும் ஒன்றேனும் செய்வார்கள் என்கிற நம்பிக்கையை ஏற்படுத்துகிற விதமாக கதைகளிலோ கவிதைகளிலோ ஒரு வரி எழுதியிருந்தால் கூட அவர்களுக்கு விரும்பி அந்த வரி சரியாக இன்னதெனச் சுட்டி கடிதம் எழுதியிருப்பார்.இப்படியெழுதியவன் கலைஞனாகத்தான் இருக்க முடியும் என்றும் ஒரு வரி சேர்த்து ஊக்குவித்திருப்பார்.இதில் 99 % பேர்கள் கலைஞனுக்கு கால் சட்டை தைத்துப் போடுவதற்கு கூட இயலாதவர்களாகப் போயிருப்பார்கள்.மீதம் மிஞ்சிப் பிழைக்கிறானே ஒருவன் அவனுக்காவே அத்தனை பேருக்கும் எழுதிக் கொண்டிருக்கிறார்.பதினைந்து ஆண்டுகளுக்கு முன்னர் என்னிடமிருந்த நூலகம் மிகப்பெரியது.இப்போது பலர் தேடித் கொண்டிருக்கும் நூல்களும் அதில் அடக்கம்;நான் சில சந்தர்ப்பங்களில் மீண்டும் தேடும் நூல்களும் அதில் அடக்கம். அபார நம்பிக்கையில் ஒவ்வொன்றாக எடுத்து விதைத்துக் கொண்டிருப்பேன்.யோசிக்கையில் ஒன்றிரண்டு முளைத்திருக்கிறது.இந்த ஒன்றிரண்டு முளைக்க இப்படியெல்லாம் செய்து கொண்டுதான் இருக்க வேண்டும்.அம்புட்டு விதையும் அரச மரம் ஆவதில்லை.ஆனாலும் தாங்காது.சு ரா இரண்டு பிரதிகள் இருக்கும் பல நல்ல நூல்களை எனக்குத்தந்திருக்கிறார்.விக்ரமாதித்யன் , ஜெயமோகன் ,கோணங்கி என எல்லோருமே தந்திருக்கிறார்கள்.சு.ராவிற்கு நாகராஜன் அன்புள்ள சுந்தர ராமசாமிக்கு என கையெழுத்திட்டு தந்த நாளை மற்றொரு நாளே பிரதி ஒன்றும் என்னிடம் இருந்தது.விதிவசமாக அது ஆன்டன் செகாவ்வுடன் இணைந்து நாலாந்தரமான ஒரு நபரிடம் போய் சேர்ந்தது.அதுகுறித்த கசப்புணர்ச்சி இப்போது வரையில் என்னிடம் இருக்கிறது.என்றாலும் என்ன செய்ய முடியும் ? அம்புட்டு விதையும் அரச மரம் ஆவதில்லை.ஆனாலும் தாங்காது.

கல்யாண்ஜி என்னுடைய முதல் கதை "36A பள்ளம்" புதிய பார்வை இதழில் வெளியான போது இன்லேண்ட் லெட்டரில் வண்ணதாசன் என ஒப்பிட்டு ஒரு கடிதம் எழுதியிருந்தார்.கடிதத்தின் பல வரிகள் இப்போதும் எனக்கு நினைவில் உள்ளது.பின்னர் ஒருமுறை தபால் கார்டில் ஒரு கடிதம் வந்தது.முப்பதாண்டுகளுக்கு முன்னர் உள்ள விஷயங்கள் இவை.பின்னர் அவர் மதுரையில் வேலை பார்த்த சமயங்களில் சென்று பார்ப்பதை வழக்கமாகக் கொண்டிருந்தேன். பத்தாண்டுகளுக்கும் மேலாக இலக்கியவாதிகள் சு.ரா ; ஜெயமோகன் ,விக்ரமாதித்யன் உட்பட பலர் எழுதிய கடிதங்களையும் அப்போது நாங்கள் வசித்த ஒழுகும் வீட்டில் பாதுகாத்தே வைத்திருந்தேன் . ஒழுகும் வீடெனில் மழை நின்றபின்னரும் பதினைந்து நாட்களுக்கு மேலாக ஒழுகிக் கொண்டிருக்கும்.

மழை நின்றபிறகு மின்விசிறி உட்பட அனைத்து மின்சாதனங்களையும் மாற்றுவோம்.மழையெனில் பயமாக இருக்கும், சில நாட்களில் தூங்கவே முடியாது.ஒரு கறுப்புக் குடை அளவிற்கு மழை விழாத ஒரு மூலை உண்டு.அதன் மீது இரண்டு கறுப்புக் குடைகளை வைத்து அதில் இரண்டு குழந்தைகளையும் கிடத்தியிருப்போம் . ஒருநாள் பார்க்கும் போது கடிதங்களெல்லாம் ஓரங்களில் பூஞ்சை ஏறியிருந்தன. கோணங்கி எழுதிய கடிதங்கள் வந்து சேரும் போதே பூஞ்சை அகப்பட்டே வந்து சேரும்.சு ராவின் கடிதங்களை அவருடைய மகனிடம் கொடுத்து விட்டேன்,என்ன வேண்டுமானாலும் செய்து கொள்ளட்டுமென்று.பிற கடிதங்களை ஏதேதோ நண்பர்களிடமெல்லாம் தேவையெனில் பாதுகாத்துக் கொள்ளுங்கள் என்று சொல்லி கொடுத்து விட்டேன்.உண்மையில் அப்போதெல்லாம் இதுவரையில் கூட உயிர்பிடித்து நிற்பேன் என நம்பிக்கையிருந்ததில்லை.

ஜெயமோகன் அப்போது எழுதிய கடிதங்கள் பலதும் முக்கியமானவை. நான் எழுதும் போது என்ன என்ன பிழைகள் செய்கிறேன் என்பதை சரியாக சுட்டிக் காட்டி எழுதியிருப்பார்.ஒரேவிதமாக வாக்கியங்கள் தொடர்ந்து மூன்று முறைக்கு மேல் வரக்கூடாது என்றெல்லாம் சொல்லித் தந்தது அவரே.பல்வேறு கருத்தியல் மோதல்களை புரிந்து கொள்ளவும் விவாதிக்கவும் உதவிய நீண்ட கடிதங்களும் உண்டு.அவையெல்லாம் தவறிவிட்டன.யாரிடம் தந்தேனோ அவர்கள் பத்திரப்படுத்தியிருந்தால் இன்று வேறு பலருக்கும் உதவக் கூடியவை அவை.ஆனால் அந்த மழைவீடு ஏராளமான பேருக்கு இடம் கொடுத்தது என்கிற அந்தஸ்தும் உடையது.

சு ராவின் பாதிப்பு எனக்கு இளம் வயதில் அதிகம் இருந்ததாலும் கல்யாண்ஜியை மிகவும் இறுக்கமாக நான் நெருங்கியதில்லை என்பதையும் சேர்த்தே ஒப்புக் கொள்கிறேன்.சு ராவின் பாதிப்பு என்பது எதிர்மறையானதல்ல.நவீனத்துவத்தின் அழுத்தமான பாதிப்பு அது.இப்போது உதாரணம் சொல்ல வேண்டுமெனில் இளங்கோ கிருஷ்ணன் , கே.என் .செந்தில் ஆகியோர் ஒருவிதமான கறார் தன்மையை,பார்வையை வெளிப்படுத்துகிறார்களே அதனை நவீனத்துவத்தின் குணம் எனலாம்.எனக்கு முற்றிலுமாக உடுத்த உடுதுணி,அணிந்த அரைஞாண் கயிறு உட்பட அனைத்தையும் கழற்றியெறிந்து விட்டு விலகியோட , நவீனத்துவத்தின் அனைத்து பாதிப்புகளில் இருந்தும் விலக ; என்னுடைய வாழ்வே எனக்கு பேருதவி செய்தது.கல்யாண்ஜி எதோ ஒரு விதத்தில் நவீனத்துவம் கடந்தவர் என்றே நினைக்கிறேன்.

சின்னச் சின்ன விஷயங்களின் கடவுள் என்பது பிற்காலங்களில் உருவாகி வருகிறது.அருந்ததி ராய் அதன் மேல் வெளிச்சம் உண்டாக்குகிறார்.ஆனால் கல்யாண்ஜி என்கிற கவிஞனையும் சரி , வண்ணதாசன் என்கிற சிறுகதை ஆசிரியனையும் சரி அதற்கெல்லாம் முன்னரே தோன்றிய சின்னச் சின்ன விஷயங்களின் கடவுள் எனலாம்.

அவர் உடல் நலம் ,நீள் ஆயுள் ,நிறை செல்வம்,உயர் புகழ்,மெஞ்ஞானம் பெற்று நீண்ட காலம் வாழவேண்டும் என்று இந்த பிறந்த நன்னாளில் மனப்பூர்வமாக என்னுடைய வாழ்த்துகளைத் தெரிவித்துக் கொள்கிறேன்.வாழ்க வளமுடன்

இவையெல்லாம் எப்போதோ முன்னரே தெரியப்படுத்தியிருக்க வேண்டியவை.ஒருவர் பேரில் நமக்கிருக்கும் மதிப்பை அவ்வப்போதே தெரிவித்து விட வேண்டும் என்பதை இப்போதுதான் உணர்ந்திருக்கிறேன்.பிறகு காலம் நமக்கந்த அவகாசத்தை தருமா என்றெல்லாம் தெரியாது.தாமதத்திற்கு அவர் பொறுத்துக் கொள்வாராக...

இந்தியாவில் இடதுசாரிகள் வீழ்ச்சியடையக் கூடாது

இந்தியாவில் இடதுசாரிகள் வீழ்ச்சியடையக் கூடாது

அவர்கள் அதிகாரத்தில் இருக்கத் தேவையில்லை.இருக்கலாம் இல்லாமல் போகலாம்,அது பிரச்சனையில்லை. கருத்தியல் ரீதியில் அவர்கள் வீழ்ச்சியடையக் கூடாது.மக்களை புரிந்து கொள்வதில் பிழை செய்யக் கூடாது.அப்படி ஏற்படும் பிழைகள் இந்தியாவில் காங்கிரசை வீழ்த்தும். வடிகட்டிய இடதுசாரித்தனத்தை கொண்டதுதான் இந்தியாவில் காங்கிரஸ் கட்சி.நேருவிடம் இருந்து இது உருவாகிறது,இந்திரா காந்தியிடம் தொடர்கிறது.நரசிம்ம ராவ் ,மன்மோகன் என அதற்கு நெடிய மரபு இருக்கிறது.முக்கியமான காங்கிரஸ் தலைவர்கள் பலர் பேசுகிற குரல் கொஞ்சம் வடிகட்டிய இடதுசாரி குரல் அவ்வளவுதான் .எனவே இடதுசாரிகள் இந்தியாவில் ஜீவனை விட்டால் காங்கிரசும் உடன் சேர்ந்து மரிக்கும் .இந்தியாவில் காங்கிரஸ் கட்சி துவழக் கூடாது .அதற்காகவேனும் இடதுசாரிகள் இன்றியமையாதவர்கள்.உலகளாவிய விதத்தில் இடதுசாரிகளை காங்கிரஸ் உள்வாங்கிய விதமே அவர்களில் பெரும்பாலானோரை மக்களை நோக்கி சிந்திப்பவர்களாக வைத்திருக்கிறது.

கொஞ்சம் ஆழ்ந்து கவனிப்பீர்களேயாயின் உங்களுக்கு ஒரு விஷயம் புலப்படும்.மம்தா வங்கத்தில் இடதுசாரிகளுக்கு எதிரானவரே.ஆனால் மம்தாவிடம் வெளிப்படும் அனைத்து விஷயங்களும் இடதுசாரித் தன்மை கொண்டவை.கேரளத்தில் இடது தலைவர்களானாலும் காங்கிரஸ் தலைவர்களானாலும் அவர்களிடம் இருப்பது இடதுசாரி பண்புகளே.ஏன் இவற்றைச் சொல்கிறேனெனில் இந்தியாவைப் பொறுத்தவரையில் இப்பண்பு அழியக்கூடாதது.ஏனெனில் இவர்களிடம் மட்டுமே பாரபட்சத்திற்கு எதிரான குணம் இருக்கிறது.மிகப்பெரிய ஜனத்திரள் கொண்ட இந்தியா போன்றதொரு தேசத்தில் பாரபட்சங்களுக்கு எதிரான குணம் என்பது மிகவும் முக்கியமானது .

பாரபட்சத்தை அரசியல் கருத்தியலாக ஏற்று கொள்வது மிகவும் துரதிர்ஷ்டவசமானது .மனிதன் பாரபட்சமானவன் தான்.சமமற்றவனே.மற்றொன்றை விஞ்சுவதற்காக அவன் சதா போராடிக் கொண்டிருப்பவன்.நானும் அவனும் ஒன்றில்லை என்பதற்காக போராடுகிறவன்.அதற்காக அரசமைப்பின் கருத்தியலாக அது ஏற்கப்படக் கூடாது.ஒருவேளை சிறிய நவீனமடையாத சிறிய நாடுகளுக்கு பாரபட்சம் பொருந்தக் கூடும்.அப்போதும் அது நவீனமடைதலுக்கு முந்தைய காலகட்டத்தில் வாழும் நாடு என்றே கொள்ளப்படும்.

எனக்கு சிறுவயது முதலே பாரபட்சம் எவ்வளவு பெரிய அநீதி என்பது தெரியும்.எல்லாவிதமான குற்றங்களிலும் நான் பாரபட்சத்தையே பிரதானமான குற்றமாகக் கருதுவேன்.பிற குற்றங்களில் மன்னிப்பதற்கோ,ஏற்பதற்கோ வாய்ப்புள்ள ஒரு பகுதி இருந்து கொண்டுதானிருக்கிறது.ஆனால் பாரபட்சம் என்னும் குற்றம் அளவில் மிகப்பெரியது.மிகக்கொடியது.

இடதுசாரிகளுடன் எவ்வளவோ முரண்கள் எனக்கு இருக்கின்றன.ஆனால் அவர்களிடம் நான் கண்ட போற்றுதலுக்குரிய பண்புகள் ஆதர்சமானவை.இப்போதும் வற்றாதவை .சிறு வயதிலேயே இடதுசாரிகளுடனான தொடர்பு எனக்கு ஏற்பட்டு விட்டது.மாநில அளவில் நடைபெறுகிற பெரிய நிகழ்வுகளில் இந்திய அளவில் பெரிய தலைவர்கள் பங்கெடுப்பார்கள்.எல்லோரும் சாப்பாட்டு கூடத்திற்கு ஒன்றாக வரிசையில் நின்று கொண்டிருப்போம்.இந்த பண்பு மிகுந்த கவர்ச்சியை அவர்களிடம் சிறு வயதிலேயே எனக்கு ஏற்படுத்தியது.பாடங்கள் ,பேதங்கள் இவையெல்லாம் இருக்கட்டும் .எனக்கு பிரதானமானதாக இருந்தது இந்த பண்பே.இப்போது பிறரிடமும் இப்பண்புகள் உருவாகியிருக்கலாம்.ஆனால் அது இடதுசாரிகளிடம் இருந்து உருவாகி வந்தது.நான் புரிந்து கொண்டது "இந்த வரிசை "என்கிற ஒன்று நம்முடைய மனங்களில் உருவாகாதவரையில் நாம் நவீனமடையவில்லை என்பதே .

பொது இடங்கள் பொது வரிசைகள் பொது  மருத்துவமனைகள் எல்லாயிடங்களிலும் தொடர்ந்து நம்முடைய சகிப்பின்மையை கவனித்து கொண்டே வருகிறேன்.வரிசையை குறுக்கிடுபவர்களே இங்கே அதிகம்.வரிசையில் நிற்க முடியாது என்பதற்காகவே பலர் தனியார் மருத்துவமனைகளைத் தேர்வு செய்கிறார்கள்.அங்கே ஆகும் தாமதம் காத்திருப்பு என்பதாக மனம் உணருகிறது. அதில் இழிவு கிடையாது ஏனெனில் அது காத்திருப்பு. ஆனால் பொது வரிசை என்பது பொது புத்தியில் மிகவும் இழிவானது.பிராமணர்கள் ஓரளவிற்கு வரிசைக்கு ஒத்துழைப்பார்கள்.வெள்ளாளர்கள் வரிசையில் நிற்கும் காலத்தை விட பத்து மடங்கு காலம் அதிகமானாலும் பரவாயில்லை குறுக்கு வழிகளை முயற்சித்துக் கொண்டேயிருப்பார்கள்."வரிசையில் நிக்கும் குறைச்சல் இல்ல அங்க அவன் இருக்காம்லா "என்பது அவர்களின் பேச்சு வழக்கு.பிற்படுத்தப்பட்ட  சாதிகளை சேர்ந்தவர்கள் ,தலித்துகள் மோசமான விதத்தில் வரிசையைக் கசக்கக் கூடியவர்கள்.அவர்களுக்கு அப்போதுதான் உலகம் முழுவதும் கெட்டுப் போய்விட்டது நினைவிற்கு வரும்.இன்னும் சிறிது நேரத்தில் உலகம் அழிந்து விடும் என்று கண்டுபிடித்து சொல்வார்கள்.பொது வரிசைகளில் காரியங்கள் மிகவும் எளிமையானவை.வரிசைகள் எடுத்துக் கொள்ளும் காலம் கூட மிகவும் சொற்பம்தான்.ஆனால் வரிசையைக் கசப்பவர்களை ,குறுக்கிடுபவர்களை ,உடைப்பவர்களை சமாளிப்பதே கடினமானது.  பொது மருத்துவமனை வரிசைகளில் சுய அனுதாபத்தைப் பெருக்கிய வண்ணம் ,கழிவிரக்கத்தை கையிலேந்திக் கொண்டு ஒருத்தி பெரும்பாலும் வந்தே தீருவாள்  .மிகவும் கடினமான பெண் அவள்.வழிவிட்டு ஒதுங்கி விடுதல் நன்மை.அவர்களில் பலர் தமிழில் பெண் கவிகளாகும் தகுதி கொண்டவர்கள்."நான் யாரென்று தெரியுமா ?" என்கிற ஒருத்தனும் இந்த வரிசைகளில் உண்டு.அவன் தமிழ் கவிஞன் .விட்டுவிட வேண்டும். ஒரு வரிசை முணுமுணுப்பில்லாமல் இனிமையாக நகருகிறதென்றால் நிச்சயமாக அதனை நாகரீகமானவர்கள் இருக்குமிடம் என்று கண்டு கொள்ளலாம்.இதுவரை  நான் கண்டதில்லை.நவீன இலக்கியம் படிக்க வருகிற இளைஞன் இந்த வரிசையில் தான் நின்று கொண்டிருப்பான்.ஆனால் எல்லோரும் அவனை இடித்துக் கொண்டு முன்னேறிச் சென்று கொண்டேயிருப்பார்கள்.அப்படியானால் இவர் இன்னாரே எனக் கண்டு தோழமையை ஏற்படுத்திக் கொள்ளலாம்.பழைய அரசு பள்ளிகளில் இந்த வரிசைகள் மிகவும் அழகாக பேணப்பட்டன.இப்போது குலைந்திருக்கிறது.தனியார் பள்ளிகளின் வரிசைகள் ஸம்ப்ரதாயமானவை.அமிர்தானந்த மயி பள்ளிகளில் குழந்தைகளுக்கு வரிசையை அழகாக பாடம் நடத்துகிறார்.அந்த குழந்தைகளிடம் மேம்பட்ட பண்பு வெளிப்படுகிறது.

###

இந்தியாவில் மீண்டும் பாரபட்சங்களை முன்னிறுத்துகிறது பா.ஜ.க அரசு.எல்லாவிதமான வரிசைகளை  உடைத்து நொறுக்குகிறது.இந்த அரசின் பிரதான தீமை இதுவே.மற்றபடி அவர்கள் காங்கிரசையே பின்பற்றுகிறார்கள்.வருமான வரித்துறையா ,நீதித்துறையா, பிராந்திய அரசுகளா ,தன்னாட்சி  பெற்ற அமைப்புகளா  இவையெல்லாம் நாம் உருவாக்கிவைத்திருக்கும் வரிசைகள் .இவற்றை உடைக்கக் கூடாது.எனக்குத் தெரிந்தவர்கள் அப்பா அம்மா தங்கை தமையன் குழந்தைகள் மருமக்கள் என ஒன்றாக வாழ்ந்தவர்கள்.புதிதாக அவர்களுக்கு அறிமுகமான தம்பதியினர் ஆணும் பெண்ணும் அறிமுகமான நான்கு தினங்களில் சொன்னால் நம்ப மாட்டீர்கள், அந்த குடும்பத்தை சுக்கு நூறாக உடைத்து விட்டார்கள்.பக்கத்து வீட்டில் பந்தயம் கட்டிவிட்டுச் செய்திருக்கிறார்கள். ஏராளம் பிரச்சனைகள் பிரிவினைகள்.மூத்தவர் கதறி அழுதுவிட்டார். அத்தனை சந்தோஷங்களும் நான்கே நாட்களில் தடயம் கூட இல்லாமல் போய்விட்டன .மூத்தவரோடு அவர்களை காண சென்றிருந்தேன்.இருவரும் இனிக்க இனிக்க வரவேற்றார்கள்.நீங்கள் புத்திசாலிகள் என நினைத்துக் கொண்டிருக்கிறீர்கள் இல்லையா ? என பேச்சைத் தொடங்கினேன்.இதையெல்லாம்  செய்வது மிகவும் எளிது தெரியுமா ? என அவர்களிடம் கேட்டேன்.இப்போது உங்கள் இருவரையும் தெரிந்தே  உடைக்க  ஒருவார கால அவகாசம் போதும் தெரியுமா ? என்றேன் .கொஞ்சம் அவர்களுக்கு உறைத்தது.ஆனால் இப்படியெல்லாம் செய்யக்கூடாது என்பதே நெறி.நெறிகளை வலிந்துதான் பின்பற்றவேண்டும்.இல்லாமல் வராது.மனம் எப்போதும் நெறிகளுக்கு எதிரானதுதான்.மனதை எதிர்த்து செய்யாமல் இருக்கும் காரியங்களுக்கு பெயரே நெறி.மோடியும் அமித்ஷாவும் இந்தியாவில் இந்த தம்பதியினரைப் போன்று நடந்து வருகிறார்கள்.இறந்த காலங்களை பழிவாங்கும் நோய் நோய்களிலேயே கடுமை நிறைந்தது.குணப்படுத்த இயலாதது.பிராமணர்கள் பெரும்பான்மையினராக மோடியை ஆதரிக்கிறார்கள்,பாரபட்சங்களில் ஏறி அமர நினைக்கும் இடைநிலை சாதியினரை இந்தியா முழுதும் மோடி பாரபட்ச மனோபாவத்தால் இணைக்கிறார்.தமிழ்நாட்டின் உதாரணம் பாட்டாளி மக்கள் கட்சி.பாரபட்சங்களில் ஏறி அமர நினைக்கும் தலைமைக்கு மிகச் சிறந்த உதாரணம் அது.பிராமணர்கள் இன்று குளோபல் ஆகிவிட்டவர்கள்.கோவில்களோ குளங்களோ அவர்களை பிராந்திய நிலைக்கு இணைக்காது.அவர்களுக்கு நிலங்களில் வேலையில்லை.தொடர்பில்லை.ஒருவகையில் இஸ்லாமியர்களையும் பிராமணர்களையும் ஒரே தளத்தில் இருத்தி அணுக முடியும்.அவர்களுக்கு பிராந்திய மனத்தில் தொடர்பு கிடையாது.அவர்களுடைய வீடு மட்டுமே இந்தியாவில் இருக்கிறது.எனவே பிராந்தியர்களை ஒடுக்கும் பா.ஜ.க வை அவர்கள் முழுதுமாக ஆதரிப்பதில் அவர்களுக்கு நன்மை உண்டு.பா.ஜ.கவினரைப் போலவே பிராந்திய நலன்கள் அத்தனைக்கும் எதிராக பிராமணர்களும் குரல் கொடுக்கிறார்கள் .அவர்களின் கண்ணோட்டத்தில் பிற சமூகத்தினர் பிராந்திய எலிகள்.   

###

இந்திய விடுதலை என்பது வெள்ளைக்காரர்களிடமிருந்து சுய அதிகாரத்தை மீட்ட நிகழ்வு மட்டுமல்ல ; இந்திய பிராந்தியங்களில் யுத்தங்களாகவும் வெறுப்பாகவும் நிலவிய பாரபட்சங்கள் அனைத்திலிருந்தும் மீள்வதற்கு மக்கள் எடுத்த முயற்சியாகும்.மக்களின் இந்த முயற்சிக்கு மஹாத்மா பொருத்தமாக இருந்தார்.நவீன சமூகமாக நாம் மாறுவதற்கு காந்தி நமக்கு மிகப்பெரிய அர்த்தத்தை ஏற்படுத்தித் தந்தார். இப்போது மீண்டும் பா.ஜ.க பாரபட்சங்களை முன்னிறுத்தி பிராந்திய அச்சத்தை இந்தியாவெங்கும் ஏற்படுத்துகிறது.விடுதலையின் பொருளில் நாம் வெகுவாகக் கீழிறங்கிக் கொண்டிருக்கிறோம்.பா.ஜ.க அரசின் எதிர்மறையான தன்மை என்பது அதன் பாரபட்ச தன்மையிலேயே அடங்கியிருக்கிறது.பாரபட்சம் எதன் அடிப்படையில் வந்தாலும் அது நாம் நவீனமடைவதில் தடையை ஏற்படுத்தி விடும்.

நான் பொதுவாக இந்திய விடுதலையை மூன்று அடிப்படைவிதங்களில் பொருள் படுத்திக் கொள்வதுண்டு.முதலாவது நாம் இன்று அடைந்திருக்கும் பெரும்பான்மையான நன்மைகள் சுதந்திர இந்தியாவால் நாம் அடைந்தவையே.கல்வி ,சுகாதாரம் ,போக்குவரத்து இவையெல்லாம் சுதந்திர இந்தியாவால் நாம் பெற்ற பலன்கள்.பாரபட்சங்களை கைவிட்ட காரணத்தாலேயே இவையெல்லாம் சாத்தியமாயின.சுகாதாரத்தில் மிகவும் முன்னேறியிருக்கிறோம்.அறுபது வயது என்பது நாற்பதாண்டுகளுக்கு முன்பு வரையில் ஆகப் பெருங்கிழவியின் வயதாக இருந்தது .கிராமங்களில் ஒவ்வோர் ஆண்டும் சுகாதாரமின்மையால் நடைபெறும் மரணங்கள் நாற்பது வருடங்களில் வெகுவாக குறைந்திருக்கிறது.அல்லது இல்லை.அடிப்படை கல்வியறிவு பெறாதவர்கள் இல்லை.போக்குவரத்து கண் கூடாக நம்மில் தலைகீழ் மாற்றத்தை ஏற்படுத்தியிருக்கிறது.வேலைவாய்ப்பை ,பொருளாதாரத்தை ,வாழ்வின் தன்மையை அது மாற்றியிருக்கிறது.இவையெல்லாம் நான் எனது கண்களாலேயே கண்ட மாற்றங்கள். அதை முன்வைத்தே நாற்பது வருடங்கள் என்று குறிப்பிட்டுச் செல்கிறேன்.உணவின்மை என்பது நான் அறிந்த கிராமங்கள் எதிலும் இல்லை.இன்று ஒரு கிராமத்திற்கு சென்று காலுக்குச் செருப்புமில்லை கால் வயிற்றுச் சோறுமில்லை என்று ஒருவர் பாடினால் அது புரட்சிப் பாடல் இல்லை.பழம்பாடல்.சாதாரண உடல் வேலைகள் மூலமாக மட்டுமே மாதம் இருபதினாயிரம் ஈட்டுகின்ற தலைமுறை உருவாகியிருக்கிறது.நமது விடுதலையால் பாரபட்ச நீக்கத்தால் ஏற்பட்ட முக்கியமான மாற்றம் இது.அப்பட்டமான திறந்த உண்மையிது.இதில் ஒருவர் மாறுபடுவாரேயானால் அவரிடம் எனக்கு உரையாடுவதற்கு ஒன்றுமே கிடையாது.அவர் பிறிது ஏதோ நோக்கம் கொண்டவர் என விலகிச் சென்று விடுவேன். இவையெல்லாம் கடந்த கால காங்கிரஸ் ஆட்சிகளால் விளைந்தவை.அதனை இந்தியாவில் மேலும் முன்னெடுத்துச்       செல்வதற்காகத் தான் நமக்கு புதிய கட்சிகளும் கருத்துக்களும் தேவையே அல்லாமல்,அதனினும் கீழிறங்குவதற்காக அல்ல.அப்படியென்றால் அதற்கு காங்கிரஸே உத்தமம். 

ஏதேனும் அழியுமென்று நினைக்கிறீர்கள் ?


ஏதேனும் அழியுமென்று நினைக்கிறீர்கள் ?

1

சாலையின் மத்தியில் ஆலிலை ஒன்று
சற்றே பழுப்பு சற்றே பச்சை
நிமிர்ந்து நிற்கிறது
அந்த பக்கமாக வாகனம் செல்கையில்
இந்த பக்கமாக சுழன்று
திரும்புகிறது
இந்த பக்கம் வாகனத்திற்கு அந்த பக்கம்

ஒற்றைக்கால் நடனம்

என்ன நினைத்தானோ சிறுவன்
ஊடே புகுந்து
இலையை
ஓரத்திற்கு உயரே
எறிந்தான்

நடனம் இப்போது மேலே
பறக்கிறது.

2

ஒன்பது மகன்களை பெற்ற
அப்பாவின் இளைய மகன்
அப்பாவின் ஒரு கைமட்டும் பறந்து செல்வது போல
வாகனத்தில் விரைகிறான்
அப்போதுதான் கவனித்தேன்
மீதமுள்ளோர்
மீதமுள்ள அவயங்களாயிருப்பதை

ஒன்பது அவயங்கள்
பதினெட்டு கைகள் கால்கள் கண்கள் செவிகள்
ஒரே புருஷன்

3

ஏதேனும் அழியுமென்று நினைக்கிறீர்கள் ?
மிச்சம் வைத்த ஆசைகள்
மிச்சம் வைத்த தகிப்புகள்
மீதமிருக்கும் தாகங்கள்
மீதமிருக்கும் வஞ்சம்
உறுப்பு தேடித் கொண்டிருக்கின்றன
ஒவ்வொன்றும்

4

சரியாகவே வாழ்ந்ததாகச் சொல்லி ஒரு பிழை விட்டீர்கள்
அந்த பிழையே நானாக வளர்ந்து பெரிதானது
இந்த பிழையைக் கொண்டு போய் அந்த இடத்தில்
நட்டு வைக்க வேண்டும்
இல்லாமல்
தர்க்கம் பண்ணுவதில்
ஒரு பலனும் இல்லை

5

நீ செய்ததை நீ மட்டுமே
எடுக்க முடியும்
நீ செய்தது சீறுமானால் அதுவும் நீ செய்ததுவே
நீ செய்தது பணியுமானால் அதுவும் நீ செய்ததுவே

6

யாருக்கோ நடப்பவையெல்லாமே
எல்லோருக்குமே நடக்கும்
இன்பமானாலும் சரிதான்
துன்பமானாலும் சரிதான்

எடுத்தகற்ற விரும்பினால்
யாருக்கோ நடக்கையில் எடுத்தகற்றவேண்டும்
இன்பமென்றாலும் சரிதான்
துன்பமென்றாலும் சரிதான்

7

அதர்மம்
காத்திருந்து அழும்
அப்போதும் அதற்கு அது
தனது அதர்மம்
என்பது
விளங்காது

அதனால்தான் அது அதர்மம்

8

என் கையில் எல்லாம் ஒழுகுகிறது
என்னது இது சிவன் கை
பாத்திரமல்லவா ?

என் கையில் ஏன்
இருக்கிறது

9

பிரம்மகத்தி தோஷத்திற்கு பரிகாரம்
ஜீவகாருண்யம்

10

எம தர்மனைப் பார்த்துத் திரும்பியவன்
சொல்கிறான்
எம தர்மனும்
தர்மன்தான் என்பதை

###

முற்றத்தில் நிலவு விழும் போது வேறு எங்கும் செல்லாதே

1

தூரத்தில் இருக்கிறேனா
அருகில் இருக்கிறேனா என்பது
தூரத்தில் இருக்கிறாயா அருகில் இருக்கிறாயா
என்பதை பொறுத்தது

2

சன்னிதியின் முன்பு நேருக்கு நேராக நிற்கையில்
அப்பட்டமாக தெரிந்து விடுகிறது
இன்னும் எவ்வளவு தூரம் என்பது

3

ஆளில்லாத சன்னிதியில்
ஏராளம் கூட்டம்
யாரோ வருவதற்காக
நடை திறந்திருக்கிறது

4

விளக்கு வைத்தாயிற்று
அலங்காரம் செய்தாயிற்று
அடியவர் வருகிறாரா என்று பெருமாள்
பார்த்துக் கொண்டிருக்கிறார்

5

எவ்வளவு பேர் வந்தாலும் பின்னர்
யாரோ ஒருவர் வரவேண்டியிருப்பது
பெருமாளுக்கு
மட்டுமில்லை

6

குழந்தைகள் வருவதை பெருமாள்
தூரத்திலிருந்தே
பார்த்து விடுகிறார்

7

நான் என்னுடைய கவிதைகள் மீது
அமர்ந்திருப்பவன்
இத்தனைக்கும் என்னுடைய கவிதைகள் எதுவும்
என்னுடையவையும் அல்ல

8

மனமே முருகனின் மயில் வாகனம்
என்பது
முருகனின் மனதைக் குறிக்கிறதா
வந்தவன் மனதைக் குறிக்கிறதா
வந்தவனும் முருகனும் இணைந்த மனதைக்
குறிக்கிறதா

9

மனத்தைப் பயிர் செய்
பூமியெல்லாம்
விளையும்

10

தூரம் என்பது
இன்னும் தீராத கரை
கறையென்றும் சொல்லலாம்

12

விஷத்தைக் குடிக்கிறேன்
தொண்டையோடு
நிறுத்தி விடுகிறார்
பெருமாள்

13

கறை தீர்ந்தவன்
கண்டடைந்து விடுகிறான்

14

முற்றத்தில் நிலவு விழும் போது
வேறு எங்கும் செல்லாதே

15

குழந்தைகள் பொல்லாதவர்கள் என்பதால்
நாம் பெரியவர்களாகிக் கொண்டிருக்கிறோம்

16

எல்லா கதவும் அடைத்திருக்கிறது என்றவனிடம்
பரவாயில்லை
ஒரு கதவு திறக்கும் சென்று விடுவாய்
எனக்கு எல்லா கதவும் திறந்திருக்கிறது
எந்த கதவில் செல்வது என்று தெரியவில்லை
என்கிறான் வேறொருவன்

17

மூடியிருக்கிறது என நினைத்துக் கொண்டிருப்பது
பிரேமை
கையை எடுத்துத் தொடாதவரையில்
எந்த கதவும்
திறப்பதில்லை

18

எந்தக் கதவும் வெளியே இல்லை
உள்ளேயிருக்கிறது
திறந்து பார்
திறக்கும்

19

இசையில் சப்தமிருக்கிறது
இசைக்கு வெளியிலும்
ஒரு சப்தம் இருக்கிறது

நாக்கில் சுவையிருக்கிறது
நாக்கிற்கு வெளியிலும்
அதே சுவையிருக்கிறது

20

யாரிடம் பேசினால் இன்பமோ
அந்த இன்பம்
இருவருக்கும்
உரியது

21

எடுத்துக் கொள்ளச் சொல்லி விட்டு விட வேண்டும்
வேண்டியவன் வந்து சேர்வான்
மணம் பிடித்து

###

இல்லாத போது வருகிறவன்

1

இல்லாத போது வருகிறவன்
எனது இருப்பையும் இன்மையையும்
ஒருசேர காண்கிறான்
நான் அவனுடைய
இருப்பை மட்டும் காண்கிறேன்

2

பயணம் இவ்வளவு குறுகியது
என்பது தெரிவதற்குள்
பாதி வழி
கடந்து விட்டேன்

3

உப்பளத்தை ஒட்டிய ஊரில்
ஒரு பகல் இருக்கிறது
அந்த பகலை தனியே கடக்கிறான் ஒருவன்

தென்னைகளின் ஊரில் பகல்
நிழல் இருள் தனிமை

தனிமைக்குள் ஒரு பகல்
எப்படியிருந்தால் என்ன

ஆனால் மதிய வெயிலில்
கடற்கரை நாயின் தனிமை
அகோரமாக
உச்சியைப் பிளக்கிறது

4

இருக்கும் போது வந்தவன்
அவன் இருப்பை காண்கிறான்
என்னை எனதிருப்பை காணச் செய்கிறான்

5

உறுதுணைக்கு ஒரு சிட்டுக் குருவியை
எடுத்துச் செல்லுங்கள்
பயணம்
நல்லபடியாக
இருக்கும்

###

ஆளில்லாத கடையில்
ஆளில்லை
பையன் வந்து அமர்ந்திருக்கிறான்
அப்போதும்
ஆளில்லை என்றே
சொல்கிறது கடை
பொருட்களை வாங்க வருவோர்
ஆளில்லையா
எனக் கேட்கிறார்கள்
ஆளில்லை
என்கிறது கடை

பையன் அமர்ந்திருக்கிறான்
இல்லாத ஆளின் இருப்பை
ஓங்கி
கத்திக் கொண்டிருக்கிறது கடை
இல்லாத ஆள் ஏன் இருந்தான்
என்பதனையும்
சேர்த்து

###

சொன்னவை

நோயற்ற உடல் அழகு
அகந்தை உடையாதவன் அரை மனிதன்
உடைந்து சிதறியவன் பிராந்தன்
உடைந்து பாதி பிழைத்துக் கொண்டவன் கவிஞன்
உடைந்தாலும் பெண் பேய் உடையாதிருந்தாலும் பேய்
உடையாதறிபவள் தெய்வம்
பேயகன்ற மனம் அழகு

நானிருப்பது அகந்தை
நானில் சிவம் ஆனந்தம்

உடையாதவன் பேசுவது குப்பை
உடைந்தவன் பேசுவது குழப்பம்
உடைந்து மீண்டவன் சொல்வது வாக்கு

நெல்லையும் வயலையும் விற்காமல் கல்வியில்லை
தலைமுறை நிலக்கிழார் தூக்கிட்டுச் சாவார்
வீட்டுத் தெய்வங்கள் நிலைக்கெட்டோடும்

பழையது பேசுவோனுக்கு
பழஞ்சோறும் கிடைக்காது
பழம்பெருமை
புதைச்சேறு

மீள நினைப்பவனுக்கு கலையிலக்கியம்
மீளாதிருப்பவனுக்கு மதம்

தானாய் நடிப்பவனுக்கு
தன் கையும் உதவாது

பாவனை அகன்றதா ?
பாதி உண்மை
விளங்கிவிடும்

###

எப்படியும்
புறப்பட்ட இடத்திலிருந்து
ஒரு சுற்று
சுற்றி வரவேண்டியிருக்கும்
எப்படிச் சுற்றினாலும்
சரிதான்

###

எதிலிருந்து உங்களுடைய வாழ்க்கையை
கண்டுபிடித்து விடுவீர்கள் என்று
சொல்லவெல்லாம் முடியாது
எதிலிருந்தாவது
கண்டுபிடித்து விடுவீர்கள்
ஒரு பொறி கிடைத்தது போல
புலப்பட்டுவிடும்
அதற்காக
எதையேனும் செய்து
கொண்டேயிருக்க வேண்டும்

அதில் கிடைக்குமா என்றால் கிடைக்காது
இதில் விளையுமா என்றால் இல்லை
செய்து கொண்டிருப்பதன் இடைவெளியில்
இருக்குமது

###


அந்த இடத்தில் நிற்கையில்
மீண்டும் என் பிள்ளைப்பருவம் துளிர்க்கிறது
துளிர்த்து வனமாகிறது
அதற்காகவே
மீண்டும் மீண்டும் அந்த இடத்திற்குச் செல்கிறேன்
மற்றபடியாக
அந்த இடத்திலொன்றும் என் பிள்ளைப்பருவம்
இல்லை

###

ஒருவருக்கு பரிசு கிடைக்கும் போது
மனம் சொல்கிறது எனக்கு கிடைத்திருக்க வேண்டிய பரிசு
ஒருவரைப் பாராட்டும் போது
இல்லை நானே பாராட்டப்பட வேண்டியவன்

அவனிடம் ஒரு பெண் கொஞ்சுகையில்
இல்லை அவள் என்னிடம் கொஞ்சுவதே
முறையாக இருந்திருக்கும்

இப்படியாகச் சென்று
நானே முதல்வராக இருந்திருக்க வேண்டும்
நானே பிரதமராக இருந்திருக்கவேண்டும்
என ஓங்கி சப்தமிட்டுக் கொண்டிருக்கும் ஒருவர்
ஆளில்லா முச்சந்தியை
ஆட்சி செய்து கொண்டிருக்கிறார்
இரவுக் காவலுக்கு
நாற்பது நாய்ப்படைகள்

மற்றொருவர் உண்மையாகவே
நானே முதல்வராகவும் நானே
பிரதமராகவும்
ஆகிவிட்டார்

இரண்டிற்கும்
ஒரே தகுதியே
வச்சா குடுமி
செரச்சா மொட்ட

###

நான் நடந்து வந்த பாதைகள்தாம் இவையெல்லாமே
கல்லும் முள்ளுமாக கடந்து
நெருங்க நெருங்க
பல்லக்கில்
வந்தது போலும்
இருக்கிறது

சிறிதிற்குள் பெரிது இருக்கிறது

உடல் தன்னளவில் ஆனந்தம்
1
எல்லையில்லா பிரபஞ்சம் 
நமக்கு ஒரு கூடு
கூட்டிற்குள்
எல்லையில்லா பிரபஞ்சம்
2
எல்லையில்லா அருள் கனி
உடல் தன்னளவில் ஆனந்தம்
3
அவ்வளவு பாய்ந்து செல்லும் வெள்ளத்தில்
இருந்து
நமக்குத் தேவை
கையளவு
நதி
எடுத்துக் கொள்ளும் நதி
பின்னர் நம்மை எடுத்துக் கொள்கையில்
கையளவு
கடல்
4
நம்முடைய கூடு சிறிது
கூட்டிற்குள்ளும் சூரியன்
கூட்டிற்குள்ளும் சந்திரன்
கூட்டிற்குள்ளும் இரவு பகல்
வளர்பிறை பௌர்ணமி
எல்லாம்
மிக மிக பெரிது பெரிது
5
நாமெல்லோருமாகச்
சேர்ந்து
எவ்வளவு கவனமாக
சூரியனைச் சுற்றிக் கொண்டிருக்கிறோம் ?
6
எவ்வளவு பசித்தாலும்
தேவையொரு சிறு
தான்யமே
7
பசி ஒருபோதும் பெரிதாகப் புசிப்பதில்லை
8

நாம் நிச்சயம் நாமே தாமா ?
9
எடுத்ததையெல்லாம் விட்டுச் செல்ல வேண்டும்
வேறு வழி கிடையாது
10
என் பாத்திரம் முழுக்க சோறு
யாரேனும் எடுத்து தின்ன மாட்டார்களா ?
11
தின்னக் கொடுத்தால்
தொலைந்து போகும்
12
பெரிதிற்குள்
சிறிதாக இருக்கிறோம்
சிறிதிற்குள்
பெரிது
இருக்கிறது

கிறிஸ்தவ அரசியல் என்பது என்ன ?

கிறிஸ்தவ அரசியல் என்பது என்ன ? கிறிஸ்தவ அரசியல் என்ற ஒன்று இருக்கிறது.இருக்கவும் வேண்டும்.அதுபோல நாடார் அரசியல்,தேவர் அரச...