பசி கவிதைகள்

பசி கவிதைகள்

1

தாலத்தை எடுத்து
வையுங்கள் அம்மா
பசிக்கிறது

தாலத்தில் சோறினை போடுங்கள் அம்மா
பசிக்கிறது

பிறக்கும் முன்பிருந்தே
பசிக்கும்
பசி

2


ஹெல்மெற்றுக்குள்
இருக்கும் நண்பனுக்கு
பல சௌகரியங்கள்

முகம் தெரியாது என நினைத்துக்
கடந்துவிடலாம்
இந்த சனியனா வருகிறான் என ஒதுங்கி
விரைந்து விடலாம்

தெரியவா போகிறது
தெரிந்தால் தெரியட்டுமே
காறியுமிழ்ந்து
கடக்கலாம்

என்ன வேண்டுமானாலும் செய்யலாம்

ஹெல்மற்றுக்குள் நண்பனின் தலை
வேறொன்றாக இருக்கிறது
நாம் பொதுவாக அறியாத
வேறொரு தலை அது

எல்லா வசதியும் இருந்தும்
நெளிந்து வளைந்து இறங்கி
நான்தான் என்று ஹெல்மற்றை இறக்கி
நின்று கொண்டிருக்கிறான் பாருங்கள்
ஒரு நண்பன்
அவன்முகத்தில் அவனிங்கே
பிழைக்க வந்ததன் ரேகையே
இல்லை



###

கணநேர வித்தியாசம்

1

சிலையாக இருந்தால்
கற்பனை செய்யமுடியும்
நீயோ சிலையிலிருந்து வெளிவந்து
ஆளாக நிற்கிறாய்
கற்பனைகளை முழுவதுமாக இழந்து இழந்து
முற்றிலும் கைவிடச் சொல்லிய இடத்தில்
நீயாக இருக்கிறாய்
இதற்கு
சிலையாகவே இருந்திருக்கலாம்
இந்த கற்சிலை

2

நானும் சிலையாக இருந்தேன் கற்சிலையாக
கற்சிலையிலிருந்து மற்றொரு
கற்சிலையாகும் தூரம்
இந்த வாழ்க்கையாகிறது

3

முதலில் நீயும் கற்சிலையாகவே இருக்கிறாய் முழுமையாக
முடிவில் மீண்டும் கற்சிலையாவாய் முழுமையாக

4

நானொரு சிந்தனையிலிருந்து வெளிவந்தேன்
நானொரு எண்ணத்திலிருந்து வெளிவந்தேன்
அவையெல்லாம் அதற்கு முன்னர் கற்சிலையாக இருந்தன

5

நானிருந்த கற்சிலைக்குப் பக்கத்தில்தான் நீயிருந்தாய்
மற்றொரு கற்சிலையாக
உன்னைக் கண்டுகொண்டதும் நான் ஆளானேன்
அதனைக் கண்டதும் நீ ஆளானாய்
சற்றைக்கு முன்னே நான்
சற்றைக்கு பின்னே நீ
கணநேர வித்தியாசம்

பிறந்ததோ ஒருமித்த
இரண்டு
வேறு வேறு
மிருகங்கள்

என்னுடைய நோய்கள்

வெளியே தெரிந்துவிடுகின்றன
வேறு வழியில்லை

என்னுடைய கவலைகள்
வெளியே கசிந்துவிடுகின்றன
வேறு வழியில்லை

எனது அகமும் முகமும் ஒன்றே
வெளியிலிருக்கின்றன

இப்படியொரு வெட்ட வெளி
இப்படியொரு வெட்டவெளி மனிதன்

2

காய்ச்சலின் போதுள்ள
பிரபஞ்சத்திற்கு
நாக்கசப்பு

3

என்னையொருத்தி எலிப்பிள்ளை போலும்
ஈன்றுவிட்டுச்
சென்றுவிட்டாள்
யாருக்கும் ஈடுபாடில்லாமல் போயிற்று

வந்து வந்து
தொட்டுப்பார்ப்பவர்கள் அத்தனைபேருக்கும்
இது
எலிப்பிள்ளை என்பது
தெரிந்துவிடுகிறது

முள் குத்துவதற்கெல்லாம்
ஓவென்று கத்தி ஊரை அழைப்பவர்கள்

உனக்குத்தானே இது
சாதாரணம் என்கிறார்கள்

4
இதற்கு
என்ன விலை?
ஈடுபாடில்லாத விலை

இதற்கு மதிப்பு?
ஈடுபாடில்லாத மதிப்பு

ஏன் இப்படி?
இதுதெரியாதா
இதுவொரு
எலிப்பிள்ளை

5

பிள்ளையென்றெடுத்தாள் ஒருத்தி
எலிப்பிள்ளையென்றதும்
இறக்கி வைத்தாள்

எலிப்பிள்ளையென்றாலும்
என்பிள்ளை என எடுத்து வைத்துக்
கொண்டிருப்பவள்
பகவதி

விட்டவள் சராசரி
வைத்துக் கொண்டவள் இறைவி

6

நீங்கள் ஏன் உயிர் வாழ்கிறீர்கள்
என்பதே கேள்வி
நீங்கள் ஏன் மீண்டும் மீண்டும்
நடமாடுகிறீர்கள் என்பதே
குற்றச்சாட்டு

வேறுவேறு பாஷைகளில்
கேட்டுக்
கொண்டேயிருக்கிறார்கள்