Skip to main content

அதிசயங்கள் மிஞ்சுகின்றன

 அதிசயங்கள் மிஞ்சுகின்றன





வயது ஏறுந்தோறும் என்னுடைய ஆச்சரியங்கள் அதிகமாகின்றன.அதிசயங்கள் எஞ்சுகின்றன.நான் இந்த பிரபஞ்சத்தில் இருப்பதை உணர்கிறேன்.இருப்பதே இனியாக.பிறருடைய இருப்பு அதனினும் இனிமையாக.ஒவ்வொருவரும் என்னன்னவோ செய்துகொண்டிருக்கிறார்கள்.செய்வதற்கு எவ்வளவோ இருக்கின்றன.தீருவதில்லை.அதிலும் சந்தோஷமாகச் செய்வதற்குத்தான் எவ்வளவு காரியங்கள் ?

அத்தனை கோடி ஜந்துக்கள்.எல்லாமே இனிமை.பாம்பு இனிமை.பாம்பின் விடம் இனிமை.பசு இனிமை.ஒவ்வொன்றும் நமக்கு எதையோ வழங்குகிறது.பசு நிறைய வழங்கக் கூடியது.பால் மாத்திரமே வழங்குவதாக நினைத்துக் கொள்வது நம்முடைய அறியாமை.ஒருவகையில் வெளிப்படையாகத் தருவதை மட்டுமே அறிந்து கொள்வதை நுண்ணுணர்வின்மை என்றும் சொல்லலாம்.

எதனையும் வழங்காத ஒன்று என்று இங்கே ஏதுமில்லை.சில பூச்சிகள் ஒரு பையை பின்பக்கமாக தோளில் எறிந்துவிட்டு குழந்தைகள் நடந்து செல்வதைப் போல நடந்து செல்கின்றன.மகிழ்வூட்டும் பணிகளுக்காக,ஏன் இந்த பணிகள் மகிழ்ச்சியூட்டுகின்றன என்பதை கூட அறியாமல்.பறவைகளுக்கோ ஓயாத வேலை,இசையும் நடனமும் அவற்றுக்குப் செய்யும் பணிகளுடன் கலந்தே இருக்கிற வேலைகள்.எனக்கு இரண்டு குழந்தைகள் இருக்கிறார்கள்.அவர்கள் பூப்போல வளர்ந்து விட்டார்.என் பருவத்துக்கு வளர்ந்து விட்டார்கள்.இவையெல்லாம் அதிசயமின்றி வேறென்ன?

நான் இங்கிருக்கிறேனே ? இத்தனைக்கும் மத்தியில் இங்கிருக்கிறேனே ? இல்லாதபோது இருப்பதைப் போல இங்கிருக்கிறேனே ,இவையெல்லாம் எவ்வளவு அதிசயங்கள் ?

வளர வளர அதிசயங்களைப் பார்த்துக் கொண்டே இருக்கிறேன்.அரச இலைகளை எடுத்து சட்டைப் பையில் சேகரித்து வைக்கிறேன்.பூச்சுகளை ,ஜந்துகளை நின்று நின்று பார்க்கிறேன்.இதற்காகவே வந்தவனைப் போல.மனிதர்கள் தற்குறிகளாக இருந்தாலும் என்ன ? ஆணவகாரர்களாக இருந்தாலும் என்ன ? கருமிகளாக ,கக்கர்களாக எப்படியிருந்தாலும் மனிதர்கள் சுவாரஸ்யமானவர்களாக மாறிக்கொண்டிருக்கிறார்கள்.பெண்கள் தெய்வங்களாகத் தோன்றுகிறார்கள்.சக்திபீடமாக இருக்கிறார்கள்.அவர்களுடைய அத்தனை கசந்த பாவனைகளும் இப்போது லீலை என தோன்றுகிறது.தெய்வங்களின் இருப்பை இரண்டு கண்களாலும் பார்க்க முடிகிறது

நானொரு மனுஷ்ய ஸ்வரூபம் எடுத்து நிற்கிறேன்

1

நானிந்த பிறவி
எடுத்தது எவ்வளவு நல்லது
எப்படியும் புத்திசாலித்தனமாக
முடித்து விடுவேன்
அல்லவா?

நானிந்த பிறவி
எடுத்தது எவ்வளவு நல்லது
என்னுடைய புத்திசாலித்தனத்தின்
அளவை அறிந்து கொண்டேன் அல்லவா?

நானிந்த பிறவி எடுத்தது
எவ்வளவு நல்லது
என்னுடைய புத்திசாலித்தனம் எதுவுமே
என்னுடையதல்ல என்பதைத்
தெரிந்து கொண்டேன்
அல்லவா !

இல்லையெனில்
தெரியாது இருந்திருப்பேன்
நானிந்தப் பிறவி எடுத்ததை
அறியாமல்
இருந்திருப்பேன்
இல்லையா?

2

தற்காலிகமாக இங்கே இருக்கிறேன்
தற்காலிகமாக தொழில் செய்கிறேன்
தற்காலிகமாக ஊரில் இருக்கிறேன்
தற்காலிகமாக நீர் உண்ணுகிறேன்
தற்காலிகமாக வாழ்ந்து கொண்டிருக்கிறேன்
தற்காலிகத்திற்கு அப்பால் ஒரு இடமுண்டு
துள்ளிச்சாடிக்குதிக்க
அள்ளிச்சாடிக்களிக்க

அதுவரையில்
தற்காலிகத்தில்
இருக்கிறேன்
தற்காலிகமாக

3

என்னுடைய அப்பைய்யா

என் வழியாகத்தான்
பறவைக்குரல்களைக் கேட்டுக்கொண்டிருக்கிறார்
எதன் குரல் எதுவென அவர் பிரித்துக் கொள்வார்
அவருக்கு அது தெரியும்

என்னுடைய அப்பம்மை பொங்கி எழும்
கடல் நாதம் காண்பது என் வழியாகவே...
அறிந்து கொண்டிருக்கிறாள்
அது கேட்பதல்ல
காண்பது

என்னுடைய தெய்வங்கள்
என்னுடைய நாவிலிருந்து
பதனீரின் கருப்பட்டியின் ருசியை
எடுத்துக் கொள்கின்றன

என்னுடைய மூச்சை இழுத்து எடுத்து
அமரர் மேடைக்குள்
அனுப்பிக் கொண்டிருக்கிறேன்
என்னுடைய அன்னை
சுவாசித்துக் கொண்டிருக்கிறாள்

ஒரு காலத்திற்குள்ளிருந்து வேறொரு காலத்திற்குள்
தானியங்களை நீட்டும்
நீள் அலகு என்னுடையது

4

கொல்லையில் பசுக்கள்
தெய்வம் போல
நின்று
அசைந்து கொண்டிருக்கின்றன

முன்பக்கக் கொன்றை
தெய்வம் போல நின்று ஆடிக் கொண்டிருக்கிறது
தழுவிய காற்று
உள் வந்து நிறையும்
வீட்டினுள்
தெய்வம் போலே
குழந்தைகள்
விளையாடிக் கொண்டிருக்கிறார்கள்

நடுவில் நானொரு மனுஷ
சொரூபம்
எடுத்து நிற்கிறேன்

5

ஒரு காலத்தில் உன்னைப் போலவே
இருந்திருக்கிறேன்

முதலமைச்சருக்கு ஆலோசனை
சொல்லியிருக்கிறேன்
ப்ரதான் மந்த்ரியை எதிர்த்திருக்கிறேன்
சாதுக்களிடம் சண்டையிட்டிருக்கிறேன்
தெய்வங்களையெல்லாம்
நிந்தித்திருக்கிறேன்
போவோர் வருவோரையெல்லாம்
தாக்கியிருக்கிறேன்
அடியாரை அடித்திருக்கிறேன்

உடன் ஒருவன் இருந்தால் போதும்
சாமியைத் தோள் எட்டி
மிதித்திருக்கிறேன்

எதற்கும் முயற்சித்ததில்லை
எல்லாவற்றுக்கும் ஆசைப்பட்டிருக்கிறேன்
ஒருகாலத்திய
கலகக்கடவுள் நானிருந்த இடத்தில்
நீ வந்து முளைத்திருக்கிறாய்

அப்படியே உனக்கு என் வாலிப முகம்
அதே ஆற்றல்
அதனால்தான் எனக்கு பயமாக இருக்கிறது
முற்போக்கு கலகமுகம் கழுவி
வீட்டு நெல்லி மரத்திற்கு
தண்ணீர் விடுவதிலிருந்தே தொடங்கி
முதலில் இருந்து
புறப்பட்டு களத்திற்கு வந்து சேர
நான்கு கடல் தூரம் இருக்கிறது
தாங்குவாயா தம்பி ?

Comments

Popular posts from this blog

விக்ரமாதித்யன் தமிழின் அலங்காரம்

  இவர்களோடொப்பமெல்லாம் - 1 "விக்ரமாதித்யன் தமிழின் அலங்காரம்" தமிழ்க் கவிதையில் பாரதி இனி எப்படி சாத்தியமில்லையோ,அது போலவே விக்ரமாதித்யனும் . நிகழ்ந்த அற்புதங்கள். மறுபடி மீண்டும் சாத்தியங்கள் அற்றவை. குற்றாலம் கவிதைப் பட்டறையில் திருமேனியும் ,முத்து மகரந்தனும் ஆளுக்கொரு பக்கமாக கைத்தாங்கலாக விக்ரமாதித்யனை தூக்கிக் கொண்டு வந்த காட்சி இப்போதும் என்மேல் நிலவுகிறது. தள்ளாடிய மகா ராஜன் பல்லக்கில் வருவது போல அக்காட்சி.திருமேனியும் சரி , முத்து மகரந்தனும் சரி அப்போது இளைஞர்கள் மத்தியில் நம்பிக்கையூட்டிய கவிஞர்கள்.திருமேனியின் கவிதைகளை கைப்பிரதியாக ஒரு முறை சுந்தர ராமசாமி படிக்கக் கொடுத்து படித்திருந்தேன்.நிகழ்ச்சி நடைபெறும் திவான் பங்களா வாசலில் இருந்து தொடங்கிய இந்த பல்லக்கு பவனி ; திவான் பங்களாவின் உள்ளறைக்கு வர சாமி இறக்கி வைக்கப்பட்டார்.படையலுக்கு தினுசான பலவகை ரசாயனங்கள்.உண்டியை யாரும் பொருட்படுத்துவதில்லை.ஆனால் அவையும் வேடிக்கைக்காக வந்து உட்கார்ந்திருந்தன. திரவ ஆகாரத்தின் மீது மட்டும் நம்பிக்கை கொண்ட கூட்டமே அப்போது அவரை வட்டமடித்துக் கறங்குவது .அது வெறுமனே திரவத்திற்காக மட

இந்த வெற்றி மிகவும் முக்கியமான வெற்றி ஒன்றும் அல்ல

  இந்த வெற்றி மிகவும் முக்கியமான வெற்றி ஒன்றும் அல்ல இந்த வெற்றி மிகவும் முக்கியமான வெற்றி ஒன்றும் அல்ல பத்தாண்டு காலத்திற்குப் பிறகு ,சிலபல வீட்டுப்பாடங்கள்,கூலி யுக்திகள் வழியே இந்த சிறிய வெற்றியை தி.மு.க அடைந்திருக்கிறது.இது உண்மையாகவே உயிர் போராட்டம் அவர்களுக்கு. மாறிவரும் அரசியல் சூழ்நிலைகளுக்கு நடுவே அமைந்திருக்கும் இந்த வெற்றி மிக மிக தற்காலிகமானது.ஏற்கனவே அவர்களுக்கான இந்த இடத்தைப் பிடிப்பதற்கே இந்த தேர்தலில் பெரும் முக்கு முக்கியிருக்கிறார்கள்.இந்த வெற்றி பலரும் எதிர்பார்த்த வெற்றியும் கூடத்தான்.இருபது தொகுதிகள் குறைவாக வந்திருப்பார்களேயானால் எதிர்தரப்பினர் வகுத்த இடத்தில் இந்த வெற்றி அமைந்திருக்கும் பா.ஜ.க,கமல் ,சீமான் ஆகியோர் வந்திருக்கும் அளவிற்குக் கூட இந்த தேர்தலில் தி.மு.க அடைந்திருப்பது முக்கியமானது அல்ல.கேரளத்தில் கம்யூனிஸ்ட்கள் அடந்திருப்பது வெற்றி,பூரணமான வெற்றி.சந்தேகமே இல்லை.மக்கள் அவர்களை முழுமையாக நம்புகிறார்கள் என்பதையே முடிவுகள் தெரிவிக்கின்றன.தமிழ் நாட்டில் தி.மு.க அடைந்த வெற்றியை தற்கொலையை தடுத்தாட்கொண்ட வெற்றி என்று வேண்டுமானால் சொல்லிக் கொள்ளலாம்.மேற்கு வங்

25 கவிதைகளின் தொகுப்பு - லக்ஷ்மி மணிவண்ணன்

  1 பிறந்த குழந்தை மடியில் கனவு காண்கிறது தூங்கி விளையாடுகிறது அசைத்து விடப்பட்ட ஊஞ்சல் போல சுய நினைவற்று மெல்ல ஆடுகின்றன தாய் மடியில் தாயின் தொடைகள் தாய் மடியாக எவ்வளவு விரிகிறது இந்த மடி பிரபஞ்சம் அளவிற்கு பிரபஞ்சம் அளவிற்கு விரிந்த மடி ஆணிடம் வரும் போது சுருங்கிச் சுருங்கி ; சுருங்கி சிறு யோனியின் அளவிற்கு ஒரு துளையாகிறது அதை பிரபஞ்சம் அளவிற்கு பெரிதாக்குகிறது பூமியில் பிறந்தவுடன் குழந்தை 2 டியூஷன் முடிந்து குழந்தைகள் சென்றபின் இருக்கைகள் கலைந்திருக்கின்றன அமர்ந்திருந்த குழந்தைகள் வளைத்த விதத்தில் சரிப்படுத்தச் சென்ற கரங்களைப் பின்வலிக்கிறேன் அவை அவ்வாறே இருப்பதுதானே நன்று? 3 இந்த காலையை உருவாக்க சில பறவைகள் பாடிக் கொண்டிருக்கின்றன. ஒருத்தி முற்றத்தில் எழுப்புகிற கோலம் பாடலுக்கு ஒத்தாசை செய்கிறது. டிப்பர் லாரி இன்னும் புலரவில்லை அதன் நெற்றியில் நேற்றைய பூளை கோவில் மணிச் சத்தம் இந்த காலையைத் தொடங்கி முடிக்கவும் தயாரான காலையை தனது சாக்குப்பைக்குள் சிறுகச் சிறுக சேமித்த வண்ணம் கடினம் இழுத்துக் கொண்டோடுகிறான் இன்றைய நாளின் பைத்தியம். 5 உங்களுக்கு பைத்தியம் பிடிக்கும் போது வாருங்கள்