Skip to main content

கடல் திறத்தல் - லக்ஷ்மி மணிவண்ணன்

 கடல் திறத்தல்





முதலில் ஒரு மணல் வீட்டைக்
கட்டிமுடித்த குழந்தை
பிறகு
அதற்கொரு தோட்டம் அமைத்தது
மெல்லிய அலைகள்
கட்டிய வீட்டை எடுத்துக் கொண்டதும்
கடலுடன்
விளையாடத் தொடங்கியது
குழந்தை
அடுத்து ஒரு கிணறு அமைத்தது குழந்தை
சற்றே பெரிய அலையால் கிணற்றை
வாரிக் குடித்துச்
சென்றது கடல்
மீதமிருந்தது
பருகியது போக மிஞ்சிய நீரூற்று
அதை அப்படியே விட்டுவிட்டு
கட்டி எழும்பியது
பள்ளி மைதானம்
இருவரும் விளையாடுகிறார்கள்
குழந்தைக்கு தன்னைத் திறந்த
கடலுக்குள்
குழந்தையின் கரத்தை பற்றியவாறு
குளிக்கிறேன்
இறங்காமல் குளிப்பது
இப்படித்தான்
போலும்

2

பொழிமுகம்
கடற்கரையைத் தாண்டும்
தணிந்த அலைகள்
ஒவ்வொன்றாகப் பின்தொடர்ந்து
வருகின்றன
வரும் ஒவ்வொரு அலையும்
ஒடிவந்து பின் திகைத்து நிற்கும் நதியை
காயலில் சந்தித்து
கைபிடித்து
கடலுக்குள்
அழைத்துச் செல்கின்றன
மணப்பெண்ணின் தயக்கத்தோடு
கடளுள்
நுழைந்து கொண்டேயிருக்கிறது காயல்
தளும்பி மிளிர்கிறது
கடல்

3

தொலைவு சென்று மீண்டும்
வீட்டுக்கு வந்து சேர்ந்தேன்
சில பொருட்கள்
இடம் மாறியிருந்தன
பசு பின்னகர்ந்து மீண்டும் வந்து மோப்பம்
செய்கிறது
தாவர மூடுகள்
எண்ணையற்ற தலைவிரி
கோலத்தில்
இருந்தன
மறக்க முயன்று
எட்டிப் பார்க்கும்
பல்லிகள்.
சாமிப்படம் விலகியிருந்தது
எடுத்து சரியான திக்கில்
வைத்தேன்
இப்படி மொத்தத்தில் இரண்டடிக்கு
அப்பால்
நகர்ந்திருந்தது
என் வீடு

4

மரணிக்கும்போது
ஒன்று வெளியேறுகிறது
இருக்கும்போது
அனைத்தையும் தாங்கிய ஒன்று
வெளியேறியதும்
அனைத்தையும்
சக்கை என மாற்றும் ஒன்று
எச்சமிட்ட பறவை செல்வதுபோல
அனைத்தையும் பீயாக்கிவிட்டு அது
கடந்து செல்கிறது
எதையெல்லாம் முக்கியம் என்றதோ
அனைத்தையும் பீயாக்கிவிட்டு
கடந்து செல்கிறது
இந்த பூமியையே
பீயாக்கி
வெளியேற்றிவிட்டு
கடந்து செல்கிறது
குமிழ் உடைந்து வெளியேறுதல் போல
சிறுவொலி எழுப்பி
அது கடந்து செல்வதை
அருகிருந்து காண
நன்றாகத்தான் இருக்கிறது
ஆனாலும்

5

என்னுடைய
உலகம்
மிகவும் சின்னது
எல்கைகள் அதனினும் சிறியவை
வடமேற்கில் குபேரன்
தென்மேற்கில் பகவதி
வடகிழக்கே கால பைரவன்
தென்கிழக்கே இந்திரன்
மையத்தில் நான்

6


சென்னை

என்னுடைய புலன்களை எழுப்ப இயலாவண்ணம்
இந்த நகரம்
சோர்ந்திருக்கிறது
ஒருசமயம் கவர்ச்சிக்கன்னியின்
நடனமிட்டு
தூங்கவிடாமற்செய்த
அதே பெருநகரம்தான்
இது
ஆயிரம் விளக்கிட்டு
நடித்த இதன் நடிப்பில்
வலிப்பு ஏற்பட்டு
வீழ்ந்திருக்கிறேன்
வேண்டாம் எனச்சொல்லி
வெளியேறியிருக்கிறேன்
இப்போது என்னுடைய இடுப்புக்கும் கீழ்உயரமுள்ள
அது
மண்டியிட்டு
நிற்கிறது
என்னிடம் பேச அதற்கு
யாதொன்றும் இல்லை
என்னுடைய வார்த்தைகளை
மந்திரம் போல
கேட்கிறது
எப்போது வேண்டுமாயினும் வெளியேறவேண்டிவரலாம் என்று
அத்தனை வெற்றி வினாயகர்களும்
எழுந்து நிற்கிறார்கள்
நான் திரிசடை தோய்ந்து
சுற்றியலைந்த நாட்களில்
சிதறுத் தேங்காய் தின்னக் கொடுத்தவர்கள்
ஆயிரமாயிரம் விழாக்கள்
ஆயிரமாயிரம் துஷ்டிகள் பார்த்து
இரண்டும் ஒன்றெனக் காணும்
பாழ்மண்டபம் போலும்
சாப்பாட்டு மேஜையில்
அலுப்புறுகிறார்
ஆயிரமாண்டு மூத்த
பெருநகரக்கிழவி
நகரத்து அரசமரங்கள்
அறியாத பாவத்துக்கு
சுற்றி சுவர் விலங்கிட்டு
அன்னியமாகி நிற்கின்றன
நரம்புவாதக்கைகளால் தீபமேற்றுகிறார்
ஆச்சாரியார்
பார்த்தசாரதிமட்டும்
இன்னும்
கலங்கவில்லை
இன்னும் இன்னும் தாங்குவார்போல
வண்ணம் பூசி நாளான இந்த நகரம்
ஒட்டுமொத்தமாக விலைக்கு விற்கப்படும்
என்கிற தட்டிகளோடு
ஆங்காங்கே
தொங்கிக் கிடக்கிறது

Comments

Popular posts from this blog

விக்ரமாதித்யன் தமிழின் அலங்காரம்

  இவர்களோடொப்பமெல்லாம் - 1 "விக்ரமாதித்யன் தமிழின் அலங்காரம்" தமிழ்க் கவிதையில் பாரதி இனி எப்படி சாத்தியமில்லையோ,அது போலவே விக்ரமாதித்யனும் . நிகழ்ந்த அற்புதங்கள். மறுபடி மீண்டும் சாத்தியங்கள் அற்றவை. குற்றாலம் கவிதைப் பட்டறையில் திருமேனியும் ,முத்து மகரந்தனும் ஆளுக்கொரு பக்கமாக கைத்தாங்கலாக விக்ரமாதித்யனை தூக்கிக் கொண்டு வந்த காட்சி இப்போதும் என்மேல் நிலவுகிறது. தள்ளாடிய மகா ராஜன் பல்லக்கில் வருவது போல அக்காட்சி.திருமேனியும் சரி , முத்து மகரந்தனும் சரி அப்போது இளைஞர்கள் மத்தியில் நம்பிக்கையூட்டிய கவிஞர்கள்.திருமேனியின் கவிதைகளை கைப்பிரதியாக ஒரு முறை சுந்தர ராமசாமி படிக்கக் கொடுத்து படித்திருந்தேன்.நிகழ்ச்சி நடைபெறும் திவான் பங்களா வாசலில் இருந்து தொடங்கிய இந்த பல்லக்கு பவனி ; திவான் பங்களாவின் உள்ளறைக்கு வர சாமி இறக்கி வைக்கப்பட்டார்.படையலுக்கு தினுசான பலவகை ரசாயனங்கள்.உண்டியை யாரும் பொருட்படுத்துவதில்லை.ஆனால் அவையும் வேடிக்கைக்காக வந்து உட்கார்ந்திருந்தன. திரவ ஆகாரத்தின் மீது மட்டும் நம்பிக்கை கொண்ட கூட்டமே அப்போது அவரை வட்டமடித்துக் கறங்குவது .அது வெறுமனே திரவத்திற்காக மட

இந்த வெற்றி மிகவும் முக்கியமான வெற்றி ஒன்றும் அல்ல

  இந்த வெற்றி மிகவும் முக்கியமான வெற்றி ஒன்றும் அல்ல இந்த வெற்றி மிகவும் முக்கியமான வெற்றி ஒன்றும் அல்ல பத்தாண்டு காலத்திற்குப் பிறகு ,சிலபல வீட்டுப்பாடங்கள்,கூலி யுக்திகள் வழியே இந்த சிறிய வெற்றியை தி.மு.க அடைந்திருக்கிறது.இது உண்மையாகவே உயிர் போராட்டம் அவர்களுக்கு. மாறிவரும் அரசியல் சூழ்நிலைகளுக்கு நடுவே அமைந்திருக்கும் இந்த வெற்றி மிக மிக தற்காலிகமானது.ஏற்கனவே அவர்களுக்கான இந்த இடத்தைப் பிடிப்பதற்கே இந்த தேர்தலில் பெரும் முக்கு முக்கியிருக்கிறார்கள்.இந்த வெற்றி பலரும் எதிர்பார்த்த வெற்றியும் கூடத்தான்.இருபது தொகுதிகள் குறைவாக வந்திருப்பார்களேயானால் எதிர்தரப்பினர் வகுத்த இடத்தில் இந்த வெற்றி அமைந்திருக்கும் பா.ஜ.க,கமல் ,சீமான் ஆகியோர் வந்திருக்கும் அளவிற்குக் கூட இந்த தேர்தலில் தி.மு.க அடைந்திருப்பது முக்கியமானது அல்ல.கேரளத்தில் கம்யூனிஸ்ட்கள் அடந்திருப்பது வெற்றி,பூரணமான வெற்றி.சந்தேகமே இல்லை.மக்கள் அவர்களை முழுமையாக நம்புகிறார்கள் என்பதையே முடிவுகள் தெரிவிக்கின்றன.தமிழ் நாட்டில் தி.மு.க அடைந்த வெற்றியை தற்கொலையை தடுத்தாட்கொண்ட வெற்றி என்று வேண்டுமானால் சொல்லிக் கொள்ளலாம்.மேற்கு வங்

25 கவிதைகளின் தொகுப்பு - லக்ஷ்மி மணிவண்ணன்

  1 பிறந்த குழந்தை மடியில் கனவு காண்கிறது தூங்கி விளையாடுகிறது அசைத்து விடப்பட்ட ஊஞ்சல் போல சுய நினைவற்று மெல்ல ஆடுகின்றன தாய் மடியில் தாயின் தொடைகள் தாய் மடியாக எவ்வளவு விரிகிறது இந்த மடி பிரபஞ்சம் அளவிற்கு பிரபஞ்சம் அளவிற்கு விரிந்த மடி ஆணிடம் வரும் போது சுருங்கிச் சுருங்கி ; சுருங்கி சிறு யோனியின் அளவிற்கு ஒரு துளையாகிறது அதை பிரபஞ்சம் அளவிற்கு பெரிதாக்குகிறது பூமியில் பிறந்தவுடன் குழந்தை 2 டியூஷன் முடிந்து குழந்தைகள் சென்றபின் இருக்கைகள் கலைந்திருக்கின்றன அமர்ந்திருந்த குழந்தைகள் வளைத்த விதத்தில் சரிப்படுத்தச் சென்ற கரங்களைப் பின்வலிக்கிறேன் அவை அவ்வாறே இருப்பதுதானே நன்று? 3 இந்த காலையை உருவாக்க சில பறவைகள் பாடிக் கொண்டிருக்கின்றன. ஒருத்தி முற்றத்தில் எழுப்புகிற கோலம் பாடலுக்கு ஒத்தாசை செய்கிறது. டிப்பர் லாரி இன்னும் புலரவில்லை அதன் நெற்றியில் நேற்றைய பூளை கோவில் மணிச் சத்தம் இந்த காலையைத் தொடங்கி முடிக்கவும் தயாரான காலையை தனது சாக்குப்பைக்குள் சிறுகச் சிறுக சேமித்த வண்ணம் கடினம் இழுத்துக் கொண்டோடுகிறான் இன்றைய நாளின் பைத்தியம். 5 உங்களுக்கு பைத்தியம் பிடிக்கும் போது வாருங்கள்