பகைவன் இல்லாத மனம் காற்றைப் போலிருக்கிறது

பகைவன் இல்லாத மனம் காற்றைப் போலிருக்கிறது

1

எனக்குள்ளிருந்தான்
பகைவன்
அழித்தேன்
வெளியிலிருந்த பகைவரெல்லாம் அழிந்தனர்

அவனை கண்டறிய வயதில் பாதியாயிற்று

எவ்வளவு பேர்களென
ஆச்சரியமாக இருந்தது

விரைவில்
பகைவனைக் கண்டடைந்து விடு இளைஞனே

பாதி வயது
மிச்சமாகும்
மீதி வயது உனதாகும்

2

உள்ளில் இருக்கும்
பகைவனுக்கு
முதலில்
சோறு போடுவதை நிறுத்து
நான்கு நாளில்
ஓடிப்போவான்

நீருற்றுவதை நிறுத்து
இரண்டு மணிநேரத்தில்
மாறி விடுவான்

மூச்சுக்கு ஒருதரம் நினைப்பதை நிறுத்து
கணத்தில்
விலகிவிடுவான்

நீ அவனை காதலிக்கிறாய் என்பது
தெரிந்து
நானிதை
உனக்குச் சொல்கிறேன்

3

பகைவன் ஒருபோதும்
உன்னைத் தேடுவதில்லை
நீதான் சதா அவனைத் தேடித் கொண்டிருக்கிறாய்

4

எத்தனை பகைவன் எத்தனை பகைவன்
என்பதுதானே
உன் பிரச்சனை ?
அத்தனை பகைவனும்
ஒருவனே
உன்னகங்காரன்

5

பகைவன் இல்லாத மனம்
காற்றைப் போலிருக்கிறது

6

உனக்கு இரண்டு பாத்திரங்கள் உண்டு
அதிலொன்று
உன்னுடைய
பகைவனின் பாத்திரம்

7

நீ சோறு வைத்தால் மட்டுமே
எடுத்துத் தின்னும் அளவிற்கு
உன் பகைவன்
பலகீனமானவன்

8

பகைவன் பகைவன்
என நீ பயந்து கொண்டிருப்பதெல்லாம்
உன்னைப் பற்றித்தான்

###

பிரதோஷ சிவன்

1

இடர் தோன்றும் மறையும்
இடரை முன்வைத்து
சிவத்தை காக்காமல் இயலுமோ

2

அத்தனையும் சிவமென்றால்
சிற்றெறும்பும் சிவமன்றோ

3

நீ சிவமென்றுணர்ந்தால்
பின்னர்
நானும் சிவம்
என்பது
தெளியும்

4

முழுதும் சிவமாயிருந்தால்
சோதனைகள்
இல்லை

5

சிவமல்லாதது அத்தனையும் இணைந்து
நின்று எதிர்த்தால்
எளிது

சிவம்
விஸ்வரூபக் காட்சியாக

6

சிவத்துக்கு அபிஷேகம் மட்டும்தான்
செய்ய வேண்டுமென்பதில்லை
சமையல் வேலைகள் கூட
பணிக்கலாம்

7

அத்தனை சிவத்திற்கு
மத்தியில்தான்
ஆதி சிவனும்
சென்று கொண்டிருக்கிறான்

8

தொட்டுத் தொட்டு
சிந்தையெல்லாம் சிவமானால்
சிவனைத் தேடித் செல்லத்
தோன்றாது

9

ஆயிரம் சிவத்திற்கு மத்தியில்
விந்தை தீராது நிற்கிறேன்
அனைத்திலும் ஒரு
அரை நிர்வாண
பக்கிரி

10

ஆடுவதை நிறுத்த முடியாது

11

அரை நிர்வாணத்தில்
அமர்ந்திருப்பது
அரை
சிவம்

12

சுகம் அல்லாதது எல்லாம்
சிவம் அல்லாதது

###

இவையெல்லாம் கேட்பதற்கு
நான் எதற்கு
இவையெல்லாம் காண்பதற்கு
நான் எதற்கு
இவையெல்லாம் பேசுதற்கு
நான் எதற்கு
இவற்றிற்கெல்லாம் எதிர்வினை புரிய
நானெதற்கு
அதற்குள்
சிவம் தான் எதற்கு ?

###

அவளுடைய சுபாவத்தில்
இவளுடைய சுபாவத்தை
இல்லாமல்
ஆக்குவது கடினம்
சொந்த சுபாவம் ஒன்றிரண்டிருந்தால்
சிறப்பு

அவர் கொடுத்துச் சென்ற கொஞ்சம்
என் கையை
அடைத்துக்
கிடக்கிறது
யாரிடமேனும்
ஏற்பிக்க
ஏங்கி

இதற்கு
அப்பால்
நானென்பதும்
நீயென்பதும்
கொஞ்சம்
கொஞ்சம் தான்